فيديو الدرس: إيجاد مساحة أشكال مختلفة باستخدام مربعات الوحدة | نجوى فيديو الدرس: إيجاد مساحة أشكال مختلفة باستخدام مربعات الوحدة | نجوى

فيديو الدرس: إيجاد مساحة أشكال مختلفة باستخدام مربعات الوحدة الرياضيات

يوضح الفيديو مفهوم المساحة، وكيفية إيجاد مساحة الشكل باستخدام مربعات الوحدة، مع أمثلة توضيحية.

٠٦:٥٣

نسخة الفيديو النصية

في الفيديو ده هنعرف إيه هي المساحة، وإزاي نقدر نوجدها باستخدام مربعات الوحدة، وهنحل بعض الأمثلة المختلفة. وخلينا في الأول نشوف إيه هي المساحة.

في حصة التربية الفنية رسمت داليا أشكال على ورقة رسم بياني. وكان من ضمن الأشكال الشكل اللي قدامنا في الصورة ده. وعايزين نعرف مساحة الشكل اللي قدامنا. ففي الأول خلينا نعرف إيه هي المساحة.

المساحة هي عدد الوحدات المربعة اللازمة لتغطية شكل ما من غير تداخل. والوحدات المربعة هي المربعات اللي قدامنا في الشكل ده. فكل مربع منهم بنسميه وحدة مربعة. فمعنى كده إننا عشان نوجد مساحة أي شكل، بنعدّ الوحدات المربعة اللي داخل الشكل.

فلو جينا نشوف الشكل اللي عندنا، فإحنا دلوقتي عايزين نعرف مساحة الشكل اللي رسمته داليا. وزي ما قلنا إن المساحة هي عدد الوحدات المربعة. يبقى هنبدأ نعدّ الوحدات المربعة اللي داخل الشكل. لكن هنلاحظ في الشكل اللي عندنا إن فيه مربعات كاملة، وفيه مربعات مش كاملة.

فأول حاجة هنبدأ نعدّ المربعات الكاملة. فلمّا نعدّ المربعات الكاملة، هنلاحظ إن هي أربعتاشر مربع كامل. بعد كده هنلاحظ إن فيه عندنا هنا نُص مربع مش مربع كامل. وفيه هنا برضو نُص مربع. فمعنى كده إن الشكل اللي عندنا بيتكون من أربعتاشر مربع كامل، زائد نصين مربع. وبنلاحظ إن نصين المربع لو حطيناهم جنب بعض بيكونوا لنا مربع كامل، اللي هو باللون الأسود.

فمعنى كده إن الشكل اللي عندنا بيتكون من أربعتاشر وحدة مربعة زائد نصين المربع، واللي قلنا النصين مع بعض بيكوّنوا مربع كامل. فمعنى كده إن هيبقى أربعتاشر وحدة مربعة زائد وحدة مربعة اللي همّ نصين المربع. فلمّا نجمعهم يبقى هيساوي أربعتاشر وحدة مربعة زائد وحدة مربعة بيساوي خمستاشر وحدة مربعة. وبالتالي هيبقى مساحة الشكل هي خمستاشر وحدة مربعة.

نشوف مثال آخر: أوجد مساحة الشكل المجاور.

وعندنا الشكل اللي في الصورة ده. فزي ما قلنا عشان نوجد مساحة الشكل، بنشوف عدد الوحدات المربعة اللي داخل الشكل. فهنبدأ نعدّ المربعات الكاملة، فهيبقى عندنا: واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر. فبما إن الشكل عندنا بيتكوّن من حداشر مربع كامل. فبالتالي هيبقى مساحة الشكل اللي عندنا بتساوي حداشر وحدة مربعة.

ونشوف مثال آخر: أوجد مساحة الشكل المجاور.

ومُعطى عندنا الشكل اللي في الصورة. فزي ما قلنا علشان نوجد مساحة الشكل، بنشوف عدد الوحدات المربعة. وهنبدأ الأول بأننا نعدّ المربعات الكاملة اللي في الشكل. فلمّا نيجي نشوف المربعات الكاملة، هنلاحظ إننا عندنا: واحد، اتنين، تلاتة، أربعة. يعني عندنا أربع مربعات كاملة.

طيب لمّا نيجي نشوف باقي أجزاء الشكل، هنلاحظ إننا عندنا الجزء ده، والجزء ده، والجزء ده، والجزء ده. فهنلاحظ إن كل جزء منهم هو عبارة عن نُص مربع. وزي ما قلنا قبل كده إن كل نصين من مربع بيكوّنوا مربع كامل. فمعنى كده إن هيبقى عندنا الجزء ده مع الجزء ده، همّ الاتنين بيدونا مربع كامل. ونفس الموضوع هنا الجزء ده اللي هو نُص المربع ده ونُص المربع ده، همّ الاتنين هيدونا مربع كامل. طيب بعد كده لمّا نيجي نعدّ عدد الوحدات المربعة، هنلاحظ إن عندنا هنا زي ما قلنا أربع وحدات مربعة اللي هي المربعات الكاملة. زائد الجزئين دول، اللي زي ما قلنا إن همّ الاتنين مع بعض بيكوّنوا وحدة مربعة. ونفس الموضوع في الجزئين دول، همّ الاتنين مع بعض بيكوّنوا وحدة مربعة.

فمعنى كده إن هيبقى عندنا أربع وحدات مربعة، زائد وحدتين مربعتين. فأربعة زائد اتنين بيساوي ستة. فبالتالي هيبقى مساحة الشكل بتساوي ست وحدات مربعة.

وخلينا نشوف آخر مثال عندنا: غُطِّيَ الإطار المجاور بمربعات من الزجاج الملون. أوجد مساحة هذا الإطار.

ومعطى عندنا الإطار اللي في الشكل ده. وعشان نوجد مساحة الإطار يبقى لازم نحدد عدد الوحدات المربعة اللي داخل الإطار. وناخد بالنا هنا إننا لمّا نيجي نعدّ عدد الوحدات المربعة، مش هنعدّ المربعات اللي بداخل الإطار الخارجي فقط. يعني مش هنعدّ المربعات اللي جوه الشكل ده كله. إحنا هنعدّ الوحدات المربعة اللي في الإطار بس، اللي هو الجزء المظلَّل باللون البنفسجي. يعني هنعدّ المربعات اللي في الجزء الداخلي بس، اللي هو ما بين السهمين دول.

فلمّا نيجي نشوف عدد الوحدات المربعة، هنبدأ نعدّ فهيبقى: واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر، تلتاشر، أربعتاشر، خمستاشر، ستاشر، سبعتاشر، تمنتاشر. فبما إننا عندنا تمنتاشر مربع كامل أو تمنتاشر وحدة مربعة. فبالتالي هيبقى مساحة الإطار بتساوي تمنتاشر وحدة مربعة.

وبكده نكون عرفنا إيه هي المساحة، وإزاي نقدر نوجدها باستخدام مربعات الوحدة. وحلينا بعض الأمثلة المختلفة.

انضم إلى نجوى كلاسيز

شارك في الحصص المباشرة على نجوى كلاسيز وحقق التميز الدراسي بإرشاد وتوجيه من معلم خبير!

  • حصص تفاعلية
  • دردشة ورسائل
  • أسئلة امتحانات واقعية

تستخدم «نجوى» ملفات تعريف الارتباط لضمان حصولك على أفضل تجربة على موقعنا. اعرف المزيد عن سياسة الخصوصية