فيديو: كتابة فضاء العينة لتجربة إلقاء عملة معدنية وحجر النرد

أيٌّ ممَّا يلي يُمثِّل فضاء عينة إلقاء عملة معدنية وحجر نرد؟ [أ] ف = {(ص، ١)، (ك، ٢)، (ص، ٣)، (ك، ٤)، (ص، ٥)، (ك، ٦)} [ب] ف = {(ك، ١)، (ص، ٢)، (ك، ٣)، (ص، ٤)، (ك، ٥)، (ص، ٦)} [ج] ف = {(ص، ١)، (ص، ٢)، (ص، ٣)، (ص، ٣)، (ص، ٥)، (ص، ٦)، (ك، ١)، (ك، ٢)، (ك، ٣)، (ك، ٤)، (ك، ٥)، (ك، ٦)} [د] ف = {(ص، ١)، (ص، ٢)، (ص، ٣)، (ص، ٤)، (ص، ٥)، (ص، ٦)، (ك، ١)، (ك، ٢)، (ك، ٣)، (ك، ٤)، (ك، ٥)، (ك، ٦)}

٠٤:٠٦

‏نسخة الفيديو النصية

أيّ مما يلي يمثّل فضاء عينة إلقاء عملة معدنية وحجر نرد؟ ومعطى عندنا الاختيارات؛ أ: ف يساوي المجموعة: ص وواحد، وَ ك واتنين، وَ ص وتلاتة، وَ ك وأربعة، وَ ص وخمسة، وَ ك وستة. ب: ف يساوي المجموعة: ك وواحد، وَ ص واتنين، وَ ك وتلاتة، وَ ص وأربعة، وَ ك وخمسة، وَ ص وستة. ج: ف يساوي المجموعة: ص وواحد، وَ ص واتنين، وَ ص وتلاتة، وَ ص وتلاتة، وَ ص وخمسة، وَ ص وستة، وَ ك وواحد، وَ ك واتنين، وَ ك وتلاتة، وَ ك وأربعة، وَ ك وخمسة، وَ ك وستة. د: ف يساوي المجموعة: ص وواحد، وَ ص واتنين، وَ ص وتلاتة، وَ ص وأربعة، وَ ص وخمسة، وَ ص وستة، وَ ك وواحد، وَ ك واتنين، وَ ك وتلاتة، وَ ك وأربعة، وَ ك وخمسة، وَ ك وستة.

وفي الأول خلينا نفتكر إن فضاء العينة هي مجموعة جميع النتائج الممكنة لتجربة عشوائية. فلو عايزين نكتب فضاء العينة لإلقاء عملة معدنية وحجر نرد، فخلينا في الأول نفتكر إن العملة المعدنية بيبقى ليها وجهان؛ الصورة والكتابة، وبنرمز لها بـ ص وَ ك. فبالتالي هتبقى جميع النتائج اللي ممكن نحصل عليها من إلقاء عملة معدنية هي صورة أوَ كتابة.

وأما حجر النرد فهو عبارة عن مكعب له ستة أوجُه مرقّمة من واحد إلى ستة. فبالتالي هتبقى جميع النتائج اللي ممكن نحصل عليها عند إلقاء حجر نرد، هي واحد، واتنين، وتلاتة، وأربعة، وخمسة، وستة.

طيب لمّا نيجي نكتب فضاء العينة لإلقاء عملة معدنية وحجر نرد، فمعنى كده إننا عايزين نكتب جميع النتائج الممكنة اللي ممكن نحصل عليها، لمّا نلقي العملة المعدنية وحجر النرد همّ الاتنين مع بعض. فمثلًا لو ألقينا العملة المعدنية وحجر النرد في نفس الوقت، ممكن نحصل على صورة في العملة المعدنية، ونحصل على واحد في حجر النرد. وأيضًا ممكن نحصل مثلًا على الكتابة، ونحصل على العدد خمسة على حجر النرد.

فبالتالي لو عايزين نكتب فضاء العينة لإلقاء عملة معدنية وحجر نرد، يبقى هنفرض في الأول إن العملة المعدنية هتدينا وجه الصورة، وهيبقى الصورة مرة مع واحد، ومع اتنين، ومع تلاتة، وأربعة، وخمسة، وستة. فكده يبقى إحنا كتبنا جميع النتائج اللي ممكن نحصل عليها لمّا العملة المعدنية تقع على وجه الصورة.

بعد كده هنكتب جميع النتائج اللي ممكن نحصل عليها لوَ كانت العملة المعدنية ظهر عليها وجه الكتابة. فممكن مرة يظهر وجه الكتابة مع حجر النرد، يظهر العدد واحد، ومرة مع اتنين، وتلاتة، وأربعة، وهكذا.

فبالتالي هيبقى فضاء العينة لإلقاء عملة معدنية وحجر نرد، هي المجموعة ص وواحد؛ يعني هنحصل على الصورة على العملة المعدنية، ونحصل على العدد واحد على حجر النرد؛ وَ ص واتنين يعني صورة والعدد اتنين. وهكذا، ص وتلاتة، ص وأربعة، ص وخمسة، ص وستة.

بعد كده ك وواحد؛ يعني هنحصل على وجه الكتابة على العملة المعدنية، ونحصل على العدد واحد على حجر النرد. وَ ك واتنين، وَ ك وتلاتة، وَ ك وأربعة، وَ ك وخمسة، وَ ك وستة.

فبالتالي هيبقى هو ده فضاء العينة، فلمّا نيجي نشوف الاختيارات اللي عندنا، هنلاحظ إن فيه عندنا اختيارين شبه فضاء العينة اللي إحنا كتبناه، اللي هو الاختيار ج والاختيار د. لكن هنلاحظ في الاختيار ج إن عندنا هنا ص وتلاتة، وَ ص وتلاتة، لكن ما فيش ص وأربعة، موجود بعدها على طول ص وخمسة. فبالتالي هيبقى الاختيار ج اختيار خاطئ.

لكن لو جينا نشوف الاختيار د، هنلاحظ إن فضاء العينة اللي مكتوبة في الاختيار د، هي نفس فضاء العينة اللي إحنا كتبناها. فبالتالي هيبقى الاختيار د هو الاختيار الصحيح؛ لأن هو اللي بيمثّل فضاء عينة إلقاء عملة معدنية وحجر نرد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.