تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تحويل الوحدات في النظام المتري

أحمد لطفي

يوضح الفيديو طريقة تحويل الوحدات المختلفة في النظام المتري من خلال طريقتين: عملية الضرب، وعملية القسمة.

٠٨:٢٩

‏نسخة الفيديو النصية

هنتكلم عن تحويل الوحدات في النظام المتري، وهنعرف إزاي نقدر نحوّل من وحدة مترية إلى وحدة مترية أخرى في النظام المتري.

في البداية للتحويل من وحدة مترية إلى أخرى في النظام المتري، نضرب في قوى العدد عشرة أو نقسم عليها. هيكون عندنا جدول هنوضح من خلاله إزاي هنقدر نحوّل من وحدة مترية إلى أخرى في النظام المتري، الجدول هيكون بالشكل ده. من الجدول هنِجد إن وحدة الأساس بتكون في خانة الآحاد. ولو عندنا وحدة أخرى ممكن أمثلها في صورة خانة العشرات بالنسبة لوحدة الأساس فهنحط قبل وحدة الأساس كلمة ديكو، ولو كانت الوحدة أقدر أمثلها بخانة المئات فهنحط قبل وحدة الأساس كلمة هكتو، ولو كانت الوحدة أقدر أمثلها بخانة الآلاف فهنحط قبل وحدة الأساس كلمة كيلو، وهكذا.

وهنلاحظ أيضًا إن كل قيمة مكانية بتعادل عشر أمثال القيمة المكانية التي على يمينها. يعني القيمة المكانية لخانة العشرات، اللي هي بنمثلها بكلمة ديكو، هتعادل عشر أمثال القيمة المكانية اللي في خانة الآحاد، اللي هي تعتبر وحدة الأساس. والقيمة المكانية اللي في خانة الجزء من مئات، اللي بنعبّر عنها بكلمة سنتي، هتعادل عشر أمثال القيمة المكانية اللي على يمينها، اللي هي في خانة الجزء من آلاف، وبنعبّر عنها بكلمة مللي.

لو مثلًا عندنا واحد كيلومتر وعايزين نشوف هتساوي كام متر، هنلاحظ إن عندنا كلمة كيلو اتضافِت قبل وحدة الأساس. وبما إن كلمة كيلو بتعبّر عن القيمة المكانية اللي في خانة الآلاف، والقيمة المكانية اللي في خانة الآلاف هتعادل ألف مثل من القيمة المكانية اللي في خانة الآحاد، وبالتالي واحد كيلومتر هتعادل ألف مثل من وحدة الأساس، اللي هي المتر، يبقى واحد كيلومتر هتساوي ألف متر.

لو عايزين نشوف طريقة أسهل أقدر أستخدمها في التحويل بين الوحدات المترية، فنقدر نقول إننا عندنا طريقتين من طرق التحويل بين الوحدات في النظام المتري؛ أول طريقة هي عملية الضرب، ودي بنستخدمها عشان نقدر نحوّل من وحدة إلى وحدة أصغر منها؛ وتاني طريقة هي عملية القسمة، ودي بنستخدمها عشان نحوّل من وحدة إلى وحدة أكبر منها. يعني لو كان عندنا الوحدات المترية المستخدمة لقياس الطول بالشكل ده: كيلومتر، ومتر، وسنتيمتر، وملليمتر. هنلاحظ إن الكيلومتر هي الوحدة الكبرى، والملليمتر هي الوحدة الصغرى.

عشان نحوّل من كيلومتر لمتر، فهنحوّل من وحدة إلى وحدة أصغر منها، فهنستخدم عملية الضرب. وعشان نحوّل من متر لسنتيمتر، هنحوّل من وحدة لوحدة أصغر منها، هنستخدم عملية الضرب. وعشان نحوّل من سنتيمتر لملليمتر، هنحوّل من وحدة لوحدة أصغر منها، هنستخدم عملية الضرب.

وعشان نحوّل من ملليمتر لسنتيمتر، هنحوّل من وحدة لوحدة أكبر منها، فهنستخدم عملية القسمة. وعشان نحوّل من سنتيمتر لمتر، هنحوّل من وحدة لوحدة أكبر منها، هنستخدام عملية القسمة. وعشان نحوّل من متر لكيلومتر، هنحوّل من وحدة لوحدة أكبر منها، فهنستخدم عملية القسمة.

يبقي كده قدرنا نِعرف العملية اللي هنستخدمها عشان نحوّل من وحدة إلى أخرى.

في البداية عشان نحوّل من كيلومتر لمتر، أو من متر لكيلومتر، هنلاحظ إن الكيلومتر هيمثل ألف مثل من المتر؛ وبالتالي عشان نحوّل من كيلومتر لمتر هنضرب في ألف، وعشان نحوّل من متر لكيلومتر هنقسم على ألف.

عشان نحوّل من متر لسنتيمتر، أو من سنتيمتر لمتر، هنلاحظ إن المتر هيمثل مية مثل من السنتيمتر؛ وبالتالي عشان نحوّل من متر لسنتيمتر هنضرب في مية، وعشان نحوّل من سنتيمتر لمتر هنقسم على مية.

وعشان نحوّل من سنتيمتر لملليمتر، أو من ملليمتر لسنتيمتر، هنلاحظ إن السنتيمتر هيمثل عشر أمثال الملليمتر؛ وبالتالي عشان نحوّل من سنتيمتر لملليمتر هنضرب في عشرة، وعشان نحوّل من ملليمتر لسنتيمتر هنقسم على عشرة.

وبالتالي نكون عرفنا إزاي نقدر نحوّل بين وحدات الطول المختلفة في النظام المتري. وباستخدام نفس الطريقة أقدر أحوّل بين الوحدات المختلفة في النظام المتري.

لو مثلًا هناخد مثال، ستة وعشرين سنتيمتر هتساوي نقط ملليمتر. هنقول بما إن واحد سنتيمتر هيساوي عشرة ملليمتر، وبالتالي عشان نحوّل من السنتيمتر للملليمتر يعني، عشان نحوّل من وحدة لوحدة أصغر منها هنستخدم الضرب، يعني هنقول: ستة وعشرين في عشرة هيساوي ميتين وستين، يعني ستة وعشرين سنتيمتر هتساوي ميتين وستين ملليمتر.

لو عايزين نشوف مثال آخر، مية خمسة وتلاتين جرام هيساوي نقط كيلوجرام. هنقول بما إن واحد كيلوجرام بيساوي ألف جرام، يبقى عشان نحوّل من وحدة إلى وحدة أكبر منها هنستخدم القسمة، وبالتالي مية خمسة وتلاتين على ألف هيساوي مية خمسة وتلاتين من ألف، يبقى مية خمسة وتلاتين جرام هيساوي مية خمسة وتلاتين من ألف كيلوجرام.

لو عندنا مثال آخر بالشكل ده، قطع كريم مسافة مية سبعة وستين وتلاتة من عشرة كيلومتر من بيته حتى وصل إلى الفندق، ثم قطع مسافة ألفين متر حتى وصل إلى الشاطئ. فما المسافة بالكيلومترات التي قطعها كريم من بيته حتى وصل إلى الشاطئ؟

عشان نقدر نِوجد المسافة من البيت للشاطئ بالكيلومترات، محتاجين نجمع المسافة من البيت للفندق زائد المسافة من الفندق للشاطئ. لكن في البداية محتاجين نحوّل المسافة من الفندق للشاطئ للكيلومترات. المسافة من الفندق للشاطئ كانت ألفين متر، يبقى محتاجين نحوّل ألفين متر إلى كيلومترات. هنرمز للمسافة من الفندق للشاطئ بالكيلومترات بالرمز س. وبما إن واحد كيلومتر هيساوي ألف متر، يبقى نقدر نستخدم التناسب عشان نقدر نِوجد قيمة س. هيكون عندنا س بالكيلومتر على ألفين متر هيساوي واحد كيلومتر على ألف متر. هنلاحظ من المقام إن العلاقة بين الألف متر والألفين متر إننا ضربنا في اتنين، وبالتالي عشان الكسرين يساووا بعض، يبقى لازم العدد اللي هنضربه في المقام نضربه في البسط، وبالتالي هيكون عندنا البسط مضروب في اتنين؛ يعني س هتساوي واحد كيلومتر في اتنين، يعني س هتساوي اتنين كيلومتر؛ وبالتالي المسافة من الفندق للشاطئ بالكيلومترات هتساوي اتنين كيلومتر.

عشان نِوجد المسافة من البيت للشاطئ، هنجمع المسافة من البيت للفندق بالكيلومترات، زائد المسافة من الفندق للشاطئ بالكيلومترات، يعني هيكون عندنا اتنين كيلومتر، اللي هي المسافة من الفندق للشاطئ، زائد مية سبعة وستين وتلاتة من عشرة كيلومتر، اللي هي المسافة من البيت للفندق، هيساوي مية تسعة وستين وتلاتة من عشرة كيلومتر، وبالتالي نقدر نقول: قطع كريم من البيت إلى الشاطئ مسافة مية تسعة وستين وتلاتة من عشرة كيلومتر.

يبقى في النهاية عرفنا إزاي نقدر نحوّل بين الوحدات في النظام المتري، وعرفنا إننا ممكن نستخدم طريقتين للتحويل بين الوحدات في النظام المتري؛ أول طريقة هي عملية الضرب عشان نحوّل من وحدة إلى وحدة أصغر منها، وتاني طريقة هي عملية القسمة عشان نحوّل من وحدة إلى وحدة أكبر منها.