تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: كتابة المقادير الجبرية والمعادلات

أحمد مدحت

يوضح الفيديو بعض الجمل والعبارات التي تشير إلى العمليات الحسابية المختلفة، وكيفية كتابة المقادير الجبرية والمعادلات من خلال العبارات اللفظية.

٠٨:٤١

‏نسخة الفيديو النصية

هنتكلّم عن كتابة المقادير الجبرية والمعادلات.

في الأول هنعرف بعض الجمل والعبارات اللي بتشير إلى العمليات الحسابية المختلفة. بعد كده هنشوف إزّاي نقدر نكتب مقدار جبري. ويعني إيه معادلة، وإزّاي نقدر نكتبها. هيظهر لنا جدول. في الجدول ده، هنلاقي بعض الجمل والعبارات اللي بتشير إلى عمليات حسابية مختلفة، زيّ الجمع، والطرح، والضرب، والقسمة.

فعلى سبيل المثال، بالنسبة لعملية الجمع، هنلاقي المجموع، وأكبر من، ويزيد بمقدار. أمَّا بالنسبة لعملية الطرح، فهنلاقي الفرق، وأقلّ من، ويقلّ بمقدار. أمَّا بالنسبة لعملية الضرب، فهنلاقي اضرب، وحاصل الضرب، وأمثال. وبالنسبة لعملية القسمة، فهنلاقي اقسم، وناتج القسمة، ولكل.

بعد كده هنشوف مثال نعرف بيه إزّاي نقدر نكتب مقدار جبري. بس هيبقى في الصفحة اللي جايّة. هنقلب الصفحة، هيظهر لنا المثال. في المثال اللي عندنا، عايزين نكتب العبارة: مع عمر خمسة جنيهات زيادة عن ما مع أحمد، في صورة مقدار جبري. بالنسبة للمقدار الجبري، فهو بيحتوي على رموز، وأعداد، وعملية حسابية واحدة عَ الأقلّ. وبالنسبة للرمز، فهو بيشير لمتغيّر. والمتغيّر ده بيكون عبارة عن الكمّيّة المجهولة.

وإحنا عندنا عبارة لفظية أو تعبير لفظي، وهي: مع عمر خمسة جنيهات زيادة عن ما مع أحمد. أول حاجة هنعملها، إن إحنا من خلال العبارة اللي عندنا، هنبدأ نحدّد الكمّيّة المجهولة. واللي هنبدأ بعد كده ندّيها رمز؛ علشان يمثّل المتغيّر اللي موجود في المقدار الجبري. فهنلاقي إن عدد الجنيهات اللي مع أحمد هي الكمّيّة المجهولة، فهندّيها رمز معيّن، ولْيكُن س. وبكده يبقى إحنا حدّدنا المتغيّر اللي موجود في المقدار الجبري، وهو س، واللي هتمثّل عدد الجنيهات اللي مع أحمد.

بعد كده عايزين نحدّد العملية الحسابية. فهنلاقي في العبارة اللي عندنا «زيادة عن» اللي بتشير إلى عملية الجمع. معنى كده إن خمسة جنيهات زيادة عن ما مع أحمد، هيبقى عبارة عن: س زائد خمسة. يعني المقدار الجبري هيبقى س زائد خمسة. وهو ده المطلوب. بكده من خلال المثال ده، عرفنا إزّاي نقدر نكتب عبارة لفظية أو تعبير لفظي في صورة مقدار جبري.

بعد كده هنشوف إزّاي نكتب المعادلة. بس في الأول هنعرف يعني إيه معادلة. بالنسبة للمعادلة، فهي عبارة عن جملة رياضية بتحتوي على علامة اليساوي. فلمّا بنيجي نكتب جملة أو عبارة لفظية في صورة معادلة رياضية، فإحنا بنستخدم علامة = بدلًا من كلمة يساوي.

هنشوف مثال نوضّح بيه أكتر. بس في الصفحة اللي جايّة. هنقلب الصفحة، هيظهر لنا المثال. عندنا في المثال جملتين، وعايزين نكتبهم في صورة معادلة جبرية.

هنبدأ بالجملة أ، واللي هي أقلّ من العدد بستة، يساوي عشرين. أول حاجة بالنسبة للمجهول اللي عندنا، فهو العدد. فهنبدأ ندّيله رمز معيّن هيمثّل المتغيّر اللي موجود في المعادلة، فهنرمز له بالرمز س. بالنسبة للعملية الحسابية، فهنلاقي أقلّ من، واللي بتشير إلى عملية الطرح. وبالنسبة لكلمة يساوي، فهنستبدلها بعلامة يساوي. يعني المعادلة هتبقى س ناقص ستة يساوي عشرين. وهي دي المعادلة المطلوبة.

بعد كده هنشوف الجملة ب، وهي: ثلاثة أمثال عمر أحمد يساوي اتناشر. المجهول اللي عندنا هو عمر أحمد. فهنبدأ ندّيله رمز معيّن، ولْيكُن ص. فـ ص دي هتمثّل عمر أحمد، واللي هتكون عبارة عن المتغيّر اللي موجود في المعادلة. وبالنسبة للعملية الحسابية، فهنلاقي «أمثال» اللي بتشير إلى عملية الضرب. وبالنسبة لكلمة يساوي، فإحنا بنستبدلها بعلامة =. معنى كده هيبقى تلات أمثال عمر أحمد عبارة عن تلاتة في ص، يعني تلاتة ص. وتلات أمثال عمر أحمد بيساوي اتناشر. يعني المعادلة هتبقى تلاتة ص تساوي اتناشر. وهي دي المعادلة المطلوبة.

هنشوف مثال كمان، بس في الصفحة اللي جايّة. هنقلب الصفحة، هيظهر لنا المثال. في المثال اللي عندنا: إذا علمتَ أن الزرافة أطول من الجمل بتلاتة ونصّ متر تقريبًا. فإذا كان طول الزرافة خمسة ونصّ متر، فما طول الجمل؟

عايزين نكتب المعادلة اللي بتمثّل المسألة دي. من المثال اللي عندنا، هنلاقي إن التعبير اللفظي هو إن الزرافة أطول من الجمل بتلاتة ونصّ متر. أمَّا بالنسبة للمجهول، فهنلاقيه هو طول الجمل. فهنرمز له برمز معيّن، ولْيكُن س. يعني المتغيّر اللي هيكون موجود في المعادلة هيبقى س، واللي بتمثّل طول الجمل. بالنسبة للعملية الحسابية، فلمّا هنرجع للتعبير اللفظي، هنلاقي «أطول من»، واللي بتشير إلى عملية الجمع. ومعنى العبارة: إن الزرافة أطول من الجمل بتلاتة ونصّ متر، إن طول الزرافة هيساوي طول الجمل زائد تلاتة ونصّ متر. فطول الزرافة هو خمسة ونصّ متر. فهيبقى خمسة ونصّ يساوي طول الجمل، واللي هو مجهول، واللي رمزنا له بالرمز س. يعني خمسة ونصّ تساوي س زائد تلاتة ونصّ. وهي دي المعادلة المطلوبة.

هنشوف مثال كمان في الصفحة اللي جايّة. نقلب الصفحة، هيظهر لنا المثال. بالنسبة للمثال ده، فهنلاقي إن مُعطى عندنا معادلة، وعايزين نحدّد أنهي مسألة مِ الأربع مسائل اللي عندنا بتعبّر عن المعادلة دي. فبالنسبة للمعادلة اللي عندنا هي: س ناقص سبعة تساوي تلاتة.

بالنسبة لأول مسألة، واللي هي المسألة أ، فهي: ركض طارق وخالد مسافة تلاتة كيلومتر. وكان خالد أسرع من طارق بسبعة ثانية. ما قيمة س التي تمثّل الزمن بالثواني الذي استغرقه طارق لقطع هذه المسافة؟

بالنسبة للمسألة أ، فإحنا هنستبعدها. وده لأن الطرف الأيمن من المعادلة هتبقى وحدته هي الثانية. أمَّا الطرف الأيسر، هتبقى وحدته هي الكيلومتر. وإحنا ما ينفعش نجري عمليات الجمع أو الطرح على وحدات قياس مختلفة. يبقى معنى كده إن الاختيار أ بالنسبة لنا مش هينفع.

بعد كده هنشوف الاختيار ب. والمسألة ب هي: في درس العلوم، قام جابر وعلي بقياس طول ديدان معيّنة. وكان طول الدودة التي قاسها جابر سبعة سنتيمتر. وطول الدودة التي قاسها علي تلاتة سنتيمتر. فما قيمة س التي تمثّل متوسّط طول الديدان؟

بالنسبة للمسألة ب برضو، فإحنا هنستبعدها. وده لأن إحنا وإحنا بنحسب المتوسّط بنحتاج إن إحنا نجمع، وبعد كده نقسم. وده مش بتوضّحه المعادلة اللي عندنا.

بعد كده هنشوف المسألة ج، وهي: تكلّف وجبة غداء محمد سبعة جنيهات. وعند دفعه المبلغ، حصل على باقٍ مقداره تلات جنيهات. فما قيمة س اللي هتمثّل المبلغ اللي دفعه محمد؟

يبقى في المسألة ج، محمد لو دفع س جنيه، وتمن الوجبة هو سبعة جنيه، فعلشان نحسب الباقي، هنطرح سبعة من س. وهو ده فعلًا اللي بتوضّحه المعادلة. معنى كده إن الاختيار ج هيبقى هو الإجابة الصحيحة.

بعد كده هنشوف الاختيار د؛ علشان نتأكّد من صحّة الإجابة؟ فبالنسبة للمسألة د، هنلاقي إن دفع عمّار مبلغ تلات جنيهات تمن لدفتر ملاحظات سعره في السوق سبع جنيهات. فما قيمة س اللي بتمثّل مقدار المبلغ الذي وفّره عمار؟

بالنسبة للمسألة د، فإحنا علشان نحصل على القيمة اللي وفّرها عمار، فإحنا عايزين نحسب المقدار سبعة ناقص تلاتة، ومش المقدار س ناقص سبعة. معنى كده إن الإجابة الصحيحة هتبقى هي الإجابة ج.

بكده يبقى إحنا في الفيديو ده، عرفنا في الأول بعض الجمل والعبارات اللي بتشير إلى العمليات الحسابية المختلفة، زيّ الجمع، والطرح، والضرب، والقسمة. وبعد كده عرفنا إزّاي نكتب المقادير الجبرية والمعادلات من خلال عبارات لفظية وجمل. فكُنّا في الأول بنحدّد الكمية المجهولة، واللي هنرمز لها برمز معيّن؛ علشان تمثّل المتغيّر. بعد كده كُنّا بنحدّد العمليات الحسابية. ولمّا كنا بنكتب المعادلة، كان بيبقى عندنا كلمة يساوي، اللي كُنّا بنستبدلها بعلامة =.