فيديو: تطبيق ترتيب العمليات الحسابية في المسائل الرياضية

احسب ٢٩ + ٣ × ٨ − (٢ × ٢).

٠٢:٠٩

‏نسخة الفيديو النصية

احسب تسعة وعشرين زائد تلاتة في تمنية، ناقص بين قوسين اتنين في اتنين.

في المقدار الجبري اللي قدامنا ده، عندنا أكتر من عملية حسابية. عندنا علامة الزائد واللي بتعبر عن عملية الجمع. وعندنا علامة «في» موجودة مرتين، واللي بتعبر عن عملية الضرب. وكمان عندنا علامة الناقص واللي بتعبر عن عملية الطرح.

ودلوقتي يا ترى هنجيب أنهي عملية حسابية الأول؛ علشان نقدر نحسب ناتج المقدار كله. قبل ما نجاوب، لازم نعرف ترتيب تنفيذ العمليات الحسابية اللي عندنا دي.

أول عملية بنبدأ نحسبها هي العملية اللي بين الأقواس. وتاني عملية هي عملية الضرب والقسمة. وتالت عملية هي عملية الجمع والطرح.

فهنرجع للسؤال بتاعنا، وأول عملية هنحسبها هي العملية الموجودة بين الأقواس. فهنضرب دلوقتي اتنين في اتنين، واللي بيساوي أربعة.

وبعد كده هنحسب عملية الضرب والقسمة. وفي المثال ده مش عندنا غير عملية الضرب. فهنحسب دلوقتي حاصل ضرب تلاتة في تمنية، واللي بيساوي العدد أربعة وعشرين.

كده فاضل تالت عملية وهي عملية الجمع والطرح. فهنبدأ تنفيذ العمليتين دول من اليمين للشمال. وهنحسب دلوقتي تسعة وعشرين زائد أربعة وعشرين. تسعة زائد أربعة بيساوي تلتاشر. هنكتب تلاتة في خانة الآحاد، ونضيف واحد لأرقام خانة العشرات. واحد زائد اتنين زائد اتنين بيساوي خمسة.

وبعد كده هنطرح التلاتة وخمسين دي ناقص أربعة. تلاتة ناقص أربعة مش هينفع؛ لأن التلاتة أصغر. فهناخد من الخمسة واحد وهتبقى أربعة، والتلاتة دي هتكون تلتاشر. تلتاشر ناقص أربعة بيساوي تسعة، والأربعة هتنزل. هيساوي العدد تسعة وأربعين. وبالتالي هيكون هو ده قيمة المقدار الجبري اللي عندنا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.