فيديو: استخدام ترتيب العمليات لإيجاد قيم التعبيرات العددية التي تتضمَّن أسسًا

احسب الآتي: ٥٦ ÷ (٥ + ٣) + ٢^٢.

٠١:٤٧

‏نسخة الفيديو النصية

احسب الآتي: ستة وخمسين على، خمسة زائد تلاتة، زائد اتنين أُس اتنين.

يعني مُعطى عندنا المقدار ده وعايزين نوجد قيمته. فهنلاحظ إن عندنا في المقدار فيه عندنا أقواس، وعندنا عملية قسمة وعمليات جمع، وعندنا عدد مرفوع لأس. وفي الأول خلّينا نفتكر ترتيب العمليات؛ فأول حاجة عندنا في ترتيب العمليات إننا بنحلّ الأقواس، بعد كده الأسس، بعد كده عمليات الضرب والقسمة، وآخر حاجة عمليات الجمع والطرح.

فأول حاجة هنعملها إننا هنحلّ ما بداخل الأقواس؛ يعني هنوجد قيمة ما بداخل الأقواس هنا. وهيبقى المقدار بيساوي ستة وخمسين على … وهنحسب ما بداخل الأقواس اللي هو خمسة زائد تلاتة، فلمّا نجمعها هيبقى بيساوي تمنية، زائد اتنين أس اتنين. فيبقى إحنا كده عملنا أول خطوة، اللي هي حلّينا ما بداخل الأقواس.

بعد كده هيبقى عندنا الأسس، فهنبدأ نوجد قيمة العدد المرفوع لأس، فيبقى المقدار بيساوي ستة وخمسين على تمنية، زائد اتنين أس اتنين. واتنين أس اتنين معناها اتنين في اتنين، واللي بتساوي أربعة. فكده يبقى إحنا عملنا تاني خطوة اللي هي الأسس.

بعد كده عمليات الضرب والقسمة؛ في المقدار عندنا هنلاحظ إن بقى عندنا عملية قسمة وعملية جمع، وزي ما عرفنا من ترتيب العمليات إننا الأول بنبدأ بعمليات الضرب والقسمة. يعني في الأول هنحسب ستة وخمسين على تمنية وهنوجد قيمتها. فلمّا هنقسم ستة وخمسين على تمنية هتبقى بتساوي سبعة؛ فيبقى المقدار هو سبعة زائد أربعة. وكده يبقى إحنا عملنا عملية القسمة.

آخر حاجة عندنا هي الجمع والطرح، فهنجمع سبعة زائد أربعة حداشر؛ وبالتالي هيبقى قيمة المقدار هي حداشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.