فيديو: الطرح من الأعداد ٤ و٥ و٦

يوضِّح الفيديو طريقة طرح عددٍ ما من الأعداد ٤ و٥ و٦ باستخدام المكعبات.

٠٧:٤٤

‏نسخة الفيديو النصية

الطرح من الأعداد أربعة وخمسة وستة.

هنشوف في الدرس ده إزاي نقدر نطرح عدد ما، من الأعداد: أربعة، وخمسة، وستة، باستخدام المكعبات. لو عندنا أربع مكعبات، زيّ اللي قدامنا دول. ناقص … نحطّ علامة ناقص. وهنشيل منهم مكعب واحد بس. يساوي … هنحطّ علامة اليساوي؛ عشان إحنا كده بنكوّن جملة الطرح. مستنيّين نعرف الناتج. هنبصّ عَ المكعبات اللي قدامنا. الأربع مكعبات، لو حذفنا منهم مكعب، يا ترى الباقي هيبقى كام؟ هنعدّهم مع بعض ونشوف. واحد، اتنين، تلاتة. يبقى هيتبقّى عندنا تلات مكعبات. يبقى الناتج يساوي تلاتة.

طيب لو عندنا أربع مكعبات برضو، بس المرة دي ناقص اتنين. يعني هنحذف منهم، أو هننقّص منهم اتنين، بالشكل ده. يا ترى ناتج الطرح في الحالة دي، هيبقى كام؟ هنعدّ اللي باقي مع بعض. واحد، اتنين. يبقى في الحالة دي، ناتج الطرح هيبقى بيساوي اتنين. يبقى أربعة ناقص اتنين، يساوي اتنين.

طيب لو أربع مكعبات، عايزين نطرح منهم تلاتة. يعني المرة دي هنشيل منهم تلات مكعبات، بالشكل ده. يا ترى الباقي هيبقى كام؟ هيتبقّى عندنا مكعب واحد بس. هيبقى أربعة ناقص تلاتة، يساوي واحد. لو عندنا أربع مكعبات، طرحنا منهم أربعة. يعني أربعة ناقص أربعة. يا ترى الناتج هيبقى إيه؟ هنشوف كده عَ الرسم. الأربع مكعبات، لو نقّصنا منهم أربعة، بالشكل ده؛ مش هيتبقّى ولا مكعب. يعني هيبقى الناتج في الحالة دي، هو صفر. يبقى أربعة ناقص أربعة، تساوي صفر.

هنشوف في صفحة جديدة الطرح من العدد خمسة. لو ابتدينا بخمس مكعبات، وعايزين نطرح منهم مكعب واحد. يا ترى الناتج هيساوي كام؟ هنشوف دلوقتي، لو نقّصنا مكعب واحد من الخمس مكعبات اللي عندنا، هيتبقّى عندنا كام مكعب. واحد، اتنين، تلاتة، أربعة. هيتبقّى عندنا أربع مكعبات. يعني ناتج الطرح هيساوي أربعة.

طيب لو حبّينا ننقّص من الخمس مكعبات، اتنين. مش مكعب واحد، مكعبين. هنشوف من خلال الرسم، هيتبقّى عندنا كام مكعب. هنخصم … عفوًا، هننقّص مكعبين من الخمس مكعبات اللي عندنا، ونشوف الباقي كام مكعب. واحد، اتنين، تلاتة. كده هيتبقّى عندنا تلات مكعبات. يبقى خمسة ناقص اتنين، يساوي تلاتة.

نقدر كمان لو عندنا خمس مكعبات، نطرح منهم تلاتة. هنشوف لو نقّصنا من الخمس مكعبات، تلات مكعبات، هيتبقّى عندنا كام. هنعدّ عدد المكعبات المتبقّية، هنلاقي إن هيتبقّى عندنا اتنين. يبقى ناتج عملية الطرح، هو اتنين. خمسة ناقص تلاتة، يساوي اتنين. لو عندنا كمان خمس مكعبات، نقدر نطرح منهم أربعة.

هنشوف لو نقّصنا أربع مكعبات من الخمسة اللي عندنا، هيتبقّى كام. هيتبقّى عندنا كده مكعب واحد بس. يبقى نقدر نقول إن ناتج عملية الطرح دي، هيساوي واحد. خمسة ناقص أربعة، يساوي واحد. ولو عندنا خمس مكعبات، وطرحنا منهم خمسة، هنشوف كده من خلال الرسم. واحد، اتنين، تلاتة، أربعة، خمسة. ما اتبقّاش ولا مكعب. ده معناه إن ناتج عملية الطرح في الحالة دي، هيساوي صفر. يبقى خمسة ناقص خمسة، يساوي صفر.

هنجيب صفحة جديدة، ونشوف مجموعة أخرى من الأمثلة على الطرح من العدد ستة. هنستعمل ست مكعبات، عشان نعمل عمليات الطرح من العدد ستة. هنبدأ بأول عملية طرح: ستة ناقص واحد. يعني هننقّص مكعب من الست مكعبات اللي عندنا، ونبدأ نعدّ المكعبات المتبقّية. واحد، اتنين، تلاتة، أربعة، خمسة. كده هيتبقّى عندنا خمس مكعبات. يعني ناتج عملية الطرح هيبقى خمسة. عفوًا، هنكتبه بنفس اللون. هيبقى ستة ناقص واحد، يساوي خمسة.

لو جينا نطرح من الست مكعبات اللي عندنا، اتنين. يعني هننقّص مكعبين. هنشوف هيبقى ناتج الطرح في الحالة دي كام. واحد، اتنين، تلاتة، أربعة. هيتبقّى عندنا أربع مكعبات. يعني ناتج الطرح هيساوي أربعة. ستة ناقص اتنين، يساوي أربعة. لو جينا نطرح من الست مكعبات المرة دي، تلات مكعبات. يعني هننقّص تلاتة. هيتبقّى عندنا كام مكعب؟ هنعدّ هنلاقي واحد، اتنين، تلاتة. هيتبقّى عندنا تلات مكعبات. يبقى ناتج الطرح في الحالة دي، هيساوي تلاتة. يعني ستة ناقص تلاتة، يساوي تلاتة.

طب لو عايزين نطرح ستة ناقص أربعة؟ يبقى هننقّص من المكعبات اللي عندنا، أربع مكعبات. واحد، اتنين، تلاتة، أربعة. عايزين نشوف هيتبقّى كام مكعب، هنعدّ المكعبات الباقية. واحد، اتنين. كده هيتبقّى عندنا مكعبين. يبقى ناتج الطرح في العملية دي، هو اتنين. ستة ناقص أربعة، يساوي اتنين. ولو عايزين نطرح ستة ناقص خمسة، يبقى هنحذف خمس مكعبات، أو هننقّص خمس مكعبات من اللي عندنا. واحد، اتنين، تلاتة، أربعة، خمسة. كده هيتبقّى عندنا مكعب واحد بس. يبقى ناتج الطرح دلوقتي، هو واحد. ستة ناقص خمسة، تساوي واحد.

لو عايزين نطرح ستة ناقص ستة، ده معناه إن إحنا هننقّص ست مكعبات. واحد، اتنين، تلاتة، أربعة، خمسة، ستة. إحنا أصلًا عندنا ست مكعبات، لمّا ننقّص منهم ستة، كده مش هيتبقّى ولا مكعب. في الحالة دي، بنقول إن ناتج الطرح، بيساوي صفر.

شُفنا في الدرس ده إزاي بنقدر نطرح من الأعداد: أربعة، وخمسة، وستة، باستخدام المكعبات.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.