فيديو: مضاعفات عدد صحيح

أوجد مضاعفات العددين ٣، ٥ التي تقل عن ٦٥.

٠٥:٠٨

‏نسخة الفيديو النصية

أوجد مضاعفات العددين تلاتة وخمسة، التي تقل عن خمسة وستين.

دلوقتي المقصود من إننا نوجد مضاعفات العددين تلاتة وخمسة، يعني المضاعفات المشتركة للعددين تلاتة وخمسة. عايزين مجموعة المضاعفات المشتركة ليهم، اللي أقل من خمسة وستين. طب هنكتب دلوقتي مضاعفات الخمسة، لغاية ما نوصل لخمسة وستين، ونشوف أيّ من مضاعفاتها هيكون في نفس الوقت مضاعف للعدد تلاتة.

مضاعفات العدد خمسة بتيجي من إننا هنضرب العدد خمسة في أيّ عدد صحيح موجب، من أول صفر حتى الـ ما لا نهاية.

دلوقتي هنبدأ بخمسة في صفر. يبقى أول مضاعف عندنا هيبقى حاصل ضرب خمسة في صفر، يعني صفر. المضاعف اللي بعده جاي من حاصل ضرب خمسة في واحد، اللي هو هيبقى خمسة. واللي بعده جاي كحاصل ضرب خمسة في اتنين، هيبقى عشرة. واللي بعده حاصل ضرب خمسة في تلاتة، يعني خمستاشر. واللي بعده حاصل ضرب خمسة في أربعة، يعني عشرين. واللي بعده حاصل ضرب خمسة في خمسة، يبقى خمسة وعشرين.

واللي بعده هيبقى حاصل ضرب خمسة في ستة، اللي هو تلاتين. واللي بعده حاصل ضرب خمسة في سبعة، يبقى خمسة وتلاتين. اللي بعده حاصل ضرب خمسة في تمنية، يبقى أربعين اللي بعده حاصل ضرب خمسة في تسعة، يعني خمسة وأربعين. واللي بعده حاصل ضرب خمسة في عشرة، يعني خمسين.

واللي بعده حاصل ضرب خمسة في حداشر، يبقى خمسة وخمسين. اللي بعده حاصل ضرب خمسة في اتناشر، يبقى ستين. واللي بعده حاصل ضرب خمسة في تلتاشر، يبقى خمسة وستين. وهنقف لحدّ كده؛ عشان مطلوب مننا أصلًا المضاعفات المشتركة للعددين اللي أقل من خمسة وستين. فيبقى حتى خمسة وستين ده إحنا هنقف عليه مش هناخده.

دلوقتي هنختبر كل مضاعف من مضاعفات العدد خمسة، نختبر قابليته في إنه هو يقبل القسمة على تلاتة؛ فبالتالي يبقى من مضاعفات العدد تلاتة. هنبدأ بأول مضاعف عندنا اللي هو صفر. صفر مضاعف لأيّ عدد من الأعداد. فبالتالي هيبقى أول مضاعف مشترك عندنا للعددين تلاتة وخمسة.

بعد كده هنشوف العدد خمسة. خمسة ما يقبلش القسمة على التلاتة بدون وجود باقي. المضاعف اللي بعد كده، اللي هو عشرة. عشرة دلوقتي ما يقبلش القسمة على التلاتة برضو بدون وجود باقي، يعني ما ينفعش يبقى حاصل ضرب تلاتة في أيّ عدد صحيح.

المضاعف اللي بعده اللي هو خمستاشر. عشان نقدر نعرف لو عندنا عدد مكوّن من رقمين، نعرف بسهولة إزاي هو بيقبل القسمة على التلاتة ولّا لأ؟ هنجمع الأرقام اللي بيتكوّن منها العدد ده. لو المجموع بتاعهم يقبل القسمة على التلاتة، يبقى العدد بيقبل القسمة على تلاتة، أو من مضاعفات التلاتة. فمثلًا خمستاشر، مجموع الرقمين اللي بيتكوّن منهم العدد خمستاشر، خمسة زائد واحد، يبقى ستة. ستة بيقبل القسمة على تلاتة. يبقى بالتالي خمستاشر بيقبل القسمة على التلاتة. يبقى العدد خمستاشر من مضاعفات التلاتة كمان. يبقى هنكتبه في المضاعفات المشتركة للعددين تلاتة وخمسة.

المضاعف اللي بعد كده، اللي هو عشرين. عشرين لو جمعنا الرقمين اللي بيتكوّن منهم، اتنين زائد صفر يطلع مجموعهم اتنين. واتنين لا تقبل القسمة على تلاتة. يبقى ده مش من مضاعفات العدد تلاتة. المضاعف اللي بعده اللي هو خمسة وعشرين. بنفس الطريقة هنجمع الرقمين اللي بيتكوّن منهم العدد. خمسة زائد اتنين هيبقى سبعة، سبعة لا تقبل القسمة على تلاتة بدون وجود باقي. فبالتالي ده مش من مضاعفات العدد تلاتة.

المضاعف اللي بعده اللي هو تلاتين. لو جمعنا الرقمين اللي بيتكوّن منهم، هيبقى مجموعهم تلاتة. طبعًا تقبل القسمة على تلاتة. فيبقى تلاتين مضاعف مشترك للعددين تلاتة وخمسة. المضاعف اللي بعد كده خمسة وتلاتين. لو جينا نجمع خمسة زائد تلاتة، هيبقى مجموعهم تمنية. تمنية لا تقبل القسمة على التلاتة بدون وجود باقي. يبقى خمسة وتلاتين مش من مضاعفات العدد تلاتة.

المضاعف اللي بعد كده اللي هو أربعين. برضو مش من مضاعفات العدد تلاتة؛ لأن مجموع أربعة زائد صفر، هيبقى أربعة، لا تقبل القسمة على تلاتة. المضاعف اللي بعده، اللي هو خمسة وأربعين، لو جينا نجمع الرقمين اللي بيتكوّن منهم العدد. خمسة زائد أربعة، هيبقى مجموعهم تسعة. تسعة تقبل القسمة على تلاتة. فيبقى خمسة وأربعين من مضاعفات العدد تلاتة.

المضاعف اللي بعده، اللي هو خمسين. خمسة زائد صفر بيساوي خمسة. وخمسة لا تقبل القسمة على تلاتة بدون وجود باقي، تبقى مش من مضاعفات العدد تلاتة. اللي بعده خمسة وخمسين. لو جمعنا خمسة زائد خمسة، مجموعهم عشرة. عشرة لا تقبل القسمة على تلاتة بدون وجود باقي، فخمسة وخمسين مش من مضاعفات العدد تلاتة. اللي بعده اللي هو ستين. ستة زائد صفر هيساوي ستة. وستة تقبل القسمة على تلاتة، فيبقى ستين من مضاعفات العدد تلاتة.

وبكده يبقى أوجدنا مضاعفات العددين تلاتة وخمسة اللي أقل من خمسة وستين، وهي: صفر، خمستاشر، تلاتين، خمسة وأربعين، ستين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.