تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد الوسيط لمجموعة من البيانات وتفسيرُه

أحمد مدحت

يوضح الفيديو مفهوم الوسيط لمجموعة بيانات، وكيفية إيجاده، مع أمثلة توضيحية.

٠٤:٥٠

‏نسخة الفيديو النصية

هنتكلم عن إيجاد الوسيط لمجموعة بيانات. في الفيديو ده هنعرف إيه هو الوسيط لمجموعة بيانات، وإزاي نوجده.

بالنسبة للوسيط فهو يعتبر مقياس من مقاييس النزعة المركزية، واللي هي عبارة عن أعداد بتوصف مركز تجمُّع مجموعة البيانات. أما تعريف الوسيط، فهو عبارة عن القيمة اللي بتتوسط مجموعة بيانات مترتبة ترتيب تصاعدي. ولو كان بيتوسط مجموعة البيانات قيمتين، فالوسيط هيبقى عبارة عن الوسط الحسابي للقيمتين اللي بيتوسطوا مجموعة البيانات. والوسيط بيكون مفيد أكتر لما يكون في مجموعة البيانات قيم متطرفة، وما يكونش فيه فجوات كبيرة في البيانات اللي موجودة في المنتصف.

كده إحنا عرفنا إيه هو الوسيط لمجموعة بيانات، بعد كده هنشوف مثال على إيجاد الوسيط لمجموعة بيانات.

عندنا في المثال عايزين نوجد الوسيط لمجموعة القيم: ستة، وتمنية، وستاشر، وستة، وتسعتاشر. من تعريف الوسيط، الوسيط هو القيمة اللي بتتوسط مجموعة بيانات مترتبة ترتيب تصاعدي، فأول حاجة هنعملها إن إحنا هنرتب مجموعة القيم اللي عندنا ترتيب تصاعدي. فلما هنرتب ترتيب تصاعدي، فهيبقى عبارة عن: ستة، وستة، وتمنية، وستاشر، وتسعتاشر. بعد كده هنشوف القيمة اللي بتتوسط مجموعة البيانات بعد الترتيب، فهنلاقي إن التمنية هي القيمة اللي بتتوسط مجموعة القيم اللي عندنا بعد الترتيب؛ بالتالي هيبقى الوسيط لمجموعة القيم: ستة، وتمنية، وستاشر، وستة، وتسعتاشر؛ هو تمنية.

هنشوف مثال كمان، عندنا في المثال عايزين نوجد الوسيط للأعداد: اتنين وتسعة من عشرة، وخمسة وأربعة من عشرة، وخمسة وواحد من عشرة، وتلاتة وسبعة من عشرة، وتلاتة وأربعة من عشرة، وواحد وتسعة من عشرة، وستة واحد من عشرة، وتمنية وواحد من عشرة، واتناشر وأربعة من عشرة، واتنين وستة من عشرة، وتمنية وتمنية من عشرة، وخمسة وخمسة من عشرة.

أول حاجة هنعملها إن إحنا هنرتب مجموعة الأعداد اللي عندنا ترتيب تصاعدي، فهنلاقي إن الترتيب هو: واحد وتسعة من عشرة، واتنين وستة من عشرة، واتنين وتسعة من عشرة، وتلاتة وأربعة من عشرة، وتلاتة وسبعة من عشرة، وخمسة وواحد من عشرة، وخمسة وأربعة من عشرة، وخمسة وخمسة من عشرة، وستة وواحد من عشرة، وتمنية وواحد من عشرة، وتمنية وتمنية من عشرة، واتناشر وأربعة من عشرة.

بعد كده هنشوف القيمة اللي بتتوسط الترتيب، فهنلاقي مش موجود قيمة واحدة بس، لكن موجود قيمتين؛ وهم: خمسة وواحد من عشرة، وخمسة وأربعة من عشرة. والوسيط في الحالة دي هيبقى عبارة عن الوسط الحسابي للقيمتين اللي بيتوسطوا الترتيب؛ يعني هنقسم مجموع القيمتين على اتنين؛ بالتالي الوسيط هيساوي خمسة وواحد من عشرة زائد خمسة وأربعة من عشرة على اتنين. فلما هنجمع هنلاقي الوسيط يساوي عشرة وخمسة من عشرة على اتنين؛ يعني الوسيط يساوي خمسة وخمسة وعشرين من مية. بكده يبقى إحنا أوجدنا الوسيط لمجموعة الأعداد اللي عندنا.

هنشوف مثال كمان. عندنا في المثال جدول وعايزين نوجد الوسيط لمجموعة البيانات اللي موجودة في الجدول ده. أول حاجة هنعملها إن إحنا هنرتب مجموعة البيانات اللي عندنا تصاعديًّا، فبالنسبة للترتيب فهيبقى: تلاتة، وخمسة، وستة، وتسعة، وحداشر، وسبعة وعشرين. بعد كده هنحدد القيمة اللي بتتوسط الترتيب، فهنلاقي إن إحنا عندنا قيمتين بيتوسطوا الترتيب؛ هم: ستة، وتسعة. بالتالي الوسيط هيبقى عبارة عن الوسط الحسابي للقيمتين دول، يعني الوسيط يساوي ستة زائد تسعة على اتنين. ولما هنجمع هنلاقي الوسيط يساوي خمستاشر على اتنين، يعني يساوي سبعة ونص، وهو ده المطلوب.

بكده في الفيديو ده عرفنا إن الوسيط يعتبر مقياس من مقاييس النزعة المركزية، وإن هو عبارة عن القيمة اللي بتتوسط مجموعة بيانات مترتبة ترتيب تصاعدي. ولو بيتوسط مجموعة البيانات قيمتين، فالوسيط هيبقى عبارة عن الوسط الحسابي للقيمتين اللي هيتوسطوا مجموعة البيانات. كمان عرفنا إن إحنا بنستخدم الوسيط لما يكون في مجموعة البيانات قيم متطرفة وما يكونش فيه فجوات كبيرة في البيانات اللي موجودة في المنتصف. بعد كده عرفنا إزاي نوجد الوسيط لمجموعة بيانات، فكانت الخطوة الأولى إن إحنا بنرتب القيم اللي في مجموعة البيانات اللي عندنا تصاعديًّا، بعد كده بنشوف القيمة اللي بتتوسط مجموعة البيانات بعد ترتيبها، القيمة دي بتبقى هي الوسيط. أما لو كان بيتوسط مجموعة البيانات قيمتين، فالوسيط هيساوي الوسط الحسابي للقيمتين دول؛ يعني هنقسم مجموع القيمتين على اتنين.