فيديو: تحويل الكسور غير الفعلية إلى أعداد كسرية في المسائل الكلامية

الجدول الموضَّح يُبيِّن مكوِّنات إحدى الأكلات وكمية كل مكوِّن. اكتب كمية كل مكوِّن من مكوِّنات الأكلة في صورة عدد كسري في أبسط صورة.

٠٣:١٧

‏نسخة الفيديو النصية

الجدول الموضَّح يبيّن مكونات إحدى الأكلات وكمية كل مكون، اكتب كمية كل مكون من مكونات الأكلة في صورة عدد كسري في أبسط صورة.

العدد الكسري هي صورة عدد وكسر، فعشان نحوّل كل كسر لعدد كسري هنقسم البسط على المقام، فهنبدأ بالكسر الأول أربعتاشر على تلاتة، نقسم باستخدام عملية القسمة المطوَّلة، وبما إن واحد أصغر من التلاتة، فمش هينفع نقسم عليه، فهنقسم أربعتاشر على تلاتة، وبما إن أربعتاشر مش من مضاعفات التلاتة، فهنشوف أقرب مضاعف من مضاعفات التلاتة للأربعتاشر بحيث إنه ما يكونش أكبر منه، فبما إن أربعتاشر بيقع ما بين اتناشر وخمستاشر، يبقى أقرب ناتج لعملية قسمة أربعتاشر على تلاتة هو أربعة، فهنكتب أربعة في الناتج بعدين نضرب في التلاتة، وأربعة في تلاتة بيساوي اتناشر، بعدين نطرح أربعتاشر ناقص اتناشر هيساوي اتنين، يبقى الكسر أربعتاشر على تلاتة بيساوي: أربعة اللي هي في الناتج، واتنين على تلاتة اللي هي باقي عملية القسمة مقسوم على المقسوم عليه.

نكرر نفس الخطوات مع الكسر التاني خمستاشر على سبعة، فبما إن الواحد أصغر من السبعة وخمستاشر مش من مضاعفات السبعة، فهنشوف أقرب مضاعف أصغر من خمستاشر، وبما إن خمستاشر واقعة ما بين أربعتاشر وواحد وعشرين، يبقى أقرب ناتج لعملية قسمة خمستاشر على سبعة هو اتنين، فهنكتبه في الناتج بعدين نضرب اتنين في سبعة، فهيبقى الناتج أربعتاشر، بعدين نطرح خمستاشر ناقص أربعتاشر بيساوي واحد، يبقى الكسر خمستاشر على سبعة بيساوي: اتنين اللي هي في الناتج، وواحد على سبعة اللي هي باقي القسمة مقسوم على المقسوم عليه.

كده اتبقى الكسر الأخير اتنين وعشرين على سبعة، برضو هنلاقي اتنين أصغر من سبعة واتنين وعشرين مش من مضاعفات السبعة، فهنشوف أقرب مضاعف للسبعة بحيث إنه يكون أصغر من اتنين وعشرين، فبما إن اتنين وعشرين واقعة ما بين واحد وعشرين وتمنية وعشرين، يبقى أقرب ناتج لعملية قسمة اتنين وعشرين على سبعة هو تلاتة، فهنكتبها في الناتج بعدين نضرب تلاتة في سبعة هيساوي واحد وعشرين، بعدين نطرح اتنين وعشرين ناقص واحد وعشرين هيساوي واحد، ده معناه إن اتنين وعشرين على سبعة هيساوي: تلاتة من الناتج، وواحد على سبعة اللي هو باقي القسمة مقسومًا على المقسوم عليه.

يبقى كمية الدقيق هي أربعة واتنين على تلاتة كوب، وكمية الزبدة هي اتنين وواحد على سبعة كوب، وكمية السكر هي تلاتة وواحد على سبعة كوب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.