فيديو: حل المسائل الكلامية عن طريق قسمة عدد عشري على آخَر

لدى رامي ١٣٫٧٥ كوبًا من السكر. إذا استخدم رامي ١٫٢٥ كوب من السكر لخبز قطعة واحدة من البسكويت، فكم قطعةً من البسكويت يمكن أن يخبزها؟

٠٣:٤٠

‏نسخة الفيديو النصية

لدى رامي تلتاشر وخمسة وسبعين من مية كوبًا من السكر. إذا استخدم رامي واحد وخمسة وعشرين من مية كوب من السكر، لخَبز قطعة واحدة من البسكويت، فكم قطعة من البسكويت يمكن أن يَخبزها؟

يعني معطى عندنا إن رامي عنده تلتاشر وخمسة وسبعين من مية كوب من السكر. واستخدم رامي واحد وخمسة وعشرين من مية من السكر؛ عشان يخبز قطعة واحدة من البسكويت. والمطلوب في السؤال إننا نحدّد كام قطعة من البسكويت يمكن أن يَخبزها. يعني معطى عندنا إن ده إجمالي عدد الأكواب اللي بيمتلكها رامي من السكر. وعندنا العدد ده، اللي هو واحد وخمسة وعشرين من مية، هو عدد الأكواب من السكر اللي بتُستخدم علشان يخبز بيها قطعة واحدة من البسكوت.

فعشان نحدّد كام قطعة من البسكويت يمكن أن يخبزها. يبقى عايزين نقسم إجمالي عدد الكوبايات. اللي هو تلتاشر وخمسة وسبعين من مية. على واحد وخمسة وعشرين من مية. اللي هو عدد الكوبايات اللي بيُستخدم لخبز قطعة واحدة.

فهنلاحظ إننا عايزين نقسم عدد عشري على عدد عشري. فعشان نقسمهم، هنستخدم القسمة المطوّلة، وهنكتبهم بالشكل ده. وفي الأول علشان نقدر نقسم عدد عشري على عدد عشري آخر، فلازم نحوّل العدد العشري اللي بنقسم عليه، اللي هو ده، هنحوّله إلى عدد صحيح. وعشان نحوّل العدد العشري واحد وخمسة وعشرين من مية إلى عدد صحيح، يبقى محتاجين نحرّك العلامة العشرية مكانين جهة اليمين.

وعلشان ما نغيّرش حاجة من قيمة المقدارين اللي بنقسمهم على بعض، يبقى زي ما هنحرّك العلامة العشرية هنا، يبقى هنيجي عند تلتاشر وخمسة وسبعين من مية، ونحرّك العلامة العشرية مكانين جهة اليمين. فبالتالي هيبقى العددين هما ألف تلتمية خمسة وسبعين، على مية خمسة وعشرين. ونقدر نشيل العلامة العشرية اللي هنا؛ لأن هنا بعدها صفر. فبالتالي هيبقى ناتج قسمة المقدارين دول، هو هو نفس ناتج قسمة المقدارين دول. لأننا يعتبر عشان نحوّل العلامة العشرية مكانين جهة اليمين، فكأننا ضربنا العددين في مية.

بعد كده هنبدأ نقسم باستخدام القسمة المطولة. فنيجي نجرّب نقسم واحد على مية خمسة وعشرين، مش هينفع؛ لأن واحد أقل. بعد كده تلتاشر، برضو مش هينفع. فهنقسم مية سبعة وتلاتين على مية خمسة وعشرين. فهنلاحظ إن العدد مية سبعة وتلاتين موجود فيه العدد مية خمسة وعشرين مرة واحدة. فيبقى هنكتب فوق واحد. بعد كده هنضرب واحد في مية خمسة وعشرين، وهنكتب الناتج تحت. وواحد في مية خمسة وعشرين بيساوي مية خمسة وعشرين، فهنكتبها تحت مية سبعة وتلاتين.

بعد كده هنطرح. فلمّا نحسب سبعة ناقص خمسة بتساوي اتنين. وتلاتة ناقص اتنين بتساوي واحد. فهيبقى عندنا الناتج اتناشر. واتناشر أقل من مية خمسة وعشرين. فبالتالي هننزّل الرقم اللي جنبه، اللي هو خمسة. فهيبقى عندنا مية خمسة وعشرين، عايزين نقسمها على مية خمسة وعشرين، واللي هتساوي واحد. فهنكتب الواحد فوق هنا. وبعد كده نضرب واحد في مية خمسة وعشرين، واللي هتساوي مية خمسة وعشرين.

بعد كده هنطرح. فلمّا نطرح مية خمسة وعشرين ناقص مية خمسة وعشرين، هيبقى الناتج هو صفر. فبالتالي هيبقى ناتج قسمة ألف تلتمية خمسة وسبعين، على مية خمسة وعشرين، هو حداشر. وزي ما عرفنا إن الناتج ده هيبقى هو نفس ناتج قسمة تلتاشر وخمسة وسبعين من مية، على واحد وخمسة وعشرين من مية، فهيبقى بيساوي حداشر. وبالتالي هيبقى عدد قطع البسكويت اللي يمكن رامي أن يَخبزها هو حداشر قطعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.