تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: كتابة المعادلات المتناسبة التي تتضمن نِسَبًا مئوية وحلها

نادر عاطف

إذا كانت ٦٠٪ من عدد تساوي ٤٨، فماذا تساوي ٨٠٪ من نفس العدد؟

٠٢:٤٥

‏نسخة الفيديو النصية

إذا كانت ستين في المية من عدد تساوي تمنية وأربعين، فماذا تساوي تمانين في المية من نفس العدد؟

يعني معطى عندنا إن ستين في المية من عددٍ ما بيساوي تمنية وأربعين. والمطلوب إننا نعرف تمانين في المية من نفس العدد بتساوي كام. وفي الأول خلينا نرمز للعدد ده بالرمز س. وبما إن ستين في المية من العدد بتساوي تمنية وأربعين، فمعنى كده إن ستين على مية، في س بتساوي تمنية وأربعين. وستين على مية، في س، يعني ستين في المية من العدد. ونقدر نختصر ستين على مية عن طريق إننا نقسم البسط والمقام على عشرة. فهنقسم ستين على عشرة هتبقى ستة، وهنقسم مية على عشرة هتبقى عشرة. فبالتالي هتبقى المعادلة هي ستة على عشرة، في س، بتساوي تمنية وأربعين. فهتبقى المعادلة ستة على عشرة، س، بتساوي تمنية وأربعين.

وعشان نوجد قيمة س يبقى هنضرب طرفَي المعادلة في عشرة. فهيبقى الطرف الأيمن للمعادلة عشرة في ستة س، على عشرة. فهنختصر عشرة مع عشرة فهيتبقّى ستة س. وأمّا الطرف الأيسر للمعادلة، فهنضرب تمنية وأربعين في عشرة، واللي هتساوي ربعمية وتمانين.

بعد كده عشان نوجد قيمة س، يبقى هنقسم طرفَي المعادلة على ستة. فهيبقى الطرف الأيمن ستة س على ستة. فهنختصر ستة مع ستة، فهيتبقّى س. وأمّا الطرف الأيمن للمعادلة، فهنقسم ربعمية وتمانين على ستة. فلمّا نحسبها هتبقى بتساوي تمانين؛ لأن تمنية وأربعين على ستة بتساوي تمنية. فبالتالي ربعمية وتمانين على ستة هتساوي تمانين. وبالتالي هتبقى قيمة س هي تمانين، وهو ده العدد اللي موجود عندنا في السؤال.

لكن المطلوب عندنا في السؤال إننا نعرف ماذا تساوي تمانين في المية من نفس العدد، يعني تمانين في المية من قيمة س. وبما إن العدد هو تمانين، فبالتالي هيبقى تمانين في المية منه بيساوي تمانين على مية، في تمانين، اللي هي تمانين في المية من العدد. فهنعتبر إن العدد تمانين كأنه كسر مقامه واحد، وهنضرب البسط في البسط، والمقام في المقام. فهنيجي عند البسط وهنوجد حاصل ضرب تمانين في تمانين.

وتمانين في تمانين يعني كأننا بنضرب تمنية في تمنية، واللي هتساوي أربعة وستين. وبعد كده هنحطّ الصفرين اللي موجودين هنا، فهيبقى الناتج ست آلاف وربعمية. وأمّا المقام، فهنضرب مية في واحد، واللي هتساوي مية. فهيبقى الناتج هو ست آلاف وربعمية، على مية. ولمّا نحسبها هتبقى بتساوي أربعة وستين. وبالتالي هيبقى تمانين في المية من العدد هي أربعة وستين.