فيديو: شرح سبب كون الأعداد في المسائل الكلامية زوجية أو فردية

رانيا عدَّت ١٩ نباتًا في حديقتها، ولكن كانت ٤ من هذه النباتات أعشابًا ضارة. هل سيكون لديها عدد فردي أم زوجي من النباتات بعد أن تتخلص من هذه الأعشاب الضارة؟ ولماذا؟

٠٣:٥٦

‏نسخة الفيديو النصية

رانيا عدَّت تسعتاشر نباتًا في حديقتها. ولكن كانت أربعة من هذه النباتات أعشابًا ضارة. هل سيكون لديها عدد فردي، أم زوجي من النباتات، بعد أن تتخلص من هذه الأعشاب الضارة؟ ولماذا؟

عندنا بنت اسمها رانيا. كان عندها جنينة فيها زرْع. كانت زارعة تسعتاشر نبات. ولكن كان من التسعتاشر دول، أربعة بايظين، أو أربعة ضارّين، هيضرّوا النباتات التانية. فعلشان كده، هي كان لازم تشيلهم. يعني إيه تشيل أربع نباتات مِ التسعتاشر نبات؟ يعني تقول: تسعتاشر هنشيل منهم أربعة. والناتج اللي هيطلع هنا، هيبقى ده عدد النباتات الكويسة اللي اتبقّى عندها في الجنينة.

طيب السؤال هنا: هل سيكون لديها عدد فردي أم زوجي من النباتات؟ يعني العدد اللي هيطلع هنا ده، هل هيكون زوجي ولّا فردي؟ ده هو السؤال. وبعد ما نعرف هو زوجي ولّا فردي، نقول ليه اخترنا الاختيار ده.

طيب فأول حاجة هنعملها، هي إننا هنطرح تسعتاشر ناقص أربعة. علشان نطرح تسعتاشر ناقص أربعة، أول حاجة هنقول تسعة ناقص أربعة. هنطلع تسع صوابع على إيدينا بالشكل ده. وهنشيل منهم أربعة. واحد، اتنين، تلاتة، أربعة. دول الأربعة اللي شِلناهم. اتبقّى مين، أو اتبقّى كام؟ اتبقّى خمسة. فمعنى كده إن تسعة ناقص أربعة تساوي خمسة. طب بالنسبة للواحد ده، هينزل. فده معناه إن تسعتاشر ناقص أربعة يساوي خمستاشر.

طيب نبدأ نجاوب بقى على السؤال. هل الخمستاشر ده عدد زوجي ولّا فردي؟ الخمستاشر لو جينا قسّمناه لأزواج، هيتبقّى فرد لوحده، ولّا العدد كله هيبقى عبارة عن أزواج؟ تعالوا نجرّب. هنعمل كده؛ خمستاشر دايرة مثلًا. واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر، تلتاشر، أربعتاشر، خمستاشر.

عملنا خمستاشر شكل. نعملهم بقى أزواج. آدي ده زوج خِلص خلاص، اتنين، تلاتة، أربعة، خمسة، ستة، سبعة.آه اتبقّى ده. ليه حد نعمله زوج معاه؟ مالوش. يعني ده بقى مفرد لوحده، فرد، أو مفرد. فده معناه إن خمستاشر عدد فردي؛ لأن ما قدرناش نخلّيه كله أزواج. كده إحنا جاوبنا أول جزء من السؤال. يلّا نجاوب تاني جزء.

لماذا؟ ليه هو عدد فردي؟ نكتب إيه؟ لأننا عندما نضع؛ يعني لمّا نيجي نحطّ الخمستاشر عنصر، أو الدواير اللي إحنا عملناها يعني، في أزواج … إيه اللي بيحصل لمّا جينا نحطّهم في أزواج؟ لقينا إيه اللي جرى؟ يتبقّى عنصر واحد. لقينا فيه عنصر واحد لوحده مش عارفين نحطّه في زوج. فده السبب اللي خلّانا نقول إن خمستاشر عدد فردي. يبقى هي دي شكل الإجابة: خمستاشر عدد فردي؛ لأننا عندما نضع خمستاشر عنصر في أزواج، يتبقى عنصر واحد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.