فيديو: تقريب عدد عشري لأقرب عشرة

‏نسخة الفيديو النصية

قرب اتناشر واتنين وتلاتين من مية إلى أقرب عشرة.

دلوقتي مطلوب مننا إن العدد اللي قدامنا ده نقرّبه لأقرب عشرة، فعايزين نشوف الخانة المكانية لكل رقم من الأرقام؛ عشان نشوف هنقربه إزاي. دلوقتي مطلوب مننا نقرّب العدد اللي قدامنا ده إلى أقرب عشرة، فعايزين نشوف الخانات المكانية عشان نشوف فين الخانة المراد التقريب ليها.

هنلاقي إن أول خانة على شمال العلامة العشرية دي خانة الآحاد، والخانة اللي بعدها أو اللي على شمالها خانة العشرات، طب إحنا مطلوب مننا نقرّب لأقرب عشرة؛ يعني مطلوب نقرب إلى الخانة المكانية اللي هي العشرات. يبقى أول خطوة هنحط خط تحت الرقم اللي في الخانة المكانية اللي عايزين نقرب ليها، الخطوة اللي بعد كده هنشوف الرقم اللي على يمينه، لو الرقم ده أقل من خمسة فالرقم اللي تحته الخط هيفضل زي ما هو، وكل الأرقام اللي بعد كده هتتحول لأصفار؛ فبالتالي العدد اللي عندنا ده لمّا نقرّبه لأقرب عشرة هيبقى بيساوي تقريبًا عشرة؛ لأن الأصفار اللي موجودة على يمين العلامة مش هتضيف ولا هتغيّر من قيمة العدد اللي عندنا.