نسخة الفيديو النصية
تحويل الأعداد العشرية إلى أعداد كسرية.
في الفيديو ده هنتعرّف على خطوات تحويل الأعداد العشرية إلى أعداد كسرية، وهنحلّ أمثلة للتوضيح.
بنلاقي إن يمكن كتابة الأعداد العشرية مثل: تلاتة وخمسة وعشرين من مائة. وستة وتمنية وعشرين من مائة. ومية خمسة وعشرين وأربعة وخمسين من مائة. في صورة أعداد كسرية في أبسط صورة باتباع الخطوات التالية.
أول حاجة: بيُترك الجزء الصحيح من العدد العشري كما هو. بنلاقي على سبيل المثال عدد عشري زيّ: تلاتة وخمسة وعشرين من مائة. بنلاقي إنه بيتكوّن من جزء صحيح؛ وهو تلاتة، وجزء عشري؛ وهو خمسة وعشرين من مائة. فأول حاجة بنعملها بنترك الجزء الصحيح من العدد العشري كما هو.
تاني خطوة: بنحدّد القيمة المنزلية لآخِر منزلة عشرية. لو اتكلّمنا على نفس العدد العشري، وهو تلاتة وخمسة وعشرين من مائة، بنلاقي عندنا إن آخِر منزلة عشرية بيتواجد بيها خمسة. وبتكون كده القيمة المنزلية لآخِر منزلة عشرية هي جزء من مائة.
بعد كده بنلاقي إن الخطوة التالتة: بنكتب الكسر العشري في صورة كسر مقامه تلك القيمة المنزلية اللي إحنا عرفناها من خطوة رقم اتنين وحدّدناها. ثم نبسّط الكسر إذا تطلّب الأمر ذلك. للتوضيح هنحلّ مثال على تحويل الأعداد العشرية إلى أعداد كسرية باتباع الخطوات اللي إحنا اتكلّمنا عنها دي، وهنطبّقها خطوة خطوة.
مثال: اكتب العدد العشري التالي في صورة عدد كسري في أبسط صورة.
بنلاقي عندنا العدد العشري عبارة عن تلتمية واحد وتمانين وربعمية تلاتة وتسعين من ألف. بنلاقي إن تلتمية واحد وتمانين هو الجزء الصحيح من العدد العشري. فبيكون الجزء الصحيح زيّ ما هو زيّ ما إحنا شايفين كده، ونحاول نكتب الجزء العشري على صورة كسر. فبنلاقي عندنا إن آخِر منزلة عشرية القيمة المنزلية لها هي عبارة عن جزء من ألف. وبكده هيكون مقام الكسر عبارة عن ألف، وبنكتب في البسط ربعمية تلاتة وتسعين.
وبكده يبقى قدِرنا نكتب العدد العشري تلتمية واحد وتمانين وربعمية تلاتة وتسعين من ألف في صورة عدد كسري. ويُقرأ: تلتمية واحد وتمانين وربعمية تلاتة وتسعين من ألف. ودلوقتي هنحلّ مثال آخَر.
بنقرا المثال التالي: الجدول المجاور يبيّن متوسط أطوال عدة أنواع من الأصداف البحرية. بنلاقي من خلال الجدول التالي على اليمين اسم الصدفة، وبنلاقي على الشمال متوسط الطول بالسنتيمتر. مطلوب نكتب متوسط طول صدفة الكونش في صورة عدد كسري في أبسط صورة.
فبنلاقي إن صدفة الكونش متوسط طولها بالسنتيمتر عبارة عن أربعة وعشرين وخمسة وستين من مائة. وبكده بيكون المطلوب هو كتابة العدد العشري أربعة وعشرين وخمسة وستين من مائة في صورة عدد كسري في أبسط صورة. فبنبدأ بأول خطوة للتحويل من عدد عشري إلى عدد كسري بإننا نكتب الجزء الصحيح زيّ ما هو.
بعد كده بنشوف القيمة المنزلية لآخِر منزلة عشرية، بنلاقي إنها عبارة عن جزء من مائة. وبكده هيكون مقام الجزء الكسري من العدد الكسري عبارة عن مائة، وبنكتب في البسط خمسة وستين. يبقى قدِرنا دلوقتي نحوّل العدد العشري إلى عدد كسري زيّ ما إحنا شايفين، وبيُقرأ: أربعة وعشرين وخمسة وستين من مائة.
بعد كده بنحاول نكتب العدد الكسري في أبسط صورة، فبنلاقي إن يمكن اختصار البسط؛ وهو خمسة وستين، مع المقام؛ وهو المائة. لأن فيه عامل مشترك أكبر بين الخمسة وستين، والمائة؛ وهو عبارة عن الخمسة.
فبقسمة البسط على خمسة بيكون البسط عبارة عن تلتاشر، وبنقسم المقام على خمسة بيكون المقام عبارة عن عشرين. وبكده بيكون العدد الكسري في أبسط صورة عبارة عن: أربعة وعشرين وتلتاشر على العشرين.
وبكده يبقى في الفيديو ده اتعرّفنا على خطوات تحويل الأعداد العشرية إلى أعداد كسرية، وحلّينا أمثلة للتوضيح.