فيديو: تحديد كسرين تحت مُعطيات مُعطاة

أوجد كسرين الفرق بينهما ٩/١ ومقام كلٍّ منهما لا يكون ٩. [أ] ١٨/٢، ١٨/١ [ب] ٢٧/١٢، ٢٧/٨ [ج] ١٠/٢، ١٠/١ [د] ٢٩/١٢، ٢٩/١٠ [ﻫ] ٢٧/١١، ٢٧/٨

٠٣:١٤

‏نسخة الفيديو النصية

أوجد كسرين الفرق بينهما واحد على تسعة، ومقام كل منهما لا يكون تسعة.

وعندنا خمس اختيارات، يا ترى الإجابة هتكون أنهي فيهم؟ أول اختيار: اتنين على تمنتاشر، وواحد على تمنتاشر. وتاني اختيار: اتناشر على سبعة وعشرين، وتمنية على سبعة وعشرين. تالت اختيار: اتنين على عشرة، وواحد على عشرة. ورابع اختيار: اتناشر على تسعة وعشرين، وعشرة على تسعة وعشرين. أمّا خامس اختيار: حداشر على سبعة وعشرين، وتمنية على سبعة وعشرين.

وفي المثال ده مطلوب نجيب كسرين، الفرق بينهم هو الكسر واحد على تسعة. وتاني شرط إن يكون الكسرين دول المقام بتاعهم مش العدد تسعة.

وهنبدأ بأول اختيار عندنا، اللي هم الكسرين: اتنين على تمنتاشر، وواحد على تمنتاشر. الكسرين دول بالفعل المقامات بتاعتهم مش العدد تسعة، وده أول شرط. وتاني شرط إنه ناتج طرحهم يساووا الكسر واحد على تسعة. ولو جينا نطرح، هنلاقي إن هم بيساووا واحد على تمنتاشر. بس واحد على تمنتاشر دي الصورة النهائية للكسر، ومش هتتبسّط لأكتر من كده. لأن ما فيش عوامل مشتركة بين البسط والمقام. وبالتالي مش هيكون هو ده الاختيار بتاعنا.

أمّا الكسرين دول، لو جرّبنا نطرحهم، هنكتب في المقام سبعة وعشرين. والبسط، هنطرح اتناشر ناقص تمنية، فهيساووا العدد أربعة. وهيكون ناتج الطرح هو الكسر أربعة على سبعة وعشرين. ونفس الكلام، الكسر ده في الصورة النهائية. لأن ما فيش عامل مشترك بين البسط والمقام عشان نبسّط أكتر من كده. وبالتالي برضو مش هو ده الإجابة.

الكسرين اللي بعد كده: اتنين على عشرة ناقص واحد على عشرة. ناتج طرحهم هو واحد على عشرة. وبرضو مش هو ده الإجابة الصحيحة. لأن واحد على عشرة مش الناتج واحد على تسعة.

الكسرين اتناشر على تسعة وعشرين، وعشرة على تسعة وعشرين، ناتج طرحهم هو الكسر اتنين على تسعة وعشرين. ودي برضو الصورة النهائية للكسر. ومش هو ده الناتج؛ لأنه مش بيساوي واحد على تسعة.

الكسرين حداشر على سبعة وعشرين، وتمنية على سبعة وعشرين، ناتج طرحهم هو الكسر … حداشر ناقص تمنية، تلاتة. والمقام كتبنا سبعة وعشرين. فكان الناتج هو تلاتة على سبعة وعشرين. وهنا لأن البسط والمقام يقبلوا القسمة على العدد تلاتة، فنقدر نبسّط الكسر ده، لكسر تاني مكافئ ليه؛ بإننا نقسم البسط والمقام على نفس العدد. تلاتة على تلاتة يساوي واحد. وسبعة وعشرين على تلاتة يساوي تسعة. وهو ده بالفعل الإجابة المطلوبة.

علشان كده هتكون إجابة السؤال هما الكسرين: حداشر على سبعة وعشرين، وتمنية على سبعة وعشرين. لأنهم حققوا الشرطين. وكان مقام كل منهم مش العدد تسعة. وكمان الفرق بينهم هو الكسر واحد على تسعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.