تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: حل مسائل عن الزمن المنقضي

سوزان فائق

يوضح الفيديو مفهوم الزمن المنقضي، وكيفية حساب قيمته من خلال حل مسائل من حياتنا العملية.

١٢:٢٧

‏نسخة الفيديو النصية

في الفيديو ده هنتكلّم على حل مسائل عن الزمن المنقضي. هنعرف إيه هو الزمن المنقضي. وإزاي بنحسب قيمته من خلال بعض الأمثلة في حياتنا.

الزمن المنقضي هو مقدار الزمن ما بين بداية النشاط ونهايته. مثلًا لو فيه لاعب يمارس رياضة الجري. بدأ النشاط بتاعه الساعة ستة وخمسين دقيقة صباحًا. وانتهى من نشاطه الساعة عشرة وخمسة وتلاتين دقيقة صباحًا. عايزين نحسب الزمن المنقضي اللي هو من بداية النشاط لغاية ما انتهى من النشاط.

علشان نحسب الزمن المنقضي، لازم نبقى عارفين وقت بداية النشاط ووقت نهاية النشاط. يعني هنا بداية النشاط كانت الساعة واحدة وخمستاشر دقيقة. ونهاية النشاط كانت الساعة عشرة وخمستاشر دقيقة. عايزين نعرف نحسب الزمن المنقضي؛ بإن إحنا نعرف الفرق ما بين نهاية النشاط وبداية النشاط.

إيه اللي بيتسبب في إن الساعة بتتغير؟ علشان نعرف نقيس الزمن المنقضي، هنشوف إن عقرب الساعات كان على الساعة واحدة، اللي هو العقرب القصير ده، وهنا بقى الساعة عشرة. وعقرب الدقايق اللي هو الكبير كان على خمستاشر دقيقة، ولسه هنا كان على خمستاشر دقيقة برضو.

التغيير اللي حصل ده بيبقى عن طريق إن عقرب الدقايق يفضل يمشي في الاتجاه ده. ويعدّ دورات كاملة من الدقايق اللي بتكمّل الساعة؛ يعني عندنا كل ستين دقيقة بتمثّل لنا ساعة. واحد، اتنين، تلاتة، أربعة، خمسة، ونقعد نعدّ لغاية ما نوصل لستين. وأول ما توصل ستين تاخد الساعة اللي بعدها فعقرب الساعات يتحرك ساعة. يعني بعد ساعة هتبقى الساعة اتنين وخمستاشر دقيقة. وبعد ساعة كمان هتبقى تلاتة وخمستاشر دقيقة. وتفضل تزود لغاية ما توصل لعشرة وخمستاشر دقيقة.

لما هنحسب الزمن المنقضي، هنشوف الدقايق. هنا خمستاشر وهنا خمستاشر يبقى الدقايق زي ما هي. واللي هيتغير بس هو الساعات من الساعة واحدة بقت الساعة عشرة. فالفرق ما بينهم هو تسع ساعات. يبقى الزمن المنقضي تسع ساعات. من غير ما يكون فيه تغيير في الدقايق.

طيب لو هو ابتدى النشاط عند الساعة واحدة وخمستاشر دقيقة. وانتهى عند الساعة عشرة واتنين وتلاتين دقيقة. يبقى لازم نحسب الفرق في الدقايق. هنا اتنين وتلاتين وهنا خمستاشر. يبقى الفرق في الدقايق هيبقى اتنين وتلاتين ناقص الخمستاشر. يعني هيساوي سبعتاشر دقيقة. يبقى لو كانت بداية النشاط واحدة وخمستاشر دقيقة وانتهى عند عشرة واتنين وتلاتين دقيقة. يبقى الزمن المنقضي هو تسع ساعات وسبعتاشر دقيقة.

في المثال ده إحنا اعتبرنا إن هو الساعة لفّت دورة من واحد لعشرة على طول. طب ما هو ده لو كانت دي صباحًا ودي صباحًا. لكن لو كانت واحدة بدأت صباحًا وانتهت مساءً. يبقى بنعمل حسابنا إن فيه اتناشر ساعة زيادة، اللي همّ زمن الدورة الكاملة للساعات. يعني اللفة دي كلها اتناشر. وكمان تزود عليها كمان عدد الساعات التانيين. نشوف إزَّاي.

في المثال ده كان بداية النشاط الساعة ستة وخمستاشر دقيقة صباحًا. وانتهى عند عشرة وخمستاشر دقيقة مساءً. هنا خمستاشر دقيقة وهنا خمستاشر دقيقة؛ يبقى التغيير بس هيبقى في الساعات، اللي هي الستة بقت عشرة. لو إحنا حسبنا الستة للعشرة مباشرةً هتبقى أربع ساعات. لكن في الحقيقة حصل إن فيه تغيير هنا صباحًا ومساء. يعني الساعة بعد ما وصلت عشرة خمستاشر دقيقة صباحًا، زادت كمان اتناشر ساعة؛ عشان تبقى مساء. يعني هنا زاد أربع ساعات، فبقت عشرة وخمستاشر دقيقة، ولسه صباحًا. وعشان نوصل للمساءً لازم نزوّد كمان اتناشر ساعة. يبقى كده الزمن المنقضي أربع ساعات واتناشر ساعة؛ يعني ستاشر ساعة.

ناخذ أمثلة من حياتنا العملية: يستغرق عبد العزيز ساعة وثلاثون دقيقة للوصول إلى مزرعته. إذا غادر منزله الساعة أربعة مساء؛ ففي أي ساعة يصل إلى مزرعته؟

كده هو مدّيلنا الزمن المنقضي اللي هو ساعة وتلاتين دقيقة. وعايز يعرف الساعة اللي يصل إلى مزرعته فيها. هنعمل جدول فيه عمودين. أول عمود إضافة الزمن، والتاني الزمن الجديد. هنبدأ عند الساعة أربعة مساءً، ونزوّد الساعة والتلاتين دقيقة. أول حاجة هنزوّد الساعة. هتبقى الساعة أربعة مساء، تبقى خمسة مساء. وبعدين نزوّد الدقايق اللي همّ تلاتين دقيقة، يبقى الساعة هتبقى خمسة وتلاتين دقيقة مساء. يبقى هو هيصل مزرعته الساعة خمسة وتلاتين دقيقة مساء. وهو ده المطلوب في السؤال.

هنشوف كمان مثال: تُظهر الساعة الجانبية وقت بدء تدريب فريق كرة القدم في المدرسة. إذا أنهى الفريق تدريبه الساعة خمسة وثلاثون دقيقة مساءً، فاوجد طول الفترة الزمنية التي استغرقها التدريب.

الساعة هنا بتُظهر الساعة اتنين وسبعة وأربعون دقيقة مساءً. عايزين نحسب الوقت المنقضي، اللي هو طول الفترة الزمنية اللي استغرقها التدريب. هنعمل الجدول المكون من عمودين؛ الأول: إضافة الزمن. والتاني: الزمن الجديد.

إحنا عايزين ننهي عند الساعة خمسة وثلاثون دقيقة مساءً. وابتدينا عند اتنين وسبعة وأربعين دقيقة مساءً. علشان نحسب الزمن المنقضي، هنشوف هنا السبعة وأربعين بقت تلاتين؛ يعني الدقايق زادت وبقت تلاتين. والساعات اتنين بقت خمسة. هنشوف الفرق في الدقايق الأول. السبعة وأربعين بقت تلاتين. طب إزَّاي السبعة وأربعين راحت للتلاتين؟ الساعة فيها ستين دقيقة؛ يعني السبعة وأربعين دي زادت لغاية ما وصلت للستين. وبعد كده زوّدت الساعة. وبعدين الدقايق وصلت لتلاتين. يعني هنا عندنا ستين. من السبعة وأربعين للستين زادت تلتاشر دقيقة. وبعد كده الستين هتعدّ لغاية التلاتين. بدأت من عند الصفر، وبعدين هتنتهي عند التلاتين؛ يبقى زاد تلاتين دقيقة. هنضيف الدقايق دي في الجدول. يبقى تلتاشر دقيقة. يبقى الساعة هتبقى هنا صفر وصفر. والاتنين هتبقى تلاتة. وبعد كده ده مساء. وبعد كده نضيف التلاتين دقيقة، هتبقى الساعة تلاتة وتلاتين دقيقة مساءً. وبعد كده هنضيف الساعات. هنضيف واحد ساعة. هتبقى الدقايق زي ما هي، والساعة تبقى أربعة مساءً. وبعد كده هنضيف ساعة كمان. تبقى الدقايق زي ما هي، وبعد كده الساعة تبقى خمسة مساءً. يبقى هو ده الوقت اللي انتهى عنده التدريب.

هنجمع الدقايق مع بعض، والساعات مع بعض. يبقى الزمن المنقضي: عدد الدقايق تلتاشر زائد تلاتين؛ يعني تلاتة وأربعين دقيقة. وساعة زائد ساعة يبقى ساعتين. يبقى الزمن المنقضي هيبقى ساعتين وتلاتة وأربعين دقيقة. يبقى هو ده الزمن اللي استغرقه التدريب.

حدّد المدة الزمنية لفيلم بدأ الساعة عشرة وثلاثون دقيقة قبل الظهيرة، وانتهى اتناشر واتنين وخمسين دقيقة بعد الظهيرة.

هنعمل الجدول بتاعنا، اللي هو أول عمود إضافة الزمن، والتاني الزمن الجديد. ونبدأ عند عشرة وثلاثون دقيقة قبل الظهيرة. وهننتهي عند اتناشر واتنين وخمسين دقيقة بعد الظهيرة. قبل الظهيرة وبعد الظهيرة بيتغيروا عند الساعة اتناشر، اللي … كل اللي قبل بيبقى قبل الظهيرة، ويعّدي بعدها يبقى بعد الظهيرة. أول حاجة هنبُص عليها الدقايق. هنا الدقايق كانت تلاتين بقت اتنين وخمسين. يبقى أضفنا اتنين وعشرين دقيقة على الساعة عشرة وثلاثين دقيقة؛ بقت عشرة واتنين وخمسين دقيقة قبل الظهيرة. بعد كده نزوّد الساعات. يبقى هنزوّد هنا ساعة، هتبقى حداشر واتنين وخمسين دقيقة، ولسه قبل الظهيرة. بعد كده نزوّد ساعة كمان، هتبقى اتناشر واتنين وخمسين دقيقة. هنا بقينا بعد الظهيرة. وهو ده معاد انتهاء الفيلم. هنحسب الزمن المنقضي. الدقايق نجمعها على بعض، والساعات على بعض. هنا اتنين وعشرين دقيقة بس، وهنا ساعتين. يبقى الزمن المنقضي هيساوي ساعتين واتنين وعشرين دقيقة. يبقى هي دي المدة الزمنية للفيلم.

اتكلمنا في الفيديو ده عن حل مسائل عن الزمن المنقضي. عرفنا يعني إيه الزمن المنقضي، وإزاي بنحسبه لمسائل موجودة في حياتنا.