تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: كتابة الجمل والعبارات اللفظية في صورة مقادير جبرية بسيطة

سوزان فائق

يوضح الفيديو كيفية التعبير عن الجمل والعبارات اللفظية بالعمليات الجبرية، وكيفية كتابتها في صورة مقادير جبرية بسيطة.

٠٦:٣٩

‏نسخة الفيديو النصية

في الفيديو ده هنتكلم عن كتابة الجمل والعبارات اللفظية في صورة مقادير جبرية بسيطة، هنعرف إزاي نعبّر عن الجمل والعبارات اللفظية بعمليات حسابية، ونحطها في شكل صورة مقادير جبرية بسيطة. في بعض الألفاظ وبعض العبارات بتعبّر عن عمليات حسابية؛ يعني لو لقينا كلمة المجموع يبقى قصده إن إحنا بنجمع، الفرق يبقى بنطرح، الأكبر من بنجمَع، والأقل من بنطرح، ولما بيقول كلمة زاد بمقدار يبقى قصده إنه بيجمع على المقدار، ولو قال إن هو بيقل يبقى بيطرح، الإجمالي معناه الجمع، وقل بمقدار أو نقص بمقدار يبقى معناها الطرح، وفي الضرب والقسمة فيه كلمات برضو ألفاظ بتعبر على العمليات الحسابية زي لكل، واقسم، وحاصل الضرب، وخارج القسمة، وضُرِب، وضِعف، ووزّع، وأمثال، وكلمات كتير؛ هنعرف في الفيديو ده إزاي نحول العبارات والألفاظ دي إلى مقادير جبرية بسيطة.

هنشوف مثال، اكتب مع نادر خمسة جنيهات زيادة على ما مع منى على صورة مقدار جبري. هنا الكلمة اللي بتعبر عن العملية الحسابية هي زيادةً على؛ يعني لو عبرنا عن اللي مع منى بـ س يبقى نادر معاه الـ س زائد خمسة اللي هما الزيادة على ما مع منى. يبقى هو ده المقدار الجبري اللي هو في صورة جبرية، اللي هي فيها الزائد أو الناقص أو الضرب أو القسمة.

هناخد مثال كمان، اكتب تعبيرًا رياضيًّا يعبر عن إضافة اتناشر إلى حاصل ضرب س في أربعة. هنا فيه عملية إضافة، وهنا فيه عمليات ضرب، والمتغير هو الـ س؛ يبقى حاصل ضرب الـ س في الأربعة اللي هو أربعة س هنضيف عليهم الاتناشر؛ يعني هنجمع عليهم الاتناشر، يبقى التعبير الرياضي هو أربعة الـ س زائد الاتناشر. هنا قال لنا مباشرةً حاصل الضرب س في أربعة، برضو ممكن يقول لنا أربعة أمثال الـ س، اللي هي بردو الأربعة في الـ س. يبقى التعبير الرياضي هو أربعة س زائد الاتناشر.

هناخد مثال كمان، اكتب مقدارًا يمثل العدد ع مطروحًا منه خمسة وسبعين. مطروحًا منه يبقى ناقص، يبقى الـ ع هنطرح منها الخمسة وسبعين؛ يعني الـ ع ناقص الخمسة والسبعين، يبقى هو ده المقدار المطلوب.

هناخد مثال كمان، اكتب حداشر زيادة على ستاشر مِثلًا لمتغير س على صورة مقدار جبري. هنا الستاشر مِثل هنزود عليها حداشر، الستاشر مِثل معناها إن الستاشر مضروبة في الـ س. يبقى الستاشر في الـ س هنزود عليها حداشر، ونزود عليها يعني عملية جمع، يبقى هو ده المقدار الجبري المطلوب.

هناخد مثال كمان، اكتب مقدارًا يمثل حاصل ضرب مكعب س في الفرق بين العدد ص والعدد تسعة، وحاصل الضرب بالكامل مقسومًا على اتنين. هنا عندنا أكثر من عملية حسابية، يبقى هنا حاصل ضرب مكعب س في الفرق بين، هنا في، وفيه في الفرق، بين العدد س والعدد تسعة، وحاصل الضرب بالكامل مقسومًا على اتنين. يبقى عندنا الـ س هنا هناخد مكعب الـ س والعدد س الفرق بينه والعدد ص، اللي هو ناقص، يبقى حاصل ضرب مكعب س اللي هو س تكعيب حاصل الضرب في العدد ص ناقص تسعة، يبقى هنضرب الـ س تكعيبها في ص ناقص التسعة، وبعد كده حاصل الضرب بالكامل هيبقى مقسوم على اتنين؛ يعني على اتنين، يبقى هو ده المقدار الجبري المطلوب.

عرفنا في الفيديو ده إزاي نكتب الجمل والعبارات اللفظية في صورة مقادير جبرية بسيطة؛ يعني قال لنا اكتب تعبيرًا رياضيًّا، اكتب مقدارًا على صورة مقدار جبري، اكتب مقدارًا، حولْنا الألفاظ إلى عمليات حسابية؛ يعني كلمة إضافة قلنا إنها هتمثل الجمع، حاصل الضرب هتمثل الضرب، وهنا حاصل الضرب بعملية الضرب في الفرق، هنا في الفرق، هنضرب في الفرق اللي هو عملية الطرح اللي هي الناقص، وبعد كده مقسومًا على، اللي هي عملية القسمة، وكمان لما قال لنا حداشر زيادة على ستاشر مِثل؛ يبقى الستاشر مثل؛ يعني هنضرب الستاشر في العدد، اللي هو نستخدم عملية الضرب، وزيادة هنستخدم عملية الجمع، يمثل العدد ع يبقى مطروحًا هنحط مكانها علامة الطرح. يبقي بكده عرفنا إزاي هنحول الجُمل والعبارات اللفظية إلى مقادير جبرية بسيطة.