فيديو الدرس: عرض البيانات بالتمثيل البياني بالصور الرياضيات

يوضح الفيديو كيفية تمثيل مجموعة من البيانات باستخدام الصور أو الرموز، وكيفية فهم هذه البيانات الممثلة وتحليلها.

٠٧:٣٥

‏نسخة الفيديو النصية

عرض البيانات بالتمثيل البياني بالصور. عندنا شوية بيانات هنتعلم إزاي نعرضها عن طريق الصور. سارة بتحب تجمع صور لحيوانات كتير؛ زي الدب، والقطة، والكلب، وكمان السلحفة؛ فعملت جدول توضح فيه هي معاها كام صورة لكل حيوان، فنظمت البيانات أو المعلومات بتاعتها في جدول العلامات الإحصائية. جدول العلامات الإحصائية هو جدول بيعرض البيانات في صورة علامات، إحنا هناخد نفس البيانات دي، وبدل ما نعرضها في صورة علامات بالشكل ده، هنعرضها في صورة صوَر، أو رموز، إزاي؟ هنكتب البيانات على جنب علشان نمثلها بالصور، وهنرسم الجدول، بنرسم مستطيل بالشكل ده، بعدين نقسمه كده ونكتب فوق العنوان، يعني الجدول ده بيعرض بيانات إيه، فكتبنا إنه بيعرض صور الحيوانات، بعدين نكتب اسم كل حيوان، بعد ما نقسم الجدول كده.

ودلوقتي إحنا اتفقنا إننا هنمثل البيانات دي في صورة، فهنختار صورة أو رمز تعبر عن البيانات دي، مش لازم تكون صورة معينة، ممكن نستخدم أي صورة إحنا عاوزينها، بس قبل ما نستخدمها بنحدد الأول هي بتدل على إيه؛ هنا مثلًا إحنا هنستخدم كورة لونها أحمر علشان نمثل بيها، فهنزوّد خانة في الجدول تحت، ونقول فيها الكرة دي بتدل على إيه، الخانة دي هنكتب فيها المفتاح، ونقطتين فوق بعض، بعدين الرمز اللي هنستخدمه اللي هو الكورة، وبعديها علامة يساوي، وبعدين نشوف هنعملها بإيه.

هنا ممكن نخلي كل كورة بتمثل صورتين أو بتعبر عن صورتين، فهنقول الكورة تساوي صورتين، ونبدأ نملا الجدول بالصورة اللي إحنا استخدمناها، اللي هي الكورة، فهنروح على أول خانة اللي فيها الدب. الدب له ست صور. لو الكورة الواحدة بصورتين، يبقى الدب معاه تلات كور. ولو روحنا للقطّة هنلاقي ليها أربع صور، يعني كرتين. والكلب سبع صور، سبع صور عدد فردي، يعني هيكون فيه نص كورة زيادة، لو شِلْنا من السبعة واحد هيبقى ستة، ست صور، يعني تلات كور. والصورة الباقية بـ نص كورة، يبقى عند الكلب تلات كور ونص.

أما بالنسبة للسلحفة فليها صورتين، والكورة بتساوي صورتين، يبقى السلحفة ليها كورة واحدة. وبكده نكون مثلنا البيانات بالصور.

فالتمثيل البياني بالصور هو نوع من أنواع التمثيلات البيانية، بيقارن بين البيانات عن طريق استخدام صور، يعني من الجدول ده، وبمجرد النظر، نقدر نقول إن الكلب ليه أكبر عدد من الصور، والسلحفة ليها أقل عدد من الصور؛ فالهدف منه هو تسهيل تحليل البيانات وتفسيرها.

وهناخد مثال أخير بيعرض جدول بيانات ممثلة بالصور ونجاوب على أسئلة فيه. عندنا جدول بيوضح تمثيل بياني للصور لعدد من الرسائل اللي أرسلتها مجموعة من الأولاد على مدار خمس أيام، ومفتاح التمثيل بيقول لنا إن صورة الرسالة الواحدة بتدل على تلات رسايل. هنستخدم الجدول ونجاوب على الأسئلة اللي عليه؛ السؤال الأول: كم عدد الرسائل اللي اتبعتت في يوم الإثنين؟ لو بصينا على يوم الإثنين هنلاقي فيه تلات صور لرسائل، وإحنا قلنا إن الصورة الواحدة بتساوي تلات رسائل؛ يبقى تلاتة زائد تلاتة زائد تلاتة يساوي تسعة، يبقى الإجابة تسع رسائل في يوم الإثنين.

السؤال رقم اتنين: في أي يوم بعت الأولاد أكبر عدد من الرسائل؟ بمجرد النظر هنلاحظ إن يوم الخميس هو فيه أكتر عدد من الصور؛ وبالتالي يوم الخميس هيكون فيه أكتر عدد من الرسائل المبعوتة، يبقى الإجابة يوم الخميس.

السؤال التالت: في أي يوم بعت الأولاد أقل عدد من الرسائل؟ هنلاحظ إن في يوم التلات وفي يوم الأربع أقل عدد من الصور، كل يوم ما فيهوش غير صورة واحدة، اللي هي بتساوي تلات رسايل، فهنقول إن يوم التلات ويوم الأربع هما أقل يومين في عدد الرسائل المبعوتة، هنكتب يوم الثلاثاء ويوم الأربعاء.

السؤال رقم أربعة والأخير: كم عدد الرسائل كلها اللي اتبعتت على مدار الخمس أيام من الحد للخميس؟ هنعدّ الصور في الأيام كلها ونشوف كام صورة، واحد اتنين تلاتة أربعة خمسة ستة سبعة تمنية تسعة عشرة حداشر؛ يبقى على مدار الخمس أيام كلهم اتبعت حداشر رسالة. يبقى إحنا عندنا حداشر صورة، والصورة الواحدة بتمثل تلات رسائل، يبقى العدد الكلي للرسائل حداشر في تلاتة يساوي تلاتة وتلاتين رسالة.

وبكده نكون عرفنا إزاي نمثل مجموعة بيانات بالصور، وبكده نكون عرفنا إزاي نمثل مجموعة بيانات بصورة أو رمز، وإزاي نرسم الجدول اللي بنمثل فيه البيانات دي، وكمان عرفنا إزاي نفسر ونحلل البيانات دي من خلال الجدول، ونجاوب على أي سؤال ليه علاقة بالتمثيل البياني بالصور.

Nagwa uses cookies to ensure you get the best experience on our website. Learn more about our Privacy Policy.