فيديو: الطرح من الأعداد ٧ و٨ و٩

يوضح الفيديو طريقة الطرح من الأعداد ٧، ٨، ٩، باستخدام النماذج، مع أمثلة توضيحية.

٠٩:١٦

‏نسخة الفيديو النصية

الطرح من الأعداد: سبعة، أو تمنية، أو تسعة.

هنشوف في الدرس ده إزاي نقدر نطرح من الأعداد: سبعة، أو تمنية، أو تسعة، باستخدام المكعبات. هنبدأ بسبع مكعبات، ونطرح منها بعض المكعبات؛ عشان نشوف ناتج الطرح كام.

أول حاجة هنبدأ نعمل عملية الطرح: سبعة ناقص واحد. ده معناها إن إحنا هننقّص من السبع مكعبات اللي عندنا مكعب واحد. ونبتدي نعدّ المكعبات اللي باقية؛ عشان نشوف ناتج الطرح كام. واحد، اتنين، تلاتة، أربعة، خمسة، ستة. يبقى ناتج الطرح، سبعة ناقص واحد، يساوي ستة.

دلوقتي عايزين نطرح: سبعة ناقص اتنين. يعني معناها هننقّص مكعبين من المكعبات اللي عندنا. ونبتدي نعدّ المكعبات الباقية؛ عشان نشوف الناتج كام. واحد، اتنين، تلاتة، أربعة، خمسة. يبقى سبعة ناقص اتنين، ناتج الطرح بيساوي خمسة.

لو عايزين نحسب: سبعة ناقص تلاتة. يعني نطرح أو ننقّص تلات مكعبات من السبعة اللي عندنا. يبقى هنبتدي ننقّص. واحد، اتنين، تلاتة. نعدّ المكعبات الباقية. واحد، اتنين، تلاتة، أربعة. يبقى سبعة ناقص تلاتة، ناتج الطرح هيبقى أربعة.

بنفس الطريقة لو عايزين نطرح أربعة من السبعة. يعني ننقّص أربع مكعبات من السبعة. هنعدّ المكعبات المتبقية، هنلاقيهم تلات مكعبات. يبقى سبعة ناقص أربعة، يساوي تلاتة.

ولو حبّينا نطرح خمسة من السبعة. يعني ننقّص خمس مكعبات من السبعة اللي عندنا. هنشوف المكعبات المتبقية، هنلاقيهم اتنين. يبقى سبعة ناقص خمسة، الناتج يساوي اتنين.

ولو عايزين نعمل سبعة ناقص ستة. يعني نطرح ست مكعبات من السبعة اللي عندنا. هنعمل ننقّص العدد ستة من السبع مكعبات. ونشوف المكعبات المتبقية، هنلاقي إن متبقي عندنا مكعب واحد بس. يبقى سبعة ناقص ستة، يساوي واحد.

لو عايزين نطرح سبعة ناقص سبعة. معناها إن إحنا هننقّص سبع مكعبات. إحنا كل المكعبات اللي عندنا أصلًا سبعة. فلمّا ننقّص سبعة منهم، مش هيتبقّى ولا مكعب. معناها إن ناتج الطرح في الحالة دي، هيبقى صفر.

هنجيب صفحة جديدة، ونشوف مع بعض الطرح من العدد تمنية.

لو عايزين نعمل جملة الطرح تمنية ناقص واحد. يعني التمن مكعبات اللي عندنا هننقّص منهم واحد. هنعدّ المكعبات المتبقية، هنلاقيها سبعة. يبقى تمنية ناقص واحد، ناتج الطرح ده يساوي سبعة.

ولو عايزين نعمل عملية الطرح تمنية ناقص اتنين. يعني ننقّص مكعبين من السبع مكعبات اللي عندنا. هنشوف المكعبات المتبقية. لمّا نعدّهم هنلاقيهم ست مكعبات.

لو عايزين نعمل تمنية ناقص تلاتة. عملية الطرح هنا هتخلّينا ننقّص تلات مكعبات من التمنية اللي عندنا. واحد، اتنين، تلاتة. لو عدّينا المكعبات المتبقية، هنلاقيها خمس مكعبات. يبقى ناتج الطرح دلوقتي هو خمسة. تمنية ناقص تلاتة، يساوي خمسة.

يبقى العدد اللي في الأول ده، هنفترض إن هو عدد المكعبات الكلي اللي عندنا. والعدد اللي بعد علامة اليساوي [الناقص]‎ ده، هو عدد المكعبات اللي هننقّصها. والناتج هو عدد المكعبات المتبقية. يبقى تمنية ناقص أربعة، معناها إن التمن مكعبات اللي عندنا، هننقّص منهم أربعة. ناتج الطرح هو عبارة عن عدد المكعبات المتبقية. لو عدّينا المكعبات المتبقية، هنلاقيها أربع مكعبات. يبقى ناتج عملية الطرح، تمنية ناقص أربعة، هيساوي أربعة.

بالمثل لو عايزين نعمل عملية الطرح دي: تمنية ناقص خمسة. دي معناها إن التمن مكعبات اللي عندنا، هننقّص منهم خمسة. وهنعدّ المكعبات المتبقية، هنلاقيها تلاتة. يبقى تمنية ناقص خمسة، ناتج الطرح اللي هو المكعبات المتبقية، يساوي تلاتة.

بنفس الطريقة، تمنية ناقص ستة، معناها إن إحنا هننقّص ست مكعبات مِ التمنية اللي عندنا. وهنلاقي إن الباقي لو عدّيناه هو اتنين. يبقى تمنية ناقص ستة، يساوي اتنين.

بنفس الطريقة برضو، تمنية ناقص سبعة، معناها هننقّص سبع مكعبات من التمنية اللي عندنا. فالباقي في الحالة دي هيبقى واحد. يبقى ناتج الطرح بتاع تمنية ناقص سبعة، هيبقى بيساوي واحد.

أمّا عملية الطرح تمنية ناقص تمنية، معناها إن إحنا هننقّص تمن مكعبات من التمنية اللي عندنا. كده مش هيتبقّى ولا مكعب باقي. يبقى في الحالة دي ناتج الطرح بيساوي صفر.

هنجيب صفحة جديدة، ونشوف الطرح من العدد تسعة.

لو عندنا تسع مكعبات، عايزين نطرح منهم واحد. يعني ننقّص مكعب. هنعدّ المكعبات المتبقية؛ عشان نعرف ناتج الطرح كام. واحد، اتنين، تلاتة، أربعة، خمسة، ستة، سبعة، تمنية. يبقى تسعة ناقص واحد، يساوي تمنية. ناتج الطرح هو نفسه الفرق بين العددين. يعني لو قلنا الفرق بين العددين تسعة وواحد كام؟ هنلاقي إن الفرق بينهم هو ناتج الطرح. الفرق بينهم هو التمن مكعبات المتبقية. ولو مطلوب منّنا نجيب الفرق بين عددين، بنطرحهم. وناتج الطرح هو بيبقى نفسه الفرق.

يعني لو عايزين نجيب الفرق بين تسعة واتنين. هي هي إن إحنا بنعمل طرح اتنين من التسعة. يعني بنعمل تسعة ناقص اتنين. كأننا بننقّص مكعبين من التسعة اللي عندنا. ونعدّ المكعبات المتبقية. واحد، اتنين، تلاتة، أربعة، خمسة، ستة، سبعة. يبقى الفرق بينهم هو هو نفسه ناتج الطرح، اللي هو بيساوي سبعة.

بنفس الطريقة لو جينا نشوف الفرق بين العددين، اللي هم تسعة وتلاتة. هنحوّلها لعملية طرح. هنقول تسعة ناقص تلاتة. يعني هننقّص تلات مكعبات من التسعة اللي عندنا. ونعدّ المكعبات المتبقية؛ عشان نعرف ناتج الطرح كام. هو ده نفسه الفرق بينهم، اللي هو في الحالة دي هيساوي ستة.

بنفس الطريقة لو عايزين نعمل عملية الطرح تسعة ناقص أربعة. فمعناها إن إحنا هننقّص أربع مكعبات من المكعبات اللي عندنا. وبعدين نعدّ المكعبات المتبقية، هنلاقي الناتج هو خمسة. يبقى تسعة ناقص أربعة، يساوي خمسة. اللي هو برضو بيمثّل الفرق بين العددين تسعة وأربعة.

لو عايزين نشوف تسعة ناقص خمسة، ناتج عملية الطرح دي يساوي كام. هننقّص خمس مكعبات من التسعة اللي عندنا. ونبتدي نعدّ المكعبات المتبقية، هنلاقي إن هم أربعة. يبقى تسعة ناقص خمسة، يساوي أربعة.

بنفس الطريقة، عايزين نشوف تسعة ناقص ستة هيساوي كام. هنبتدي ننقّص ست مكعبات من التسعة اللي عندنا. ونعدّ المكعبات المتبقية، هنلاقي إن ناتج عملية الطرح هو تلاتة.

وتسعة ناقص سبعة، معناها إن إحنا هننقّص سبع مكعبات من التسعة اللي عندنا. نعدّ المكعبات المتبقية، هنلاقيها اتنين. يبقى تسعة ناقص سبعة، يساوي اتنين.

ولو عايزين نعمل عملية الطرح اللي هي: تسعة ناقص تمنية، معناها هننقّص تمن مكعبات من التسعة اللي عندنا. يبقى ساعتها باقي مكعب واحد بس. يبقى ناتج عملية الطرح دي، يساوي واحد.

أمّا لو جينا ننقّص تسع مكعبات من التسع مكعبات اللي عندنا. يبقى تسعة ناقص تسعة، مش هيتبقّى ولا مكعب. ففي الحالة دي ناتج الطرح هيبقى بيساوي صفر.

اتعرّفنا في الدرس ده على الطرح من الأعداد: سبعة، وتمنية، وتسعة؛ باستخدام المكعبات.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.