تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ترتيب الأعداد الصحيحة

سوزان فائق

يوضح الفيديو كيفية ترتيب الأعداد الصحيحة حتى الملايين، باستخدام طريقتي القيمة المكانية وخط الأعداد.

٠٦:٤٤

‏نسخة الفيديو النصية

في الفيديو ده هنتكلّم عن ترتيب الأعداد الصحيحة. إزّاي نرتب الأعداد لغاية الملايين.

هنبدأ بالأرقام الصغيرة الأول مِ الآلاف. وهنرتب بطريقتين. أول طريقة هتبقى عن طريق استخدام القيمة المكانية. والطريقة التانية اللي ممكن نستخدمها هي على خط الأعداد.

بيقول لنا رتّب الأعداد التالية من الأكبر إلى الأصغر: تلات آلاف ربعمية ستة وخمسين، أربعة آلاف تلتمية ستة وخسمين، تلات آلاف ربعمية خمسة وستين، ست آلاف خمسمية تلاتة وأربعين.

نفس طريقة الترتيب اللي هنستخدمها في الأرقام الصغيرة، هي نفسها اللي هنستخدمها في الأرقام الكبيرة.

أول طريقة عندنا اللي هي القيمة المكانية. هنرتب الأرقام في خاناتها للقيمة المكانية. يعني الستة في الآحاد، هيبقى تحتيها الستة اللي في العدد اللي بعده، وتحتيها الخمسة اللي في العدد اللي بعده، تحتيها التلاتة اللي في العدد اللي بعده.

بعد كده هنرتب خانات العشرات. اللي هي خمسة في العدد الأولاني، وخمسة في العدد التاني، وستة في العدد التالت، وأربعة في العدد الرابع.

هنيجي نرتب المئات في العدد الأول. هتبقى الأربعة، وبعدين التلاتة، وبعدين الأربعة، وبعدين الخمسة.

ده الوحدات. هنبتدي عند الآلاف. هنلاقي أول عدد فيه تلاتة، وتاني عدد أربعة، وتالت عدد فيه التلاتة، ورابع عدد فيه الستة. ده اللي هو الخانات اللي بتبدأ فيها الآلاف، ودي كانت آحاد الآلاف. طيب هنعمل إيه؟ هنبص على أقصى خانة في الشمال، اللي هي عندي هنا الآلاف. هنشوف أكبر رقم فيهم كام، هنلاقي إن الستة أكبر رقم. لو فيه رقم زيها متساوي معاها، يبقى هنقارن ما بين الرقمين دول ونشوف مين أكبر في الخانة اللي بعده. طيب دلوقتي الستة دي أعلى واحدة، وما فيش حاجة تانية زيها، يبقى أكبر عدد موجود عندي هيبقى الست آلاف خمسمية تلاتة وأربعين.

بعد ما جبنا أكبر عدد عندنا، هنشوف في نفس الخانة فيه عدد تاني ممكن يبقى أكبر ولا لأ. هنبص لو فيه خانة فيها رقم أعلى؛ يعني الأربعة هنا أعلى من التلاتة والتلاتة. يبقى معنى كده إن الرقم اللي بعد الستة على طول في الخانات هيبقى الأربعة. يعني العدد ده هيبقى أقل من الست آلاف، اللي هو أربعة آلاف تلتمية ستة وخسمين هييجي بعده على طول.

هنيجي نبصّ بعد كده هنلاقي إن فيه تلاتة وفيه تلاتة. يبقى العددين دول هم اللي هنقارن ما بينهم. هنرتّب مين الأصغر فيهم، ومين اللي بعد الأربعة آلاف على طول. هنبص عَ الخانة اللي بعد كده. هنلاقي إن الخانة بعد كده أربعة وأربعة متساويين. ننزل للخانة اللي أقل. هنلاقي إن الستة أعلى مِ الخمسة. يبقى معنى كده إن العدد ده تلات آلاف ربعمية خمسة وستين، أكبر من التلات آلاف ربعمية ستة وخمسين.

يبقى كده عرفنا نرتب مين الأكبر إلى الأصغر. أصغر واحد تلات آلاف ربعمية ستة وخمسين. وأكبر واحد ست آلاف خمسمية تلاتة وأربعين.

هنشوف الطريقة التانية للترتيب اللي هي على خط الأعداد. عندنا خط الأعداد بيبقى فيه المسافات بين الأعداد متساوية. في خط الأعداد أكبر عدد بيبقى اللي أقصى اليمين. وأصغر عدد اللي بيبقى أقصى الشمال. طيب لو إحنا عندنا عدد سبعة وأربعين ألف ميتين تمنية وتلاتين، هنحطه فين على خط الأعداد؟ سبعة وأربعين ألف، يبقى هيبقى واقع ما بين الستة وأربعين ألف والتمنية وأربعين ألف. هيبقى في حدود هنا كده. أقرب للتمنية وأربعين ألف. يعني هنا سبعة وأربعين ألف ميتين تمنية وتلاتين.

عندنا عدد تاني عايزين نشوف هو أقل ولا أكبر من العدد ده، اللي هو خمسة وأربعين ألف تمنمية تمنية وستين. خمسة وأربعين ألف تمنمية تمنية وستين، على خط الأعداد هيبقى ما بين أربعة وأربعين ألف والستة وأربعين ألف، وهيبقى أقرب للستة وأربعين ألف. يعني هيبقى هنا.

من خط الأعداد العدد اليمين هو اللي بيبقى الأكبر، والعدد الشمال بيبقى أصغر منه. يبقى معنى كده إن السبعة وأربعين ألف أكبر من الخمسة وأربعين ألف. يعني لو قال لنا رتب الأكبر إلى الأقل، هيبقى الأكبر عندي سبعة وأربعين ألف ميتين تمنية وتلاتين، والأصغر منه خمسة وأربعين ألف تمنمية تمنية وستين.

نقلب الصفحة ونتكلم على أعداد اللي فيها الملايين.

بيقول لنا استخدام الزيت في الدول الآتية بالأعداد دي.

واضح إن إحنا عندنا الخانة اللي ظهرت معانا اللي هي خانة آحاد الملايين، اللي هي فيها الاتنينات والوحايد. وفيه بعد كده أقل منها هتبقى الخانات بتاعة الألوف. وبعد كده هتبقى الوحدات. يعني دي الوحدات، الألوف، الملايين.

أول حاجة هنعملها هنبدأ من عند أقصى خانة في الشمال، ونشوف الأعداد الأكبر. هنلاقي إن الاتنين زي الاتنين زي الاتنين، والواحد أقل منهم. طيب يبقى معنى كده إن هندخل الخانة الأقل. هنلاقي هنا الواحد، وهنلاقي هنا اتنين وهنا الواحد. يبقى دي أعلى واحدة. يبقى أول عدد عندنا هيبقى كندا. ليه ما خدناش التسعة؛ لأن التسعة جاية مع الواحد، والواحد أقل من الاتنين، الاتنين أكبر منها. فبنقارن بين التلاتة الأولانيين بس. وواضح من هنا إن أقل واحدة هتبقى في الملايين اللي هي دي. يعني هنيجي نحط آخر واحدة في الترتيب عندنا اللي هي رقم أربعة، هتبقى أمريكا. وهنقارن ما بين العددين اللي باقيين اللي في النص، اللي همّ عندنا هنا الهند والبرازيل.

كده إحنا خلصنا كندا وأمريكا. هيبقى عندنا العددين اللي هنقارن ما بينهم، اللي همّ البرازيل والهند. هنلاقي إن الخانة اللي ظهرت بعد المئات على طول في الألوف اللي هي العشرات في الألوف. هنلاقي هنا فيه تسعة، وهنلاقي هنا فيه تلاتة. التسعة أكبر من التلاتة. يبقي معنى كده إن البرازيل هتيجي عندنا بعد كندا على طول. وبعد كده هتيجي الهند. يبقى الترتيب بتاعي هيبقى: كندا، البرازيل، الهند، أمريكا.

يبقى كده عرفنا إزّاي نرتّب الأعداد لغاية الملايين