فيديو: الكسور المتكافئة

يوضح الفيديو ما الكسور المتكافئة، ويوضح العمليات التي يتم إجراؤها على الكسور للحصول على كسور مكافئة لها، وأمثلة على ذلك.

٠٦:١٤

‏نسخة الفيديو النصية

الكسور المتكافئة.

في الفيديو ده هنتعلّم إيه هي الكسور المتكافئة، وإزّاي نعبّر عنها. في بعض الأحيان، ممكن نعبّر عن كسر معيّن بأكثر من طريقة. يعني مثلًا لو قدامنا حوض سمك، وفيه تمن سمكات، منهم أربعة لونهم أخضر. فممكن نعبّر عن الأسماك الخضراء بكسر، بإننا نقول إنها أربعة على تمنية من الأسماك. أو إننا نقول إن هي واحد على اتنين من الأسماك. وهنوضّح ده دلوقتي.

هيظهر قدامنا تلات أشكال. الشكل الأول بيوضّح مستطيل كامل. الشكل التاني بيوضّح مستطيل بنفس المساحة، متقسّم لجزئين متساويين. جزء منهم متلوّن. الشكل التالت بيوضّح مستطيل بنفس المساحة، متقسّم لتمن أجزاء. أربع أجزاء منهم متلوّنة. هنلاحظ إن الأربع أجزاء في الشكل التالت، مساوية للجزء في الشكل التاني. يبقى الشكل التاني والشكل التالت، بيعبّروا عن كسور متكافئة. الشكل التاني بيعبّر عن الكسر واحد على اتنين، أو نص. والشكل التالت بيعبّر عن الكسر أربعة على تمنية.

طيب دلوقتي عاوزين نوجد تلات كسور مكافئة لأربعة على تمنية. نتنقل لصفحة تانية، ونشوف هنعمل ده إزّاي. فيه طريقتين لإيجاد الكسور المتكافئة. واحد: باستخدام الضرب. ودي بتبقى بضرب البسط والمقام، في نفس العدد. يعني مثلًا، هنضرب البسط والمقام في اتنين. فلو الكسر أربعة على تمنية، ده هيساوي أربعة في اتنين، على تمنية في اتنين. وده هيساوي تمنية على ستاشر.

الطريقة التانية: باستخدام القسمة. ودي بتبقى بقسمة البسط والمقام، على نفس العدد. يعني مثلًا هنقسم البسط والمقام، على اتنين. فلو الكسر أربعة على تمنية، فده هيساوي أربعة على اتنين، على تمنية على اتنين. وده هيساوي اتنين على أربعة. ممكن برضو نقول إن لو الكسر اتنين على أربعة، فده هيساوي اتنين على اتنين، على أربعة على اتنين. وده هيساوي واحد على اتنين. وفي الحالة دي، ده برضو يبقى كسر مكافئ لأربعة على تمنية.

نلاحظ إن في حالة ضرب البسط والمقام، أو قسمتهم على نفس العدد. فده ما بيغيّرش من قيمة الكسر. يبقى الكسور المكافئة لأربعة على تمنية، هي: تمنية على ستاشر، واتنين على أربعة، وواحد على اتنين.

ممكن نستخدم الصور، وخط الأعداد، والأشكال المختلفة؛ لإيجاد الكسور المتكافئة. نتنقل لصفحة تانية، ونحلّ مثال. قرأت سمية تلاتة على أربعة من كتابها المفضّل. فباستخدام نماذج الكسور، عاوزين نوجد كسر مكافئ لِلّي قرأته.

الشكل اللي هيظهر قدامنا بيوضّح تلاتة على أربعة. والشكل اللي هيظهر تحته يوضّح شكل بنفس المساحة، متقسم لتمن أجزاء. يعني كل جزء بيمثّل واحد على تمنية. هنلاقي إن ست أجزاء منه، هتبقى مساوية لتلات أجزاء من الشكل الأول. يبقى الشكل الأول والشكل التاني، بيعبّروا عن كسور متكافئة. يعني تلاتة على أربعة، كسر مكافئ لستة على تمنية.

نتنقل لصفحة تانية، ونحل مثال تاني. هتظهر قدامنا صورة، متلوّن منها تمنية على أربعة وعشرين. عاوزين نوجد كسر مكافئ لتمنية على أربعة وعشرين، باستخدام صورة مماثلة.

هنحطّ صورة مماثلة على شمالها. بس المرة دي هتبقى متقسّمة لاتناشر جزء متساوي. هنلاقي إننا لو لوّنّا أربع أجزاء منها، هتبقى مساوية لتمن أجزاء من الصورة الأولى. وده معناه إن أربعة على اتناشر، كسر مكافئ لتمنية على أربعة وعشرين.

نتنقل لصفحة تانية، ونحل مثال باستخدام خط الأعداد. هيظهر قدامنا خط للأعداد. إيه الحرف اللي على خط الأعداد، اللي بيعبّر عن اتنين على تمنية؟ وعاوزين كسر مكافئ لاتنين على تمنية.

لو لاحظنا، هنلاقي خط الأعداد متقسّم لتمن أجزاء. وعشان نعبّر عن اتنين على تمنية، هيبقى بعد جزئين. وده معناه إن الحرف المعبّر عن الكسر هو: أ. ولو اعتبرنا كل جزئين على خط الأعداد، بجزء واحد. هيبقى الكسر المكافئ لاتنين على تمنية، هو: واحد على أربعة.

وبكده نبقى خلّصنا الفيديو ده. اللي اتكلمنا فيه عن الكسور المتكافئة، وإزّاي بنعبّر عنها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.