فيديو: إيجاد محيط مستطيل ومربع

يعرض الفيديو مفهوم محيط الأشكال الهندسية وكيفية إيجاد محيط المستطيل والمربع.

٠٩:٢٩

‏نسخة الفيديو النصية

إيجاد محيط مستطيل ومربع.

في الفيديو ده، هنعرف يعني إيه محيط. وإزّاي نوجد محيط المستطيل، ومحيط المربع. إيه هو المحيط؟ لو كريم عنده جنينة حلوة، زيّ دي. وحبّ إنه يحميها ويحاوطها بسلك. فهيروح المحل عشان يشتريه. طول السلك اللي كريم هيشتريه من المحل، هو اللي بنستخدمه علشان نحاوط بيه الجنينة. يعني هو محيط الجنينة. يبقى محيط أيّ شكل، هو طول الخط اللي بنحاوط بيه الجنينة. فلو عرفنا كريم اشترى كام متر سلك من المحل. يبقى كده إحنا عرفنا محيط الجنينة.

لو فرضنا إن الجنينة على شكل مستطيل. فإحنا دلوقتي هنجيب محيط المستطيل. واللي هو في نفس الوقت طول السلك، اللي هيساعدنا في إننا نحاوط الجنينة. فلو قلنا إننا هنحتاج في الجزء ده، ستة متر. والجزء ده، اتناشر متر. والجزء ده، برضو ستة متر، قدّ ده. وده اتناشر متر، قدّ ده؛ لأن الشكل مستطيل.

عاوزين بقى نعرف طول السلك. فهنجمع ستة، زائد اتناشر، زائد ستة، زائد اتناشر. ده هو طول السلك. واللي بيساوي ستة وتلاتين متر. واللي هو في نفس الوقت، محيط المستطيل. يبقى محيط المستطيل اللي قدامنا، ستة وتلاتين متر. والطريقة دي اسمها طريقة التجميع. يبقى إحنا كده استخدمنا طريقة التجميع، علشان نوجد محيط المستطيل.

فيه طريقة تانية، ممكن نوجد بيها محيط المستطيل، أو محيط الجنينة؛ وهي استخدام القانون. إحنا قلنا إن محيط أيّ شكل، هو طول الخط اللي بيترسم حواليه. وطول الخط اللي بيترسم حواليه، بنجيبه بالتجميع. فلو مثلًا بصّينا على المثال اللي لسّه حالّينه. واللي جمّعنا فيه طول السلك اللي حاوط الجنينة، اللي على شكل مستطيل. واللي كان عرضه ستة متر، وطوله اتناشر متر. فجمّعناهم بالشكل ده.

ولو عملنا لهم إعادة ترتيب، فنقول ستة زائد ستة، زائد اتناشر زائد اتناشر. الستة والستة دول، ممكن يبقوا ستة في اتنين. والاتناشر والاتناشر دول، ممكن يبقوا اتناشر في اتنين. وما بينهم زائد. لو خدنا الاتنين عامل مشترك، هيتبقّى ستة زائد اتناشر، الكل مضروب في اتنين. الستة هنا هي العرض. والاتناشر هي الطول.

من هنا، نقدر نستنتج قانون لحساب محيط المستطيل. واللي بيساوي الطول زائد العرض، في اتنين. وهو ده القانون اللي بنستخدمه، علشان نعرف نجيب بيه محيط المستطيل. ودي الطريقة التانية، اللي هي طريقة استخدام القانون. أمّا الطريقة الأولانية، كانت طريقة التجميع.

فلو جينا نستخدم القانون هنا، أو الطريقة التانية، هنقول على طول ستة زائد اتناشر، في اتنين. ستة زائد اتناشر، تمنتاشر. في اتنين، هتساوي ستة وتلاتين متر. ودي نفس النتيجة اللي طِلعت لنا، لمّا استخدمنا طريقة القانون. فالنتيجة مش بتتغيّر. سواء استخدمنا طريقة القانون، أو طريقة التجميع. ده بالنسبة لمحيط المستطيل. طيب لو جينا نشوف محيط المربع.

محيط المربع زيّ محيط المستطيل. فيه طريقتين ممكن نحسب محيطه بيهم. الطريقة الأولى طريقة التجميع. فلو فرضنا إن كل ضلع من أضلاع المربع ده، تلاتة سنتيمتر. فعلشان نحسب محيط المربع، هنجمّع كل ضلع من أضلاعه. فهنقول تلاتة زائد تلاتة، زائد تلاتة، زائد تلاتة. هيساوي اتناشر سنتيمتر. يبقى محيط المربع، باستخدام طريقة التجميع، اتناشر سنتيمتر.

الطريقة رقم اتنين، وهي استخدام القانون. هنستنتج قانون نستخدمه علشان نوجد محيط المربع. لو قلنا إن محيط المربع، بطريقة التجميع، هو: تلاتة زائد تلاتة، زائد تلاتة، زائد تلاتة. ممكن نبسّطه ونكتبه بشكل أحسن، أو في صورة قانون. فممكن التلاتة زائد تلاتة، زائد تلاتة، زائد تلاتة؛ نحوّلها لتلاتة في أربعة. لأن التلاتة مجموعة أربع مرات. فممكن نبدّلها بالضرب، وتكون تلاتة في أربعة.

التلاتة هنا هي طول ضلع المربع. فممكن نستنتج قانون محيط المربع، ونقول إنه بيساوي طول الضلع في أربعة. يبقى لو جالنا أيّ مربع، ممكن نحسب محيطه باستخدام طريقتين. طريقة التجميع، وهي إننا نجمّع كل ضلع من أضلاعه على نفسه. أو إننا نجمّع كل ضلع من أضلاعه، مع الضلع التاني. والطريقة التانية هي استخدام القانون. واللي استنتجنا فيها قانون محيط المربع، اللي هو طول الضلع في أربعة. يبقى إحنا نحتاج طول ضلع واحد، ونضربه في أربعة، علشان نحصل على المحيط.

لو عندنا مربع طول ضلعه ستة سنتيمتر. وعاوزين نوجد محيط المربع. قبل ما نوجد محيط المربع، هنتوقعه الأول. فممكن نفرض إنّ بدل ما أطوال أضلاعه بتساوي ستة سنتيمتر، ممكن نخلّيها خمسة. ولو جمعنا الخمسة زائد خمسة، زائد خمسة، زائد خمسة؛ هتساوي عشرين سنتيمتر. وده هو تقدير الناتج. هنحلّه دلوقتي، ونقارن ما بينه وما بين الناتج اللي قدّرناه.

أول حاجة هنستخدمها، هي طريقة التجميع. فهنجمع ستة زائد ستة، زائد ستة، زائد ستة. يبقى محيط المربع يساوي ستة زائد ستة، زائد ستة، زائد ستة. واللي بتساوي أربعة وعشرين سنتيمتر. كده نكون جِبنا محيط المربع باستخدام طريقة التجميع. تاني طريقة هنستخدمها، هي القانون. محيط المربع يساوي طول الضلع في أربعة. ونعّوض في القانون، طول الضلع بستة، نضربها في أربعة. يبقى تساوي أربعة وعشرين سنتيمتر. فالطريقتين طلّعوا لنا نفس الناتج.

ولو جينا نقارن بين ناتج المحيط الفعلي، اللي هو الأربعة وعشرين. والناتج اللي قدّرناه في البداية، اللي هو العشرين. هنلاقيهم قريبين من بعض. وده بيدلّ على إننا حلّينا بشكل صح.

آخر مثال هناخده، هو تطبيق على قانون محيط المستطيل. وده علشان نفهمه أكتر. مثال: ملعب لكرة القدم، طوله اتنين وأربعين متر، وعرضه اتنين وعشرين متر. أوجد محيطه.

محيط المستطيل يساوي الطول زائد العرض، الكل في اتنين. هنحطّ الطول والعرض، ونضربهم في اتنين. الطول زائد العرض، يساوي أربعة وستين. في اتنين، هتساوي مية تمنية وعشرين. يبقى محيط الملعب، اللي على شكل مستطيل، يساوي مية تمنية وعشرين متر. وممكن برضو نحسبه بسرعة، بطريقة التجميع. ونقول محيط المستطيل يساوي اتنين وعشرين، زائد اتنين وأربعين، زائد اتنين وعشرين، زائد اتنين وأربعين. هتساوي مية تمنية وعشرين متر.

وبكده نكون عرفنا إيه هو المحيط. وإزّاي نوجد محيط المستطيل، باستخدام التجميع والقانون. وكمان عرفنا إزّاي نوجد محيط المربع، وده عن طريق التجميع والقانون.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.