فيديو: إيجاد إحداثيات مجهولة لنقطة منتصف قطعة مستقيمة معلومة لإيجاد مجموعها

إذا كانت ﺃ(ﺱ، ﺹ، ﻉ) هي نقطة منتصف القطعة المستقيمة بين ﺏ(٩، −١٧، ٢)، ﺟ(١٦، −١٢، ٧)، فما قيمة ﺱ + ﺹ + ﻉ؟

٠٤:١٣

‏نسخة الفيديو النصية

إذا كانت أ إحداثياتها س وَ ص وَ ع هي منتصف القطعة المستقيمة بين ب وإحداثياتها عبارة عن تسعة وسالب سبعتاشر واتنين، وَ ﺟ وإحداثياتها عبارة عن ستاشر وسالب اتناشر وسبعة. فما قيمة س زائد ص زائد ع؟

يبقى اللي نقدر نفهمه من السؤال اللي إحنا شايفينه إن أ تقع منتصف القطعة المستقيمة ب ﺟ، مطلوب تحديد إحداثيات نقطة أ، وهي عبارة عن س وَ ص وَ ع، بعد كده نقدر نوجد قيمة س زائد ص زائد ع.

بنبدأ أول حاجة بكتابة قانون إحداثيات نقطة المنتصف للقطعة المستقيمة ب ﺟ، وهو عبارة عن س واحد زائد س اتنين، على الاتنين؛ وَ ص واحد زائد ص اتنين، على الاتنين؛ وَ ع واحد زائد ع اتنين، على الاتنين. عشان نفهم أكتر س واحد وَ ص واحد وَ ع واحد، وَ س اتنين وَ ص اتنين وَ ع اتنين؛ بنقول إن عندنا القطعة المستقيمة ب ﺟ، وعارفين إن نقطة أ تقع منتصف القطعة المستقيمة ب ﺟ، هنفرض إن النقطة ب هي النقطة واحد والنقطة ﺟ هي النقطة اتنين، يبقى س واحد وَ ص واحد وَ ع واحد هي إحداثيات النقطة ب، نقطة رقم واحد، وبنلاقي إن س اتنين وَ ص اتنين وَ ع اتنين هي إحداثيات النقطة اتنين وهي النقطة ﺟ.

هنبدأ التعويض عن س واحد وَ س اتنين، فبنلاقي عندنا إن س واحد بتسعة، فبنكتب تسعة زائد … س اتنين عندنا ب ستاشر، يبقى زائد ستاشر على الاتنين، وبالتعويض عن ص واحد، فبنلاقي إن ص واحد بسالب سبعتاشر، زائد … ص اتنين عبارة عن سالب اتناشر، على الاتنين. وبنعوّض بعد كده عن ع واحد، فبنلاقي إنها عبارة عن اتنين، زائد … ع اتنين عبارة عن سبعة، فنعوّض بسبعة، طبعًا على الاتنين.

بعد كده هنجمع ونقسم على الاتنين، فبنلاقي إن تسعة زائد ستاشر، على الاتنين؛ عبارة عن اتناشر وخمسة من عشرة. وبنلاقي إن سالب سبعتاشر زائد سالب اتناشر، على الاتنين؛ بيكون الناتج عبارة عن سالب أربعتاشر وخمسة من عشرة. وبنلاقي إن اتنين زائد سبعة، على الاتنين؛ تساوي أربعة وخمسة من عشرة.

وبالتالي تبقى أ عندنا النقطة أ إحداثياتها عبارة عن اتناشر وخمسة من عشرة، وسالب أربعتاشر وخمسة من عشرة، وأربعة وخمسة من عشرة. ولأن إحداثيات نقطة أ عبارة عن س وَ ص وَ ع؛ يبقى س عندنا هتساوي اتناشر وخمسة من عشرة، وَ ص عندنا هتساوي سالب أربعتاشر وخمسة من عشرة، وبنلاقي إن ع عندنا هتساوي أربعة وخمسة من عشرة. وبكده هنلاقي إن س زائد ص زائد ع؛ هتساوي اتناشر وخمسة من عشرة، زائد سالب أربعتاشر وخمسة من عشرة، زائد أربعة وخمسة من عشرة. بنلاقي إن الناتج هيساوي اتنين وخمسة من عشرة.

وبكده بتكون قيمة س زائد ص زائد ع عبارة عن اتنين وخمسة من عشرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.