فيديو: حل المسائل الكلامية التي تتضمَّن قسمة الأعداد المكوَّنة من عدة أرقام

اشترى شخص سيارة بمبلغ ٨٠٨٢٩ جنيهًا، يُدفع المبلغ على ٩ أقساط متساوية. ما قيمة كل قسط؟

٠٨:٤٨

‏نسخة الفيديو النصية

اشترى شخص سيارة بمبلغ تمنين ألف تمنمية تسعة وعشرين جنيهًا. يُدفع المبلغ على تسع أقساط متساوية. ما قيمة كل قسط؟

السؤال بيقول لنا إن فيه واحد اشترى عربية. اشتراها بكام؟ بتمنين ألف تمنمية تسعة وعشرين جنيه بالظبط. قسّط تمنها، قسّط تمنها على تسع أقساط. يعني دفع المبلغ ده على تسع مرات. عاوزين نعرف لو هو دفع المبلغ ده على تسع مرات، يبقى كل قسط كان بكام جنيه. يعني التمنين ألف تمنمية تسعة وعشرين جنيه دول، لمّا اتقسّموا على التسع أقساط دول. واحد، اتنين، تلاتة، أربعة، خمسة، ستة، سبعة، تمنية، تسعة. قيمة القسط الواحد كانت كام؟ يبقى اللي هنعمله إننا هنقسّم أو هنجزّأ المبلغ بتاعنا ده، اللي هو تمنين ألف تمنمية تسعة وعشرين، على تسع أجزاء. فهنستخدم عملية القسمة، ومنها هنعرف قيمة الجزء الواحد أو القسط الواحد كانت بكام جنيه.

أول حاجة هنعملها هي علامة القسمة؛ بالشكل ده. هنحطّ هنا المقسوم، تمنين ألف تمنمية تسعة وعشرين. وهنا المقسوم عليه، اللي هو التسعة. بعدين هنبدأ نقسم. قبل ما نقسم هنبصّ على التمنين ألف تمنمية تسعة وعشرين، عندنا فيها إيه؟ آحاد، عشرات، مئات، ألوف، عشرات الألوف. يبقى الخطوة الأولى هي قسمة عشرات الألوف؛ لأننا بنبدأ من أكبر رقم، أو من الشمال. فهنحاول نقسم التمنية على التسعة. لو جينا نقسم التمنية على التسعة، مش هينفع؛ لأن التمنية أصغر من التسعة. ففي الحالة دي بنعمل إيه؟ بننتقل للخانة اللي بعدها، وهي خانة الألوف.

فبعد ما فشلنا في إننا نقسم عشرات الألوف؛ لأنها كانت أصغر من التسعة، هنبدأ في قسمة الألوف. يعني هناخد الصفر مع التمنية، وهتكون تمانين. طيّب هو إحنا ينفع نقسم تمانين على التسعة؟ أيوه طبعًا. تمانين على التسعة هينفع، وهيكون ليها ناتج؛ لأن التمانين أكبر من التسعة. طيّب يعني إيه تمانين على التسعة؟ يعني هنقعد نفكّر نفكّر، ونشوف التمانين فيها كام تسعة. أو إيه العدد اللي لمّا نضربه في تسعة، الناتج هيكون تمانين أو حاجة قريبة منها؟

التسعة في تمنية بتساوي اتنين وسبعين. والتسعة في تسعة بتساوي واحد وتمانين. وإحنا العدد بتاعنا تمانين. هنلاقي إن التمانين محصورة ما بين الاتنين وسبعين، والواحد وتمانين؛ فما ينفعش إننا ناخد عدد أكبر من التمانين. فده معناه اللي إحنا هنقول على الواحد وتمانين لأة. فناخد اللي قبلها على طول. اللي هي إيه؟ اللي هي الاتنين وسبعين. طيّب هو التسعة في كام باتنين وسبعين؟ الـتسعة في تمنية. فده معناه إيه؟ معناه إننا هناخد الـتمنية، ونكتبها فوق الـصفر؛ فوق خانة الألوف. طيّب وبعدين نعمل إيه؟ نضرب التمنية في تسعة. إحنا قلنا التمنية في تسعة بكام؟ باتنين وسبعين.

بعدين نجري عملية الطرح، أو نطرح التمانين ناقص الاتنين وسبعين. تمانين ناقص اتنين وسبعين، يتبقّى لنا تمنية. عرفتم ليه بقى خدنا الاتنين وسبعين، وما خدناش الواحد وتمانين؟ علشان نعرف نطرح؛ لأننا لو خدنا الواحد وتمانين، مش هنعرف نطرحها مِ التمانين؛ لأنها أكبر منها. فعشان كده بناخد الأصغر مش الأكبر.

طيّب دلوقتي إحنا خلاص طرحنا تمانين ناقص اتنين وسبعين، والناتج بقى تمنية. نمسك بقى التمنية دي، ونحاول نقسمها على التسعة. ينفع نقسم التمنية على التسعة؟ أكيد لأة، طيّب نعمل إيه بقى؟ هنبدأ ننزّل الأعداد دي؛ تمنية، والاتنين، والتسعة. ننزّلهم جنب التمنية بتاعتنا. وبعد ما ما قدرناش نقسم التمنية، اللي هي الألوف، هناخد الخانة اللي جنبها، واللي هي الإيه؟ المئات. فتالت خطوة هتكون قسمة المئات. وهنقسم تمنية وتمانين على التسعة. وهنرجع نفكّر إيه العدد اللي نضربه في تسعة، يكون الناتج بتاعه قريب من التمنية وتمانين.

نشوف كده التسعة في تسعة. التسعة في تسعة بتساوي واحد وتمانين. طب وبعدها؟ التسعة في عشرة بتسعين. وإحنا بندوّر على إيه؟ على التمنية وتمانين. هنلاقي إن التمنية وتمانين موجودة بين الواحد والتمانين، والتسعين. ولكن هي أصغر من التسعين. يبقى معنى كده بنشطب على التسعين؛ لأن هي كبيرة، ومش بناخدها. فبناخد الإيه؟ الواحد وتمانين. طب هو الواحد وتمانين ده عبارة عن إيه؟ تسعة في تسعة. فده معناه إن ناتج القسمة هيكون التسعة. فنيجي هنا فوق خانة المئات، ونكتب إيه؟ تسعة. ونبدأ نضرب، تسعة في تسعة. تسعة في تسعة بواحد وتمانين. بعدين نعمل عملية الطرح. تمنية وتمانين ناقص واحد وتمانين هتساوي سبعة.

بعدين نبدأ نقسم. ينفع نقسم السبعة على التسعة؟ لأ؛ لأن السبعة أصغر من التسعة. فنعمل إيه؟ ننزّل باقي الأرقام بتاعتنا؛ الاتنين، والتسعة. ينزلوا جنب السبعة. ونوصل للخطوة الرابعة، وهي قسمة العشرات؛ لأننا مش هنعرف نقسم السبعة اللي هي موجودة في المئات. فهناخد معاها الاتنين اللي في خانة العشرات. طيّب الاتنين اللي في خانة العشرات مع السبعة عملوا لنا اتنين وسبعين. اتنين وسبعين على التسعة فيها الإيه؟

تعالوا نفكّر إيه العدد اللي لمّا نضربه في تسعة، بيبقى الناتج اتنين وسبعين. هنلاقي إن تسعة في تمنية بتساوي اتنين وسبعين. معنى كده إن الناتج هو إيه؟ تمنية. فنيجي فوق، وعند خانة العشرات نكتب التمنية. بعدين نضرب تمنية في إيه؟ في تسعة. تمنية في تسعة بتساوي اتنين وسبعين. بعدين نطرح اتنين وسبعين ناقص اتنين وسبعين، صفر. بعدين ننزّل له الإيه؟ التسعة.

صفر على الشمال مالهوش أيّ قيمة، فبنشيله. بعدين نبدأ نقسم تسعة على التسعة. تسعة على التسعة تساوي واحد. فنكتب الواحد هنا. بعدين نضرب واحد في تسعة. واحد في تسعة هتساوي إيه؟ تسعة. بعدين نعمل عملية الطرح، ونقول تسعة ناقص تسعة تساوي صفر.

معنى إننا وصلنا لـصفر في الخطوة دي، يبقى إحنا كده خلّصنا عملية القسمة. ووإحنا بنقسم التسعة على التسعة، كنا بنعمل آخر خطوة والأخيرة، وهي قسمة الآحاد. وبكده نكون قسمنا تمنين ألف تمنمية تسعة وعشرين على التسعة. وناتج القسمة هو العدد اللي ظهر لنا هنا، أو اللي إحنا جبناه هنا، وهو تمن تلاف تسعمية واحد وتمانين. وتبقى دي هي قيمة كل قسط.

يعني التمنين ألف تمنمية تسعة وعشرين عبارة عن تسع أقساط، كل قسط عبارة عن إيه؟ تمن تلاف تسعمية واحد وتمانين جنيهًا. وهي دي الإجابة الصح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.