فيديو السؤال: إيجاد احتمال الحصول على عدد زوجي في تجربة إلقاء حجر نرد الرياضيات

إذا ألقي حجر نرد منتظم ذو ستة أوجُه، ما احتمال ظهور عدد زوجي؟

٠١:٤٩

‏نسخة الفيديو النصية

إذا ألقي حجر نرد منتظم ذو ستة أوجُه، ما احتمال ظهور عدد زوجي؟

حجر النرد زي اللي في الشكل اللي قدامنا ده، بيبقى عبارة عن مكعب ليه ستة أوجُه، كل وجه بيحمل رقم من الأرقام من واحد لستة، إحنا مطلوب مننا نوجد احتمال ظهور عدد زوجي؛ يعني لو افترضنا إن الحدث هو ظهور عدد زوجي، يبقى الاحتمال بتاعه هنقدر نحسبه بعدد النواتج المطلوبة دي، على عدد النواتج الممكنة اللي هي كل النواتج الممكنة.

دلوقتي إيه الاحتمالات إن يظهر لنا عدد زوجي؟ لو ظهر العدد اتنين أو أربعة أو ستة، ودول عددهم تلاتة؛ أمّا كل النواتج الممكنة، واللي بنسميها فضاء العينة للتجربة العشوائية اللي عندنا، فهي ظهور أيّ عدد من الأعداد من واحد لستة، اللي هي الأعداد المكتوبة على الوجوه الستة، ودول عددهم ستة؛ يبقي كده نقدر نحسب احتمال ظهور عدد زوجي بإننا نقسم عدد النواتج المطلوبة، يعني عدد النواتج اللي هي بتمثّل فرصة ظهور عدد زوجي، اللي هم تلاتة، يبقى البسط هيبقى التلاتة؛ والمقام عبارة عن عدد النواتج الممكنة، اللي هي عددهم ستة، يبقى المقام هيبقى ستة.

الاحتمال بنكتبه في صورة كسر مكتوب على أبسط صورة. تلاتة على ستة لسه بينهم عامل مشترك في البسط والمقام، يبقى لازم نكتبه في أبسط صورة. بقسمة البسط والمقام على تلاتة، فهيبقى الكسر اللي عندنا واحد على اتنين؛ ويبقى احتمال ظهور عدد زوجي هو واحد على اتنين.

Nagwa uses cookies to ensure you get the best experience on our website. Learn more about our Privacy Policy.