فيديو: التحويل بين وحدات الكتلة في النظام المتري

يعرض الفيديو وحدات قياس الكتلة في النظام المتري، وكيفية التحويل بينها، مع أمثلة توضيحية.

٠٩:٠٧

‏نسخة الفيديو النصية

هنتعلّم في الفيديو ده إزّاي نقدر نحوّل بين وحدات قياس الكتلة في النظام المتري. الوحدات دي زيّ ما إحنا عارفين: عندنا الطن، الكيلوجرامات، الجرامات، والملليجرامات. هنشوف إزّاي نقدر نحوّل بينهم.

لو حبّينا نتخيّل الواحد ملليجرام ده اللي بنستخدمه لقياس وحدات الكتلة الصغيرة قدّ إيه تقريبًا. هنلاقي إن حباية الرمل الواحدة تقريبًا كتلتها بتبقى أقل شوية من الملليجرام، وممكن تزيد كمان شوية عن الملليجرام. حسب نعومة أو خشونة الرمل اللي قدّامنا. ولو حبّينا نتخيّل الواحد جرام ده بيمثّل كتلة قدّ إيه، هنلاقي إن كتلة مشبك الورق تقريبًا واحد جرام.

ولو حبّينا نعرف الكيلوجرام ده تقريبًا بيمثّل كتلة قدّ إيه. فنقدر نعرف ده من خلال كتلة الكيس بتاع الدقيق اللي بنلاقيه عند المتجر. وبرضو نقدر نتخيّله تقريبًا إنه بيمثّل حوالي أربع خمس تفاحات حجمهم متوسط. أمّا الطن فده وحدة قياس الكتلة الكبيرة زيّ مثلًا سيارة صغيرة. الطن نقدر نقرّبه تقريبًا لكتلة سيارة صغيرة، لو سيارة أكبر شوية بيبقى كتلتها حوالي اتنين طن.

دلوقتي عايزين نشوف العلاقة بين الوحدات دي؛ عشان نقدر نستخدمها في التحويل بينهم. عندنا الواحد جرام بيساوي ألف ملليجرام، والواحد كيلوجرام بيساوي ألف جرام. ونقدر نلخّص العلاقة بينهم على الرسم اللي قدّامنا بالطريقة دي.

الواحد طن بيساوي ألف كيلوجرام، يعني لمّا نحوّل من طن لكيلوجرام هنضرب في ألف. والواحد كيلوجرام بيساوي ألف جرام، يبقى لمّا نحوّل من الكيلوجرام للجرام هنضرب في ألف. والواحد جرام بيساوي ألف ملليجرام، يبقى لمّا نحوّل من الجرام للملليجرام هنضرب في ألف. يبقى كده كل مرة بنحوّل فيها من وحدة منهم، وحدة كبيرة، للوحدة اللي أصغر منها مباشرةً بنضرب في ألف.

العكس لو حبّينا نحوّل من وحدة صغيرة للوحدة اللي أكبر. لو عايزين نحوّل مثلًا من الملليجرام للجرام؛ يعني من الوحدة الصغيرة للوحدة اللي أكبر منها على طول. في الحالة دي إحنا هنقسم مش هنضرب، هنقسم على ألف.

ونفس الطريقة لو حبّينا نحوّل من الجرام للكيلوجرام، هنقسم برضو على ألف. عشان إحنا بنحوّل من وحدة أصغر للوحدة اللي أكبر منها مباشرةً. وهكذا لو حبّينا نحوّل من كيلوجرام لطن هنقسم على ألف. وهنشوف تطبيق على عمليات التحويل دي من خلال مجموعة من الأمثلة.

في المثال ده مذكور عندنا إن كتلة أكبر قطعة من حجر نيزكي، وصل إلى الأرض، كانت مية ستة وتلاتين كيلوجرام. مطلوب منّنا نوجد كتلة القطعة دي بالجرامات.

يعني مطلوب منّنا نشوف الكتلة اللي مقدارها مية ستة وتلاتين كيلوجرام دي بتكافئ قدّ إيه من الجرامات. إحنا دلوقتي عندنا الكيلوجرام الواحد بيساوي ألف جرام. وبما إن الكيلوجرام وحدة أكبر من الجرام، يبقى لمّا نحوّل من الوحدة الكبيرة للوحدة الأصغر هنضرب في ألف.

يعني مية ستة وتلاتين هنضربها في ألف، فهيبقى الناتج مية ستة وتلاتين ألف جرام. يعني قدِرنا نعرف إن كتلة الحجر النيزكي دي هتبقى: مية ستة وتلاتين ألف جرام.

لو عرفنا إن منى خبزت قطعًا من البسكويت؛ كتلة كلٍّ منها تسعة آلاف ملليجرام. مطلوب منّنا نوجد كتلة القطعة الواحدة بالجرامات.

يعني إحنا عايزين نعرف التسعة آلاف ملليجرام دول بيساووا كام جرام. إحنا عارفين إن وحدة الملليجرام أصغر من وحدة الجرام، وإن الواحد جرام بيساوي ألف ملليجرام. يبقى لمّا نحوّل من الوحدة الصغيرة، اللي هي الملليجرام، للوحدة اللي أكبر منها مباشرةً، اللي هي الجرام، هنقسم على ألف. يبقى دلوقتي هنقسم تسعة آلاف على ألف؛ عشان نحوّل من الملليجرام للجرام.

لمّا نيجي نقسم تسعة آلاف على ألف، لمّا بنقسم على العشرة ومضاعفاتها بنحذف عدد متساوي من الأصفار في المقسوم، والمقسوم عليه. فيبقى تسعة على واحد هيساوي تسعة. يبقى دلوقتي وصلنا إن التسعة آلاف ملليجرام هيساووا تسعة جرام. يبقى كده قدِرنا نستنتج كتلة قطعة البسكويت الواحدة بالجرامات هتبقى بتساوي تسعة جرامات. هنشوف دلوقتي مثال آخَر.

في المثال ده بنعرف إن شركة نقل عايزة تحمّل بضاعة كتلتها أربعة آلاف وتلتمية كيلوجرام. لو عرفنا إن الحدّ الأقصى المسموح للشاحنة بحمله هو خمسة أطنان، هل يمكن للشاحنة تحميل هذه البضاعة؟

عشان نقدر نجاوب عَ السؤال ده، عايزين نعرف الخمسة أطنان دول بيكافئوا قدّ إيه بالكيلوجرامات. وبعدين نقارن الكيلوجرامات المسموح ليها بحملها، ونقارن كمية أو كتلة البضاعة المطلوب تحميلها.

يبقى أول حاجة محتاجين نشوف خمسة أطنان دول بيساووا قدّ إيه بالكيلوجرامات. إحنا عارفين إن الواحد طن بيساوي ألف كيلوجرام. يبقى لمّا نيجي نحوّل من الطن للكيلوجرام، يعني مِ الوحدة الكبيرة للوحدة الصغيرة، هنضرب في ألف.

يبقى هنضرب الخمسة في ألف، هيبقى الناتج يساوي خمسة آلاف؛ خمسة آلاف كيلوجرام. والخمسة آلاف كيلوجرام دول هيبقوا بيمثّلوا الحدّ الأقصى المسموح للشاحنة بحمله.

يبقى هنقارن كتلة البضاعة اللي مطلوب منهم تحميلها، اللي هي أربعة آلاف وتلتمية كيلوجرام. هنقارنها بأقصى حمولة مسموح ليها إنها تشيلها، اللي هي خمسة آلاف؛ هنلاقيها أقل من أقصى حمولة. يبقى بالتالي السيارة أو الشاحنة دي تقدر تحمل هذه البضاعة.

طب لو عندنا كتلة بالكيلوجرام، وعايزين نوجد أو نحوّلها لما يناظرها بالملليجرام.

هنحوّل الأول الكيلوجرامات لما يناظرها بالجرامات، وده هيبقى بالضرب في ألف. وبعدين الخطوة اللي بعد كده إن إحنا نحوّل الجرامات دي لما يناظرها بالملليجرامات، برضو بالضرب في ألف. كده هيبقى قدِرنا نحوّل الكتلة اللي معطاة عندنا بالكيلوجرام لما يناظرها بالملليجرام.

طب لو كان عندنا العكس؛ كان عندنا المرة دي كتلة معطاة بالملليجرام، ومطلوب منّنا نحوّلها لما يكافئها بالكيلوجرام. عشان نحوّل من الملليجرام، اللي هي وحدة أصغر بكتير من الكيلوجرام، أكيد هنعمل عملية قسمة. بس الأول هنعملها على مرحلتين.

المرحلة الأولى: هنحوّل الملليجرام لما يكافئوه من الجرامات، وده بيبقى بإننا هنقسم على ألف. عشان لمّا بنحوّل من وحدة صغيرة للوحدة اللي أكبر بنقسم على ألف.

المرحلة التانية: إن إحنا هنحوّل الجرامات لما يكافئها من الكيلوجرامات. برضو باستخدام نفس الطريقة هنقسم على ألف مرة أخرى؛ عشان نحوّل وحدة الجرامات للكيلوجرامات المكافئة.

في المثال اللي عندنا ده مطلوب منّنا نقارن الكتلتين اللي عندنا: تلتاشر كيلوجرام، وتسعة آلاف كيلوجرام [جرام]‎. عايزين نستخدم في المقارنة دي علامة أكبر من، أو أصغر من، أو يساوي.

دلوقتي إحنا هنلاحظ إن الكتل اللي عندنا دي وحدات قياسها مختلفة. الأولى وحدة قياسها الكيلوجرام، والتانية وحدة قياسها الجرام. عشان نقدر نقارن الكتلتين، لازم يبقى ليهم نفس وحدة القياس. فخلّينا نحوّل الكيلوجرام لما يكافئه من جرامات.

إحنا عارفين إن الواحد كيلوجرام بيساوي ألف جرام. يبقى لمّا نيجي نحوّل من الكيلوجرام للجرام هنضرب في ألف، هتطلع بتساوي تلتاشر ألف جرام. يبقى التلتاشر كيلوجرام هيساووا تلتاشر ألف جرام.

دلوقتي نقدر نقارن الكتلتين؛ لأن ليهم نفس وحدة قياس الكتلة اللي هي الجرام. ولو قارنّا تلتاشر ألف وتسعة آلاف، هنلاقي إن التلتاشر ألف أكبر من التسعة آلاف. يبقى نقدر نرجع دلوقتي للمثال الأصلي اللي عندنا، ونقول إن التلتاشر كيلوجرام هتبقى أكبر من تسعة آلاف جرام.

كده عرفنا في الفيديو ده إزّاي بنقدر نحوّل بين وحدات قياس الكتلة في النظام المتري عن طريق معرفة العلاقة بين الوحدات دي. وعرفنا كمان إننا لمّا بنيجي نقارن بين كتلتين وحداتهم مختلفة لازم نحوّلهم الأول لنفس وحدة القياس؛ عشان نقدر نقارن الكتلتين ببعض.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.