تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: حل معادلات خطية ذات خطوتين في مجموعة الأعداد الصحيحة

أحمد مدحت

أوجد مجموعة حل ﺱ/٤ − ٣ = −٥ في ﺹ.

٠٢:٠٤

‏نسخة الفيديو النصية

عندنا في المثال، عايزين نوجد مجموعة حلّ المعادلة: س على أربعة، ناقص تلاتة يساوي سالب خمسة في ص. حيث ص هي مجموعة الأعداد الصحيحة.

معنى إن إحنا عايزين نحلّ المعادلة اللي عندنا، إن إحنا عايزين نوجد قيمة س. فبالتالي عايزين نخلّي س في طرف لوحدها من الطرفين بتوع المعادلة. فبالتالي هنحتاج نتخلّص من سالب تلاتة. وكمان نتخلّص من الأربعة اللي موجودة في المقام. فهنبدأ نكتب المعادلة اللي عندنا مرة كمان. والمعادلة هي: س على أربعة، ناقص تلاتة يساوي سالب خمسة.

بعد كده أول حاجة هنعملها، إن إحنا نتخلّص من سالب تلاتة. وده هيكون من خلال إن إحنا هنضيف لطرفَي المعادلة تلاتة. فلمّا هنضيف تلاتة لطرفَي المعادلة، هيبقى عندنا: س على أربعة، ناقص تلاتة، زائد تلاتة يساوي سالب خمسة زائد تلاتة. وبكده هيبقى قدرنا نتخلّص من سالب تلاتة. وده لأن سالب تلاتة زائد تلاتة يساوي صفر. معنى كده إن هيبقى عندنا س على أربعة يساوي سالب خمسة زائد تلاتة، يعني يساوي سالب اتنين. كده إحنا في أول خطوة، اتخلّصنا من سالب تلاتة.

في الخطوة اللي بعد كده، هنتخلّص من الأربعة اللي موجودة في المقام. وده هيكون من خلال إن إحنا هنضرب طرفَي المعادلة في أربعة. يعني هيبقى عندنا س على أربعة، في أربعة يساوي سالب اتنين في أربعة. وَ س على أربعة، في أربعة هيساوي س. وبكده هيبقى قدرنا نتخلّص من الأربعة اللي موجودة في المقام. معنى كده إن هيبقى الطرف الأيمن عبارة عن س. أمّا الطرف الأيسر، فهو عبارة عن سالب اتنين في أربعة، يعني هيساوي سالب تمنية. معنى كده إن س تساوي سالب تمنية.

بكده يبقى أوجدنا قيمة س، واللي هي سالب تمنية. وبما إن العدد سالب تمنية بينتمي لمجموعة الأعداد الصحيحة، بالتالي هتبقى مجموعة الحل للمعادلة اللي عندنا هي: المجموعة سالب تمنية.