تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: التمثيل بالأعمدة والمدرج التكراري

أحمد لطفي

يوضح الفيديو تعريف كلٍّ من طريقتَي: التمثيل بالأعمدة والمدرج التكراري، وكيفية استخدام كل طريقة في تمثيل البيانات المختلفة بيانيًّا.

٠٤:٠٧

‏نسخة الفيديو النصية

هنتكلم عن التمثيل بالأعمدة والمدرج التكراري، وهنعرف يعني إيه التمثيل بالأعمدة، ويعني إيه المدرج التكراري، وإزاي هنقدر نستخدم كل طريقة فيهم في تمثيل البيانات المختلفة.

في البداية طريقة التمثيل بالأعمدة هي عبارة عن طريقة بنقارن بيها بين البيانات، باستخدام أعمدة مجسمة، عشان نِقدر نمثّل الكمية، يعني مثلًا لو عايزين نشوف إزاي هنقدر نستخدم طريقة التمثيل بالأعمدة في تمثيل البيانات المختلفة من خلال مثال، فلو عندنا مثال بالشكل ده، مُعطى جدول بيوضح ترتيب خمس فرق من الفرق المشاركة في أمم أفريقيا ألفين وسبعتاشر، حسب الأهداف المسجلة؛ الكاميرون مسجلة سبع أهداف، تونس ست أهداف، مصر خمس أهداف، غانا أربع أهداف، ساحل العاج هدفين. وعايزين نستخدم طريقة التمثيل بالأعمدة عشان نقدر نمثل البيانات المُعطاة.

أول خطوة هنرسم المحور الرأسي والمحور الأفقي، وهيكونوا بالشكل ده. تاني خطوة هنسمّي المحاور، يعني هنختار المحور الرأسي هيكون بيحتوي على عدد الأهداف، والمحور الأفقي هيحتوي على اسم الفريق. تالت خطوة هنقسم المحور الرأسي، وهيكون بالشكل ده. ورابع خطوة هنقسم المحور الأفقي، وهيكون بالشكل ده. آخر خطوة هنمثل عدد الأهداف اللي سجلها كل فريق عن طريق أعمدة مجسَّمة، يعني عند الكاميرون، الكاميرون مسجلة سبع أهداف، وبالتالي هنرسم عمود مجسّم ارتفاعه لحد سبعة، فهيكون بالشكل ده.

وبكده نكون قدرنا نعبّر عن عدد الأهداف اللي سجلتها الكاميرون عن طريق عمود مجسّم ارتفاعه سبعة. تاني فريق هو فريق تونس سجل ست أهداف، فهنرسم عمود مجسّم ارتفاعه لحد ستة، وهنمثل أهداف باقي الفرق بنفس الطريقة، فهيكونوا بالشكل ده. وبكده نكون قدرنا نستخدم طريقة التمثيل بالأعمدة في تمثيل الأهداف المسجلة من خمس فرق من الفرق المشاركة في أمم أفريقيا ألفين وسبعتاشر.

في صفحة جديدة هنشوف نوع خاص من الأعمدة اسمه المدرج التكراري. والمدرج التكراري بيستخدم الأعمدة عشان نمثل تكرار بيانات رقمية بتكون مرتبة في فترات، يعني لو هناخد مثال عشان نوضح إزاي هنقدر نستخدم المدرج التكراري، فهيكون عندنا مثال بالشكل ده، مُعطى جدول بيوضح عدد مرات فوز عشرين فريق بمباريات في كاس العالم على مدار التاريخ، ومطلوب نمثل البيانات باستخدام المدرج التكراري.

في البداية هنرسم المحاور، وهيكونوا بالشكل ده. وهنختار المحاور بحيث إن المحور الرأسي هيمثل التكرار، والمحور الأفقي هيمثل فترات الفوز. وهنقسّم المحاور، وهيكونوا بالشكل ده. أول حاجة عندنا عدد مرات الفوز، لما كان في الفترة من حداشر لعشرين اتكررت اتناشر مرة، يعني هنرسم عمود مجسّم ارتفاعه اتناشر، فهيكون بالشكل ده. وبعدين لما كان عدد مرات الفوز في فترة من واحد وعشرين لتلاتين، التكرار كان أربعة، يعني هنرسم عمود مجسّم ارتفاعه أربعة، فهيكون بالشكل ده. وهنكمل باقي الفترات بنفس الطريقة، فهيكونوا بالشكل ده.

وبكده نكون قدرنا نمثل عدد مرات فوز عشرين فريق بمباريات في كاس العالم على مدار التاريخ، باستخدام طريقة المدرج التكراري.

وفي النهاية نكون عرفنا إيه هي طريقة التمثيل بالأعمدة، وإيه هو النوع الخاص من التمثيل بالأعمدة، وهو طريقة المدرج التكراري، وإزاي نقدر نستخدم كل طريقة فيهم في تمثيل البيانات المختلفة.