فيديو السؤال: استخدام القيمة المكانية لكتابة الأعداد بالأرقام الرياضيات

اكتب العدد الموضّح في الشكل بالأرقام.

٠٣:٠٣

‏نسخة الفيديو النصية

اكتب العدد الموضّح في الشكل بالأرقام.

الشكل اللي قدامنا بيبيّن مجموعة من الخرزات، اللي بتستخدم للتعبير عن الرقم الموجود في كل خانة مكانية مكتوبة بالأسفل. يعني زي ما نكون بنستخدم عداد.

وأول خانة على اليمين في العداد، عدد الخرزات اللي فيها هتبين الرقم الموجود في خانة الآحاد. لو شُفنا فيه كام خرزة وعديناهم، هنلاقيهم تسعة. فيبقى عندنا كده تسعة في خانة الآحاد. أمّا الخانة اللي بعدها، اللي هي خانة العشرات، ففيها خرزة واحدة فقط. يبقى فيه الرقم واحد في خانة العشرات. أمّا الخانة اللي بعد كده، اللي هي خانة المئات، فهنلاحظ إن فيها خرزتين. ده معناها إن بتمثل الرقم اتنين في خانة المئات.

أما القسم اللي بعد كده، فمتكوّن من تلات خانات. ده قسم الألوف. أول جزء فيه بيبقى الآحاد. اللي بعده يبقى عشرات، يعني عشرات الألوف. واللي بعده بيبقى مئات الألوف. هنلاحظ إن الآحاد في قسم الألوف ما فيهوش أيّ خرز. وده معناه إن فيه الرقم صفر في خانة الألوف. أمّا خانة عشرات الألوف، هنلاقي فيها تسع خرزات. وده معناها إن عشرات الألوف بتحتوي على الرقم تسعة. ولو شُفنا خانة المئات في قسم الألوف، يعني مئات الألوف، هنلاقي ما فيهاش أيّ خرزات. وده معناها إننا هنحطّ هنا الرقم صفر.

القسم اللي بعد كده، اللي هو قسم الملايين، ده بيتقسّم لآحاد وعشرات ومئات. يعني ملايين، وعشرات الملايين، ومئات الملايين. هنبدأ من الملايين، اللي هي الآحاد في قسم الملايين. لو شُفنا عدد الخرزات الموجودة في الخانة دي، هنلاقيها ست خرزات. ده معناها إنها بتمثل الرقم ستة. يبقى في خانة الملايين فيه الرقم ستة في الآحاد. أمّا في خانة عشرات الملايين، فهنلاقي الرقم تلاتة. أمّا في خانة مئات الملايين، فهنلاقي إن فيه أربع خرزات. يعني بنمثل الرقم أربعة.

أمّا القسم اللي بعد كده، اللي هو قسم المليارات، فبيتقسّم برضو إلى آحاد وعشرات ومئات. يعني مليارات، عشرات المليارات، مئات المليارات. أول جزء فيه، اللي هو الآحاد في المليارات، بيحتوي على الرقم تسعة. أمّا خانة عشرات المليارات، ففيها الرقم واحد. وآخر خانة اللي هي خانة مئات المليارات، ففيها الرقم اتنين.

ويبقى هو ده العدد الموضّح في الشكل بالأرقام. ونقدر نقراه بالطريقة دي. بنبدأ القراية من القسم الأكبر، اللي هو هنا المليارات. ميتين وتسعتاشر مليار، وبعدين ربعمية ستة وتلاتين مليون، تسعين ألف ميتين وتسعتاشر.

Nagwa uses cookies to ensure you get the best experience on our website. Learn more about our Privacy Policy.