فيديو: إيجاد مساحة معيَّن بمعلومية أبعاده

إذا كان ﺟو = ٢٫٤ سم، ﺏو = ٥ سم، فأوجد مساحة أﺏﺟد لأقرب جزء من مائة.

٠٣:١١

‏نسخة الفيديو النصية

إذا كان ﺟ و يساوي اتنين وأربعة من عشرة سنتيمتر، وَ ب و يساوي خمسة سنتيمتر. فأوجد مساحة أ ب ﺟ د لأقرب جزء من مائة.

ومعطى عندنا الشكل الرباعي ده، أ ب ﺟ د. ومعطى عندنا إن ﺟ و يساوي اتنين وأربعة من عشرة سنتيمتر. ومعطى إن ب و يساوي خمسة سنتيمتر. والمطلوب إننا نوجد مساحة الشكل أ ب ﺟ د لأقرب جزء من مائة. فهنلاحظ من الشكل اللي معطى عندنا، إن أ و يساوي ﺟ و. وهنلاحظ برضو إن عندنا ب و بيساوي د و. فبالتالي هيبقى أ و بيساوي اتنين وأربعة من عشرة سنتيمتر. وفي نفس الوقت هيبقى د و بيساوي ب و، واللي بيساوي خمسة سنتيمتر.

بعد كده هنلاحظ إن القطرين اللي عندنا متعامدين. فبالتالي هيبقى قطرين الشكل الرباعي اللي عندنا متعامدين، وبينصّف كلٌّ منهما الآخر. وخلّينا نفتكر إن دي كانت من خصائص المعيّن. فمعنى كده بما إن القطران متعامدان وينصّف كلّ منهما الآخر. وزيّ ما عرفنا إن دي من خصائص المعيّن. إذن الشكل الرباعي هو شكل معيّن. فيبقى إحنا كده عرفنا إن أ ب ﺟ د هو معيّن؛ لأن القطرين متعامدين، وبينصّف كلّ منهما الآخر. لكن المطلوب في السؤال إننا نوجد مساحة أ ب ﺟ د، يعني عايزين نوجد مساحة المعيّن.

وخلينا نفتكر إن مساحة المعيّن بتساوي نص في حاصل ضرب القطرين. فهتبقى مساحة المعيّن بتساوي نص في … فهنبدأ نشوف القطرين اللي عندنا، فهنشوف القطر الأكبر اللي هو ب د. بما إن عندنا هنا ب و خمسة سنتيمتر، وَ د و خمسة سنتيمتر؛ فبالتالي هيبقى ب د بيساوي عشرة سنتيمتر. فتبقى مساحة المعيّن بتساوي نص في، عشرة في طول القطر الأصغر اللي هو أ ﺟ.

وبما إن معطى عندنا إن ﺟ و بتساوي اتنين وأربعة من عشرة سنتيمتر، وَ أ و اتنين وأربعة من عشرة سنتيمتر. فمعنى كده إن أ ﺟ هتبقى بتساوي اتنين في اتنين وأربعة من عشرة. واللي بتساوي أربعة وتمنية من عشرة. فبالتالي هتبقى مساحة المعيّن بتساوي نص في، عشرة في أربعة وتمنية من عشرة. يعني هتساوي نص في … وهنضرب عشرة في أربعة وتمنية من عشرة، واللي هتساوي تمنية وأربعين. بعد كده هنضرب نص في تمنية وأربعين، فلمّا نحسبها هتبقى بتساوي أربعة وعشرين. وبما إننا بنوجد مساحة، فهتبقى الوحدة هي سنتيمتر مربع؛ سنتيمتر مربع.

لكن المطلوب في السؤال إننا نوجد مساحة أ ب ﺟ د لأقرب جزء من مائة. وبما إننا أوجدنا المساحة، وكانت أربعة وعشرين سنتيمتر مربع. فعلشان نوجدها لأقرب جزء من مائة، يبقى هنكتب الناتج في الصورة دي. فهتبقى المساحة بتساوي أربعة وعشرين وصفرين من مية سنتيمتر مربع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.