فيديو: إيجاد إزاحة جسم يتحرَّك بعجلة منتظمة بين لحظتين زمنيتين معطاتين

يتحرك جسم في خط مستقيم بعجلة منتظمة ١ م/ث^٢. إذا كانت سرعته الابتدائية ع_٠ تساوي ٢١ م/ث، فأوجد إزاحة الجسم ف خلال الفترة الزمنية بين ن = ٧، ن = ١٣ ث.

٠٢:٠٥

‏نسخة الفيديو النصية

يتحرك جسم في خط مستقيم بعجلة منتظمة واحد متر لكل ثانية تربيع. إذا كانت سرعته الابتدائية ع صفر تساوي واحد وعشرين متر لكل ثانية، فاوجد إزاحة الجسم ف خلال الفترة الزمنية بين ن يساوي سبعة، وَ ن يساوي تلتاشر ثانية.

علشان نوجد إزاحة الجسم اللي هو ف في الفترة الزمنية اللي هي بين سبعة وتلتاشر، يبقى لازم نوجد السرعة المتوسطة في الفترة دي. الفترة دي بدأت من عند ن تساوي سبعة، وانتهت عند التلتاشر. فيبقى معنى كده إن إحنا عايزين نوجد السرعة المتوسطة اللي عند العشرة، اللي هي في نص المسافة بين السبعة والتلتاشر، عايزين نوجد السرعة المتوسطة هنا.

من قوانين نيوتن للحركة السرعة ع بتساوي ع الابتدائية، زائد العجلة في الزمن. الزمن هنا عند ن يساوي عشرة. وهنا السرعة الابتدائية واحد وعشرين. وعجلة الجسم واحد متر لكل ثانية تربيع.

فالـ ع دي هتبقى الـ ع المتوسطة اللي هي عند الـ ن تساوي العشرة، هتساوي واحد وعشرين زائد الـ واحد في العشرة؛ يعني هتساوي واحد وتلاتين متر لكل ثانية. الـ ف هتساوي اللي هي إزاحة الجسم السرعة المتوسطة في الفترة الزمنية، اللي هي من سبعة للتلتاشر. هتساوي ع المتوسطة اللي إحنا أوجدناها واحد وتلاتين، في الفترة الزمنية هي التلتاشر ناقص السبعة، اللي هي هنا قيمتها ستة. يبقى واحد وتلاتين في ستة هتساوي مية ستة وتمانين متر. يبقى هي دي إزاحة الجسم خلال الفترة الزمنية بين ن تساوي سبعة لـ ن تساوي تلتاشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.