تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: فك الفرق بين مربعين

أحمد مدحت

استخدم متطابقة الفرق بين مربعين لإيجاد مفكوك (٣ﺃ + ٧)(٣ﺃ − ٧).

٠١:٥١

‏نسخة الفيديو النصية

عندنا في المثال عايزين نستخدم متطابقة الفرق بين مربعين؛ علشان نوجد مفكوك تلاتة أ زائد سبعة، في تلاتة أ ناقص سبعة.

بالنسبة لمتطابقة الفرق بين مربعين، فهي بتوضّح إن حاصل ضرب مجموع حدّين في الفرق بينهم بيكون عبارة عن الفرق بين مربعَي الحدين دول. فلو عندنا الصورة العامة لحاصل ضرب مجموع حدين في الفرق بينهم على الشكل: س زائد ص، في س ناقص ص، فحاصل الضرب يساوي مربع س ناقص مربع ص. يعني هيبقى س زائد ص، في س ناقص ص، يساوي س تربيع ناقص ص تربيع. والمقدار س تربيع ناقص ص تربيع بنسمّيه الفرق بين مربعين. وهي دي متطابقة الفرق بين مربعين.

وإحنا عندنا في المثال عايزين نوجد مفكوك تلاتة أ زائد سبعة، في تلاتة أ ناقص سبعة. فبالنسبة للقوس الأول، هنلاقيه عبارة عن مجموع تلاتة أ وسبعة. أمّا القوس التاني فهو الفرق بين تلاتة أ وسبعة. يعني إحنا عايزين نوجد مفكوك حاصل ضرب مجموع حدين، في الفرق بينهم، واللي هيكون عبارة عن الفرق بين مربعَي الحدين دول. معنى كده إن هيبقى تلاتة أ زائد سبعة، في تلاتة أ ناقص سبعة، يساوي تلاتة أ الكل تربيع ناقص سبعة تربيع. وده اللي بيوضحه متطابقة الفرق بين مربعين.

بعد كده بالنسبة لتلاتة أ الكل تربيع، فهو يساوي تسعة أ تربيع. أمّا سبعة تربيع، فهو يساوي تسعة وأربعين. بالتالي تلاتة أ زائد سبعة، في تلاتة أ ناقص سبعة، يساوي تسعة أ تربيع ناقص تسعة وأربعين. بكده هيبقى مفكوك تلاتة أ زائد سبعة، في تلاتة أ ناقص سبعة، يساوي تسعة أ تربيع ناقص تسعة وأربعين.