تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تحديد التماثل حول محور

أحمد لطفي

يوضح الفيديو كيفية تحديد تماثل الشكل حول محور، ويوضح أنواع محور التماثل، وكيفية إيجاد محور التماثل للأشكال المختلفة.

٠٤:٠٨

‏نسخة الفيديو النصية

هنتكلم عن تحديد التماثل حول محور، وهنِعرف يعني إيه تماثُل الشكل حول محور، وإيه هي أنواع محور التماثل، وإزاي نِقدر نِوجد محور التماثل للأشكال المختلفة.

في البداية تماثُل الشكل حول محور معناه إني ممكن أطبّق الشكل ده فوق مستقيم، وينتج عن ذلك نصفان متطابقان، وبالتالي المستقيم ده هيُسمى محور التماثل؛ يعني مثلًا لو عندنا شكل زي ده، هنلاحظ إننا ممكن نِقدر نطبق الشكل فوق المستقيم اللي باللون الأحمر، وهينتج نصفين متطابقين، يعني الناحية اليمين من الخط هتكون زي الناحية اليسار بالظبط، وبالتالي المستقيم هيسمى محور تماثُل.

لو مثلًا عندنا شكل آخر، هنلاحظ أيضًا إن الشكل ممكن نطبقه فوق المستقيم اللي باللون الأحمر، وهيكون النصف اللي فوق مطابق للنصف اللي تحت، وبالتالي المستقيم اللي باللون الأحمر هيسمى محور تماثُل.

لو عندنا شكل آخر، هنلاحظ إن في الشكل ده ما نقدرش نرسم أي مستقيم ونطبق الشكل فوق الخط المستقيم وينتج نصفين متطابقين، وبالتالي بالنسبة للشكل ده لا يوجد تماثُل.

لو عايزين نشوف أنواع محور التماثل، فَفي أول شكل على اليمين، الشكل ده، هنلاحظ إن المستقيم كان رأسي، وبالتالي محور التماثل هيكون رأسي. وبالنسبة لتانى شكل، الشكل ده، هنلاحظ إن محور التماثل كان أفقي، وبالتالي هيكون الشكل ده ليه محور تماثُل أفقي.

هنلاحظ إن الشكلين اللي عندنا، الأول والتاني، كل واحد فيهم كان ليه محور تماثُل واحد بس، طب هل ينفع الأشكال يكون ليها أكتر من محور تماثل؟

لو عندنا شكل زي ده، هنلاحظ إن الشكل الخماسي ليه أكتر من محور تماثل؛ أولًا ليه محور تماثُل رأسي، وليه محور تماثُل أفقي، وليه محورَي تماثُل قُطران؛ وبالتالي يمكن للشكل إن يكون ليه أكتر من محور تماثُل.

ويبقى كده أنواع محور التماثل هو: محور تماثُل أفقي، ومحور تماثُل رأسي، ومحور تماثُل قُطري.

لو عايزين نشوف إزاي نقدر نحدد محور التماثل للأشكال المختلفة، فمثلًا عندنا مثال بالشكل ده، مطلوب نحدد ما إذا كان للعلم محاور تماثُل. وإذا وُجد، ارسم جميع محاور التماثل، وإلا فاكتب لا يوجد.

عندنا مُعطى علم ولاية أريزونا، وعايزين نشوف إذا كان للعلم محاور تماثُل ولا لأ، يعني محتاجين نشوف إذا كان فيه مستقيم نقدر نرسمه يِقسم العلم لنُصين متطابقين. فهنلاحظ إننا ممكن نرسم مستقيم بالشكل ده، هنلاحظ إن عندنا مستقيم واحد رأسي بيقسم العلم لنصفين متطابقين؛ وبالتالي علم ولاية أريزونا له محور تماثُل رأسي واحد.

لو مُعطى علم آخر بالشكل ده، مطلوب نحدد إذا كان لعلم اليونان محاور تماثُل ولا لأ، فهنلاحظ إننا ما نقدرش نرسم أي مستقيم يِقسم علم اليونان لنصفين متطابقين؛ وبالتالي علم اليونان ليس له محاور تماثُل، أو هنكتب لا يوجد كما هو مطلوب.

في النهاية نكون عِرفنا يعني إيه تماثُل الشكل حول محور، وإيه هي أنواع محور التماثل، وإزاي نِقدر نِوجد محور التماثل للأشكال المختلفة.