تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: حساب مساحة المستطيل وتطبيقات عليها

سوزان فائق

يوضح الفيديو مفهوم المساحة، ومساحة المستطيل وكيفية حسابها، وتطبيقات عليها، وكيفية إيجاد القيم المجهولة باستخدام مساحة المستطيل.

٠٤:٤٨

‏نسخة الفيديو النصية

في الفيديو ده هنتكلم على حساب مساحة المستطيل وتطبيقات عليها. هنعرف يعني إيه مساحة، وإزاي نوجدها للمستطيل. وهنعرف إزاي نستخدم المساحة لإيجاد قيمة مجهولة.

المساحة هي قياس المنطقة المحصورة داخل شكل مغلق. ووحدات قياسها هي الوحدات المربعة. يعني لو كان الطول بسنتيمتر، فبتبقى المساحة بسنتيمتر مربع. لو كانت بالمتر، بيبقى المساحة متر مربع. وبالتالي مساحة المستطيل هي قياس المنطقة المحصورة داخله.

المستطيل بيبقى بالشكل ده. وبيبقى ده الطول، وده العرض. مساحة المستطيل هتبقى قياس المنطقة المحصورة بداخله. ودي بنحسبها عن طريق إن الطول نعرف قدّ إيه. يعني لو كان مثلًا ستة سنتيمتر، والعرض تلاتة سنتيمتر. فلو قسّمنا الطول وحدات، زيّ ما إحنا شايفين كده، وحدات عبارة عن وحدات مربعة. طولها وعرضها واحد سنتيمتر. فبيمثّل عدد الوحدات المربعة دي، هو مساحة المستطيل. ده لو قسّمنا المستطيل كله لوحدات مربعة متساوية الطول والعرض. ولو عدّيناهم، هنلاقيهم تمنتاشر مربع؛ وحدة مربعة. يعني ده يمثّل مساحة المستطيل. اللي هو تمنتاشر سنتيمتر مربع. لأن كل وحدة مربعة عبارة عن سنتيمتر في سنتيمتر. يعني كده مساحة المستطيل بتساوي الطول في العرض.

نوضح الكلام ده بمثال تطبيقي. اوجد مساحة طاولة لعبة قطار، على شكل مستطيل. طوله مية أربعة وعشرين سنتيمتر، وعرضه تسعة وتمانين سنتيمتر.

مساحة المستطيل هتساوي الطول في العرض. هنعوّض عن قيمة الطول، اللي هي مية أربعة وعشرين سنتيمتر. وهنضربها في العرض، اللي هو تسعة وتمانين سنتيمتر. يبقى هتطلع المساحة حداشر ألف وستة وتلاتين سنتيمتر مربع. وهي دي قيمة المساحة المطلوبة.

عرفنا إزاي نِوجد مساحة المستطيل. عايزين نعرف، إذا كان عندنا مساحة مستطيل، إزاي نوجد قيمة مجهول. هناخد مثال. مستطيل مساحته تلاتة وخمسين وأربعة وتسعين من مية متر مربع. إذا كان طوله تمنية وسبعة من عشرة متر، فاحسب عرضه.

عارفين إن مساحة المستطيل هتساوي الطول في العرض. مُعطى المساحة، ومُعطى الطول، ومطلوب العرض. يبقى هنعوّض عن كل قيمة معلومة. مساحة المستطيل تلاتة وخمسين وأربعة وتسعين من مية. هتساوي الطول اللي هو تمنية وسبعة من عشرة، في العرض اللي هو قيمته مجهولة. بِقسمة الطرفين على تمنية وسبعة من عشرة، يبقى العرض هيساوي … هنختصر تمنية وسبعة من عشرة مع تمنية وسبعة من عشرة. هتبقى هنا واحد وواحد. يبقى العرض قيمته هتساوي تلاتة وخمسين وأربعة وتسعين من مية، على تمنية وسبعة من عشرة. هتساوي ستة واتنين من عشرة متر. وهو ده طول عرض المستطيل.

ممكن باستخدام قانون مساحة المستطيل يساوي الطول في العرض، نِوجد العرض مباشرةً. بإن إحنا نعيد صياغة القانون. بإن إحنا نقول إن العرض يساوي مساحة المستطيل على الطول. وده بِقسمة طرفَي القانون على الطول. ونِوجد مباشرةً قيمة العرض، بإن إحنا هنساويه بمساحة المستطيل على الطول، اللي هو القيمتين المعلومتين، ونِوجد القيمة المجهولة.

اتكلمنا في الفيديو ده عن حساب مساحة المستطيل وتطبيقات عليها. وعرفنا إن المساحة وحداتها الوحدات المربعة. وإن مساحة المستطيل بتساوي الطول في العرض. وعرفنا إزاي نِوجد العرض بمعلومية مساحة المستطيل وطول المستطيل. وكمان عايزين نعرف إن الطول، ممكن كُنا نعمل معاه زيّ ما عملنا في العرض؛ في إيجاد قيمة العرض. بإن إحنا بدل ما كُنا بنقسم على الطول، هنقسم على العرض.