فيديو: استخدام الحقائق الأساسية والأنماط للضرب في مضاعفات ١٠، ١٠٠، ١٠٠٠ ذهنيًّا

يوضح الفيديو كيفية استخدام الحقائق الأساسية والأنماط للضرب في مضاعفات ١٠، ١٠٠، ١٠٠٠ عقليًّا، مع أمثلة توضيحية.

١١:٠٩

‏نسخة الفيديو النصية

في الفيديو ده، هنتعلّم إزَّاي نستخدم الحقائق الأساسية والأنماط للضرب في مضاعفات عشرة ومائة وألف عقليًّا. وهنحلّ بعض الأمثلة.

بعض السفن الكبيرة المخصَّصة لنقل المسافرين بتتّسع لحوالي ألفين مسافر في الرحلة الواحدة. فمعنى كده إن عدد المسافرين في الرحلة الواحدة هو واحد، اللي هو عدد الرحلات، في ألفين، اللي هو عدد المسافرين. فبيساوي ألفين مسافر. طيب لو عايزين نعرف عدد المسافرين في رحلتين؟ فهيبقى عدد المسافرين بيساوي اتنين، اللي هو عدد الرحلات، في ألفين، اللي هو عدد المسافرين في الرحلة الواحدة. فاتنين في ألفين بتساوي أربعة آلاف. فمعنى كده إن عدد المسافرين في رحلتين همّ أربعة آلاف مسافر.

طيب لو عايزين نعرف عدد المسافرين في تلات رحلات؟ فهيبقى بيساوي تلاتة، اللي هو عدد الرحلات، في ألفين، اللي هو عدد المسافرين في الرحلة الواحدة. فتلاتة في ألفين بيساوي ست آلاف. فهيبقى عندنا ست آلاف مسافر في تلات رحلات.

ومن المثال ده، بنلاحظ إن فيه نمط عندنا في عمليات الضرب. ففي الأول لمَّا ضربنا العدد واحد في ألفين، كان حاصل الضرب ألفين. فمعنى كده إن لمَّا ضربنا واحد في اتنين كان حاصل الضرب هنا اتنين. وعلشان الاتنين هنا اتنين ألف، يعني ألفين، فبنفس الطريقة كان حاصل الضرب ألفين. وبنفس الطريقة لمَّا ضربنا العدد اتنين في ألفين كان حاصل الضرب أربعة آلاف. فمعنى كده إن لمَّا ضربنا اتنين في اتنين هنا كان حاصل الضرب أربعة. وكان فيه جنب الاتنين هنا تلات أصفار، يعني ألفين. فكان حاصل الضرب أربعة وجنبها تلات أصفار، اللي هي أربعة آلاف. ولمَّا ضربنا تلاتة في ألفين، كان حاصل الضرب ست آلاف. يعني لمَّا ضربنا العدد تلاتة في العدد اتنين، كان حاصل الضرب ستة. وعشان الاتنين هنا هي اتنين ألف، يعني ألفين، فجنبها تلات أصفار، فحاصل الضرب كان ست آلاف، يعني برضو ستة وجنبها تلات أصفار.

ومن هنا، هنلاحظ إن فيه نمط عندنا للضرب. وبنقدر نستخدم الأنماط دي للضرب في مضاعفات عشرة ومائة وألف عقليًّا. فمثلًا لو عندنا تلاتة في تسعة بتساوي سبعة وعشرين، الأعداد المضروبة بنسمّيها عوامل ناتج الضرب. فمعنى كده إن تلاتة وتسعة هما عوامل سبعة وعشرين. وحاصل ضرب عددين أو أكتر بنسمّيه حاصل الضرب. فمعنى كده إن العدد سبعة وعشرين هو حاصل ضرب تلاتة في تسعة. فمعنى كده إن تلاتة في تسعة بتساوي سبعة وعشرين. هي دي الحقيقة الأساسية اللي عندنا. وبنقدر إننا نستخدم الحقيقة الأساسية دي علشان نضرب بعض الأعداد عقليًّا باستخدام الحقائق الأساسية والأنماط.

فمثلًا لو عايزين نوجد حاصل ضرب تلاتة في تسعين. فهنستخدم الحقيقة الأساسية اللي عندنا، اللي هي تلاتة في تسعة بتساوي سبعة وعشرين. لكن هنا عندنا تلاتة في تسعين. يعني تلاتة في تسع عشرات. فمعنى كده إن حاصل الضرب هيبقى سبعة وعشرين عشرة، يعني ميتين وسبعين.

طيب لو عايزين نوجد حاصل ضرب تلاتة في تسعمية. فبنفس الطريقة، عندنا الحقيقة الأساسية إن تلاتة في تسعة بتساوي سبعة وعشرين. فهنضرب هنا تلاتة في تسعة، فهتساوي سبعة وعشرين. لكن هنا إحنا بنضرب تلاتة في تسعمية، يعني تلاتة في تسع مئات. فمعنى كده إن هيبقى حاصل الضرب هو سبعة وعشرين مائة. فهيبقى حاصل الضرب هو ألفين وسبعمية.

وبنفس الطريقة، لو عايزين نوجد حاصل ضرب تلاتة في تسع آلاف. فبنفس الطريقة، هنستخدم الحقيقة الأساسية، اللي هي تلاتة في تسعة بتساوي سبعة وعشرين. بعد كده هنشوف هنا إننا بنضرب تلاتة في تسع آلاف. يعني هيبقى حاصل الضرب هو سبعة وعشرين ألف. ومن النواتج دي، هنقدر نلاحظ النمط اللي عندنا، فهنلاحظ في الأول لمَّا ضربنا تلاتة في تسعين، يعني تسعة وجنبها صفر، كان حاصل الضرب ميتين وسبعين. يعني سبعة وعشرين وجنبها صفر. وبنفس الطريقة، لمَّا ضربنا تلاتة في تسعمية، يعني ضربنا تلاتة في تسعة وجنبها صفرين، فكان حاصل الضرب ألفين وسبعمية، اللي هي سبعة وعشرين وجنبها صفرين. وبرضو لمَّا ضربنا تلاتة في تسعة آلاف، يعني تلاتة في تسعة وجنبها تلات أصفار، فبرضو بنفس الطريقة كان حاصل الضرب سبعة وعشرين ألف، يعني سبعة وعشرين وجنبها تلات أصفار.

فمن هنا هنلاحظ إننا استخدمنا الحقيقة الأساسية، اللي هي تلاتة في تسعة بتساوي سبعة وعشرين. وبعد كده لمَّا ضربنا في مضاعفاتها، يعني تسعين، وتسعمية، وتسعة آلاف، كانت الإجابة ماشية بنفس النمط. اللي هي ميتين وسبعين، وألفين سبعمية، وسبعة وعشرين ألف. فمعنى كده إننا نقدر نستخدم الحقائق الأساسية والأنماط علشان نوجد حاصل ضرب بعض الأعداد ذهنيًّا.

وخلّينا نشوف مثال. استخدم نمطًا لإيجاد ناتج ستة في تمنمية عقليًّا.

فعشان نوجد حاصل ضرب ستة في تمنمية عقليًّا، أول خطوة هنعملها إننا نكتب الحقيقة الأساسية. والحقيقة الأساسية هي إن حاصل ضرب ستة في تمنية بيساوي تمنية وأربعين. وتاني خطوة هي إننا هنستخدم الحقيقة الأساسية دي علشان نكمّل النمط. فهنبدأ نوجد حاصل ضرب ستة في تمانين. وهنستخدم الحقيقة الأساسية، اللي هي ستة في تمنية بتساوي تمنية وأربعين. لكن هنا عندنا ستة في تمانين، يعني ستة في تمن عشرات. يعني حاصل الضرب هيبقى تمنية وأربعين عشرة، يعني ربعمية وتمانين.

وبعد كده هنكمّل النمط. فهنوجد حاصل ضرب ستة في تمنمية. ومن الحقيقة الأساسية، عرفنا إن ستة في تمنية بتساوي تمنية وأربعين. وبما إننا بنضرب هنا ستة في تمنمية، يعني ستة من تمن مئات، فهيبقى حاصل الضرب تمنية وأربعين مائة، يعني أربعة آلاف وتمنمية. فبالتالي هيبقى حاصل ضرب ستة في تمنمية يساوي أربعة آلاف وتمنمية.

ومن هنا بنستنتج إننا لمَّا بنضرب عوامل من مضاعفات العشرة، بنقدر نوجد حاصل الضرب عقليًّا من خلال استخدام الحقائق الأساسية. بعد كده بنضيف أصفار على يمين النتيجة بعدد الأصفار في العوامل المضروبة. يعني لمَّا كان عندنا هنا صفر واحد، ضِفنا صفر. ولمَّا كان عندنا صفرين، ضِفنا صفرين، وهكذا.

ونشوف مثال آخر. أوجد حاصل الضرب أربعين في سبع آلاف عقليًّا.

فبنفس الطريقة، أول خطوة عندنا: إننا هنكتب الحقيقة الأساسية. والحقيقة الأساسية اللي عندنا هنا هي إن حاصل ضرب أربعة في سبعة بيساوي تمنية وعشرين. تاني خطوة: هنبدأ نعدّ الأصفار في كل عامل. والعوامل اللي هي أربعين وسبعة آلاف. فهنبدأ نعدّ الأصفار في كل عامل. فأول عامل عندنا، اللي هو أربعين، عدد الأصفار فيه صفر واحد. والعامل التاني عندنا، اللي هو العدد سبعة آلاف، لمَّا نعدّ الأصفار فيه هنلاقي إن همّ تلاتة. بعد كده هنجمع الأصفار دي. فيبقى عندنا صفر واحد زائد تلات أصفار بيساوي أربع أصفار. وهيبقى آخر خطوة عندنا إننا نكتب الأصفار دي على يمين حاصل الضرب في الخطوة الأولى. فمعنى كده إن أربعين في سبعة آلاف بتساوي … هنكتب تمنية وعشرين وجنبها أربع أصفار. فهيبقى حاصل الضرب هو ميتين وتمانين ألف.

وهنلاحظ هنا إننا استخدمنا الحقيقة الأساسية، اللي هي أربعة في سبعة بتساوي تمنية وعشرين. وبعد كده جمعنا الأصفار، فكان عندنا هنا صفر واحد، وهنا تلات أصفار، فكان حاصل الضرب هو تمنية وعشرين وجنبها أربع أصفار. فهيبقى حاصل الضرب هو ميتين وتمانين ألف.

ونشوف مثال آخر. تحمل سيارة خمسين صندوق تفاح، وزن كل صندوق عشرين كيلوجرام. أوجد مجموع أوزان الصناديق.

يعني عندنا سيارة فيها خمسين صندوق تفاح، ووزن كل صندوق عشرين كيلوجرام. فعشان نوجد مجموع أوزان الصناديق، يبقى عايزين نوجد حاصل ضرب خمسين في عشرين. فزيّ ما عرفنا، أول حاجة بنعملها إننا بنكتب الحقيقة الأساسية. والحقيقة الأساسية اللي عندنا إن حاصل ضرب خمسة في اتنين بيساوي عشرة. فهنستخدم الحقيقة دي علشان نوجد حاصل ضرب خمسين في عشرين. فعشان نضرب خمسين في عشرين، هنستخدم الأول الحقيقة الأساسية، اللي هي خمسة في اتنين بتساوي عشرة. بعد كده هنبصّ على العاملين المضروبين، هنلاقي إن خمسين هنا جنبها صفر واحد، والعشرين جنبها صفر واحد. فهنجمع صفر زائد صفر، هيبقوا صفرين. وهنكتب الصفرين دول على يمين العشرة. علشان خمسة في اتنين بتساوي عشرة. وبعد كده هنجمع الصفرين دول، ونحطّهم على يمين العشرة، فهتبقى ألف. فبالتالي هيبقى مجموع أوزان الصناديق بيساوي ألف كيلوجرام.

وقدرنا نوجد حاصل ضرب خمسين في عشرين عن طريق إننا استخدمنا الحقيقة الأساسية، اللي هي خمسة في اتنين بتساوي عشرة. وبعد كده هنجمع الصفر ده والصفر ده، وهنحطّهم على يمين حاصل ضرب خمسة في اتنين، اللي هو عشرة، فهيبقى المجموع ألف.

وبكده نكون عرفنا إزَّاي نستخدم الحقائق الأساسية والأنماط للضرب في مضاعفات عشرة ومائة وألف عقليًّا. وحلّينا بعض الأمثلة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.