فيديو: التحويل من البوصات إلى أقدام

أكمل: ٦٢٣ بوصة = _ قدم _ بوصة.

٠٥:٥٧

‏نسخة الفيديو النصية

أكمل: ستمية تلاتة وعشرين بوصة يساوي نقط قدم ونقط بوصة.

يعني إحنا دلوقتي محتاجين نعرف الستمية تلاتة وعشرين بوصة دول بيمثّلوا كام عدد من الأقدام. وهيتبقّى عدد من البوصات مش هيكمّل قدم. فهيبقى بيمثّلوا كام قدم، وكام بوصة؟ يا ترى إيه العلاقة بين وحدة القدم والبوصة؟ القدم الواحد بيكافئ اتناشر بوصة. والوحدتين دول من وحدات قياس الأطوال. طب بما إن القدم بيساوي اتناشر بوصة، طب لو إحنا مثلًا عندنا عشر أقدام هنعمل إيه؟ هنضرب العشرة دي في واحد. وهنضرب العشرة الجهة التانية في اتناشر؛ عشان نقدر نعرف ما يقابلها بالبوصات. يعني لمّا جينا نحوّل من قدم إلى بوصة عملنا إيه؟ ضربنا في اتناشر. العشر أقدام اللي كنا عايزين نعرف إيه اللي بيكافئهم بالبوصات، ضربناهم في اتناشر. يبقى كده بصورة عامة لمّا آجي أحوّل من القدم إلى البوصة، بنضرب في اتناشر.

طب لو عندي العكس؛ لو عندي عدد البوصات مثلًا اتناشر بوصة، أعرف دول إزاي بيكافئوا كام قدم؟ إحنا عارفين إن كل اتناشر بوصة هيبقوا بيكافئوا واحد قدم. طب لو عندنا أربعة وعشرين بوصة؛ طب لو عندنا أربعة وعشرين بوصة، نقدر نقسمّهم لكام اتناشر؟ بحيث إن إحنا نقدر نعرف … كل اتناشر منهم هيبقوا قدم، فنعرف كام اتناشر. عدد مجموعات اللي بتتكوّن من اتناشر، هيبقى هو ده عدد الأقدام. يعني هنعمل إيه؟ ببساطة هنقسم على اتناشر؛ عشان نشوف نقدر نكوّن كام مجموعة من اتناشر. هنلاقي إن العدد اتنين، اتنين قدم. يبقى لمّا نيجي نحوّل من بوصة إلى ما يقابلها من أقدام، بنعمل عملية قسمة على اتناشر بالشكل ده.

طب دلوقتي إحنا معطى عندنا في السؤال الطول بالبوصات، عايزين نشوف بقى بعد ما نحوّله لأقدام هيبقى إيه. يعني بنحوّل من بوصة إلى قدم، يبقى هنعمل عملية قسمة على اتناشر. هنعملها باستخدام القسمة المطوّلة؛ عشان نقدر نوجد بسهولة باقي القسمة. لمّا نيجي نقسم هنقول ستة على اتناشر، مش هيدّيني عدد صحيح. مش هينفع نقسم عدد بيتكوّن من رقم واحد على عدد بيتكوّن من رقمين، ويدّينا الناتج عدد صحيح. فهناخد بالتالي الرقمين مع بعض؛ هنقسم اتنين وستين على اتناشر.

إحنا محتاجين نشوف إيه العدد اللي لو ضربناه في اتناشر، هيدّينا اتنين وستين أو أقرب ما يكون لاتنين وستين. بحيث إن هو بس ما يتخطّاش الناتج اتنين وستين. طب خلّينا نشوف كده حاصل ضرب اتناشر في واحد، هيبقى اتناشر. حاصل ضرب اتناشر في اتنين، هيبقى بيساوي … اتناشر واتناشر، يعني أربعة وعشرين. عايزين نشوف دلوقتي حاصل ضرب اتناشر في تلاتة. اتنين في تلاتة بستة، واحد في تلاتة بتلاتة، يبقى ستة وتلاتين. اللي هو أزيَد باتناشر من حاصل الضرب اللي قبله. هنكمّل ونشوف حاصل ضرب اتناشر في أربعة. اتنين في أربعة بتمنية، واحد في أربعة بأربعة، يبقى تمنية وأربعين. برضو هنلاقيه أزيَد بمقدار اتناشر عن حاصل الضرب اللي قبله.

هنكمّل ونشوف حاصل ضرب اتناشر في خمسة. اتنين في خمسة بعشرة، صفر ونحتفظ بالواحد فوق خانة العشرات. واحد في خمسة بخمسة، وواحد ستة. يعني حاصل الضرب ده ستين، بزيادة اتناشر عن حاصل الضرب السابق. دلوقتي إحنا وصلنا لحاصل ضرب ستين. إحنا كنا بندوّر على حاصل ضرب أقرب ما يكون لاتنين وستين. لو كمّلنا حاصل الضرب التالي، هيبقى أزيَد من ستين باتناشر. بس إحنا دلوقتي اتنين وستين أزيَد من ستين باتنين بس. يبقى هنُقَف هنا، وهناخد العدد خمسة. يبقى لمّا نقسم اتنين وستين على اتناشر، أقرب حاجة هتدّيني ناتج أقرب لاتنين وستين هو الخمسة.

هنحطّ خمسة هنا، وبعدين نُجري عملية الضرب. خمسة في اتناشر يساوي ستين. بعد كده بنُجري عملية طرح. صفر [اتنين]‎ ناقص اتنين [صفر]‎ اتنين، وستة ناقص ستة بصفر. الخطوة اللي بعد كده هي إننا بننزّل الرقم اللي عليه الدور اللي هو التلاتة. دلوقتي عايزين نقسم تلاتة وعشرين على اتناشر. لو بصّينا على جدول الضرب اللي قدّامنا. هنلاقي إن العدد اللي يدّينا أقرب حاصل ضرب للتلاتة وعشرين، هو حاصل ضرب اتناشر في واحد. لأن حاصل ضرب اتناشر في اتنين أربعة وعشرين، وده تخطّى العدد اللي إحنا بنقسمه. فبالتالي هيبقى اتناشر في واحد. يبقى لمّا نقسم تلاتة وعشرين على اتناشر، هيبقى خارج القسمة هو واحد.

هنُجري عملية الضرب، واحد في اتناشر هيساوي اتناشر. وبعدين نعمل عملية الطرح. تلاتة ناقص اتنين بيساوي واحد، واتنين ناقص واحد بيساوي واحد. المفروض إن إحنا نكمّل الخطوات ما دام الناتج ما انتهاش بصفر. بس العدد حداشر اللي عندنا لو جينا نقسمه على اتناشر، مش هيدّيني عدد صحيح؛ لأن حداشر أقل من اتناشر. فهنُقَف في خطوات القسمة على كده. هيبقى عندنا خارج القسمة هو واحد وخمسين، وعندنا باقي قسمة حداشر. ده معناه إننا لو جينا نقسّم ستمية تلاتة وعشرين إلى مجموعات من اتناشر، اللي هي كل مجموعة منهم هتمثّل قدم. هيطلع عندنا عدد واحد وخمسين من المجموعات الكاملة، يعني واحد وخمسين قدم. وهيتبقّى حداشر بوصة، مش هيكمّلوا قدم واحدة.

فكده نقدر نقول إن ستمية تلاتة وعشرين بوصة، هيبقوا بيساووا واحد وخمسين قدم، وحداشر بوصة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.