فيديو: ترتيب الأعداد المُعطاة

رتِّب الأعداد الآتية ترتيبًا تصاعديًّا: ١٧٣‎٦٢١‎٤٠٠، ٣١١‎٨٧٢‎٩٣٣، ٩٢٣‎٤٤٦‎٦٢٥، ٧٠٤‎٠٤٩‎٤٠٧.

٠٤:٤٠

‏نسخة الفيديو النصية

رتب الأعداد الآتية ترتيبًا تصاعديًّا. مية تلاتة وسبعين مليون، ستمية واحد وعشرين ألف، وربعمية. تلتمية وحداشر مليون، تمنمية اتنين وسبعين ألف، وتسعمية تلاتة وتلاتين. تسعمية تلاتة وعشرين مليون، وربعمية ستة وأربعين ألف، وستمية خمسة وعشرين. سبعمية وأربعة مليون، تسعة وأربعين ألف، وربعمية وسبعة.

هنلاحظ إن الأربع أعداد اللي عندنا، بيتكوّن كل عدد منهم من تسع أرقام. فهنستخدم جدول القيم المكانية، اللي هنخلّيه بيتكوّن من تسع خانات مكانية. عشان نحطّ فيه مجموعة الأعداد اللي عندنا. ونشوف إزاي هنقدر نرتبهم باستخدام جدول القيم المكانية.

رسمنا جدول القيم المكانية. بيتكوّن، زيّ ما قُلنا، من تسع خانات مكانية. كل تلات خانات منهم، بيمثّلوا أحد أقسام العدد. فأول قسم عندنا، قسم الوحدات. ده بيحتوي على خانة الآحاد، والعشرات، والمئات. القسم اللي بعده، اللي هو قسم الألوف. بيحتوي على خانة الألوف، وعشرات الألوف، ومئات الألوف. والقسم اللي بعد كده قسم الملايين. فده بيحتوي على خانة الملايين، وعشرات الملايين، ومئات الملايين.

هنكتب الأعداد الأربعة اللي عندنا. بحيث إن كل رقم من الأرقام اللي بتتكوّن منها الأعداد دي، يكون في الخانة المكانية الصحيحة. وإحنا مطلوب منّنا في السؤال إننا نرتّب الأعداد دي ترتيبًا تصاعديًّا. نفتكر إن تصاعديًّا دي، زيّ صعود السلم. بنبدأ من الصغير للكبير. زيّ ما بنبدأ من الدرجة الأقل، إلى الدرجة الأعلى. يبقى ترتيب تصاعدي، يعني هنبدأ بالعدد الأصغر.

لمّا بنيجي نقارن بين مجموعة من الأعداد، دايمًا بنبدأ المقارنة من الخانة المكانية الأكبر. اللي هي هنا خانة مئات الملايين. هنبدأ نشوف الأرقام اللي في الخانة دي، وعايزين نشوف أيّ الأرقام دي هو الأصغر. عندنا أول رقم، اللي هو واحد. لمّا نقارنه بالرقم اللي بعده، اللي هو تلاتة. هنلاقي إن الواحد هو الأصغر. طب هنيجي نقارنه بالرقم اللي بعد كده، اللي هو تسعة. فهيظل الواحد هو الأصغر.

بعد كده هنقارنه بالرقم اللي باقي، اللي هو سبعة. هنلاقي إن واحد برضو هو اللي أصغر. يعني كده إحنا وصلنا إن في خانة مئات الملايين، أقل رقم موجود هو الواحد. وبالتالي فالعدد الأول، اللي بيحتوي على الرقم واحد في خانة مئات الملايين، هو ده أصغر عدد من مجموعة الأعداد اللي عندنا. وبالتالي هيكون أول عدد في الترتيب اللي بنعمله. مية تلاتة وسبعين مليون، ستمية واحد وعشرين ألف، وربعمية.

دلوقتي هنستبعد أول عدد، ونكمّل المقارنة بين التلات أعداد المتبقية. من نفس الخانة المكانية، اللي هي مئات الملايين، هنبتدي نقارن الأرقام اللي موجودة في الخانة دي. هنقارن أول رقم هنا، اللي هو التلاتة. بالرقم اللي بعده، اللي هو تسعة. هنلاقي إن تلاتة أقل من تسعة. هنقارنه بعد كده بالرقم اللي بعد كده، اللي هو السبعة. هنلاقي إن برضو تلاتة أقل من السبعة. يبقى كده تلاتة هو أقل رقم، بين الأرقام التلاتة اللي موجودين.

يبقى العدد اللي بيحتوي على الرقم ده، هو ده أقل عدد في التلات أعداد المتبقية. ويبقى العدد التالي عندنا في الترتيب، هو تلتمية وحداشر مليون، تمنمية اتنين وسبعين ألف، وتسعمية تلاتة وتلاتين. هنستبعد العدد ده كمان، وهيبقى باقي عندنا عددين عايزين نقارن ما بينهم.

من نفس الخانة المكانية، هنقارن الرقمين اللي موجودين فيها. عندنا الرقم تسعة، وعندنا الرقم سبعة؛ يا تري أيهم أصغر؟ طبعًا الرقم سبعة أقل من الرقم تسعة. وده معناه إن العدد اللي بيحتوي على الرقم ده، اللي هو سبعة، هو العدد الأقل. وهو التالي عندنا في الترتيب. فيبقى العدد اللي عليه الدور، هو سبعمية وأربعة مليون، تسعة وأربعين ألف، وربعمية وسبعة.

وبعد استبعاد العدد ده كمان، فما بقاش باقي غير عدد واحد بس. وطبعًا طبيعي إنه هيبقى آخر عدد في الترتيب اللي عندنا. لأنه هيبقى أكبر عدد فيهم. وكده آخر عدد عندنا في الترتيب، هيبقى تسعمية تلاتة وعشرين مليون، ربعمية ستة وأربعين ألف، وستمية خمسة وعشرين. وبكده يبقى عرفنا نرتّب الأعداد اللي معطاة عندنا في السؤال ترتيبًا تصاعديًّا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.