نسخة الفيديو النصية
تُمارس نور ونهال رياضة الجري. جرت نهال مدة زمنية أكبر من المدة الزمنية التي جرتها نور بمقدار تلاتين دقيقة. إذا جرت نهال أربعين دقيقة، فاكتب معادلة تحدّد المدة الزمنية التي جرتها نور، ثم حلها.
هنرمز للمدة اللي جرتها نور بالرمز س، وبالتالي هتبقى المدة اللي جرتها نهال بتساوي … من المعطيات جرت نهال مدة زمنية أكبر من المدة الزمنية التي جرتها نور بمقدار تلاتين دقيقة، يبقى المدة اللي جرتها نهال هتبقى س زائد تلاتين. وبما إن معطى في السؤال إن نهال جرت أربعين دقيقة، فبالتالي تبقى المعادلة اللي بتتحدّد المدة الزمنية اللي جرتها نور هي: س زائد تلاتين بتساوي أربعين.
عشان نحل المعادلة، محتاجين نوجد قيمة س، اللي هي المدة اللي جرتها نور، فهنخلي س في طرف، والعدد في الطرف التاني. فهنطرح تلاتين من الطرفين، فالمعادلة هتبقى س زائد تلاتين ناقص تلاتين بتساوي أربعين ناقص تلاتين. وبعد إجراء العمليات، س هتساوي عشرة؛ وبالتالي تبقى المدة اللي جرتها نور هي عشر دقايق.
