فيديو: ضرب عدد عشري في عدد عشري آخَر

احسب ٠٫٧١٩ × ٧٫٤.

٠٣:٣٣

‏نسخة الفيديو النصية

احسب سبعمية وتسعتاشر من ألف في سبعة وأربعة من عشرة.

عندنا عددين عشريين، ومطلوب إننا نجيب حاصل ضربهم. لمَّا نيجي نضرب الأعداد العشرية؛ الخطوة الأولى هنضرب الأعداد بدون الفصلة العشرية. يعني الخطوة الأولى هجيب ناتج سبعمية وتسعتاشر في أربعة وسبعين. أول حاجة هبتدي بضرب الآحاد؛ الأربعة. أربعة في تسعة هيساوي ستة وتلاتين. ولأن مش هينفع أكتب رقمين ستة وتلاتين تحت خانة الآحاد، إذن هكتب الآحاد ستة، وهضيف التلاتة فوق خانة العشرات. بعد كده هضرب أربعة في واحد. أربعة في واحد هيساوي أربعة. زائد تلاتة، اللي كتبناها فوق خانة العشرات، هيساوي سبعة. وبعد كده هضرب الأربعة في السبعة. أربعة في سبعة هيساوي تمنية وعشرين. وبكده هنكون خلَّصنا ضرب الآحاد.

بعد كده هنضرب السبعة. ولأن السبعة دي في خانة العشرات، يعني هي أصلًا سبعين، إذن هضيف صفر قبل عملية الضرب. هنضرب سبعة في تسعة هيساوي تلاتة وستين. هكتب تلاتة، وهضيف ستة فوق خانة العشرات. وبعد كده هنضرب سبعة في واحد هيساوي سبعة. زائد الستة اللي أضفناها هيساوي تلتاشر. هكتب تلاتة، وأضيف واحد فوق خانة المئات. وأخيرًا هضرب سبعة في سبعة هيساوي تسعة وأربعين. زائد واحد يعني هيساوي خمسين.

بعد كده هنجمع ناتج ضرب الآحاد زائد ناتج ضرب العشرات. ستة زائد صفر هيساوي ستة. سبعة زائد تلاتة هيساوي عشرة. هكتب صفر، وأضيف واحد فوق التمنية. واحد زائد تمنية هيساوي تسعة. وتسعة زائد تلاتة هيساوي اتناشر. هكتب اتنين، وأضيف واحد فوق الاتنين. واحد زائد اتنين هيساوي تلاتة. زائد صفر يعني هيساوي تلاتة. وخمسة زائد صفر يعني هيساوي خمسة. ناتج ضرب سبعمية وتسعتاشر في أربعة وسبعين هيساوي تلاتة وخمسين ألف ميتين وستة.

لكن إحنا أصلًا كُنَّا بنضرب سبعمية وتسعتاشر من ألف في سبعة وأربعة من عشرة. يعني لسَّه هنحطّ الفصلة العشرية في ناتج الضرب. الفصلة العشرية في العوامل المضروبة في العدد الأولاني جَت بعد تلات أرقام. وفي العدد التاني جَت بعد رقم واحد. يعني المجموع الفصلة العشرية جَت بعد تلات أرقام زائد رقم، يعني جَت بعد أربع أرقام. إذن في ناتج الضرب الفصلة العشرية هتيجي بعد أربع أرقام من اليمين. هنعدّ: واحد، اتنين، تلاتة، أربعة. يعني هو ده مكان الفصلة العشرية.

وبكده أقدر أقول: إن سبعمية وتسعتاشر من ألف في سبعة وأربعة من عشرة هتساوي خمسة وتلات آلاف ميتين وستة من عشرة آلاف.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.