فيديو: إيجاد مساحة شكل بمعلومية مساحة آخَر في شكل مُركَّب

إذا كان ﺃﺏﺟد مستطيلًا مساحته ١‎٣٨٩٫٦ سم^٢، فأوجد مساحة الشكل ﺃﻃدﻫ.

٠٤:٥٧

‏نسخة الفيديو النصية

إذا كان أ ب ج د مستطيلًا، مساحته ألف تلتمية تسعة وتمانين وستة من عشرة سنتيمتر مربع. فأوجد مساحة الشكل أ د ط ﻫ.

في الشكل اللي عندنا، هنلاقي إن القطعة المستقيمة أ د، والقطعة المستقيمة ط ﻫ، قطران في الشكل أ ط د ﻫ. وكمان القطعة المستقيمة أ د، عمودية على القطعة المستقيمة ط ﻫ. والنقطة م منتصف كلًّا من القطعة المستقيمة أ د، والقطعة المستقيمة ط ﻫ. فمعنى كده إن في الشكل أ ط د ﻫ، القطران متعامدان، وينصّف كلًّا منهما الآخر. وبالتالي هيبقى الشكل أ ط د ﻫ، معيّن.

وصيغة مساحة المعيّن بتوضّح إن مساحة المعيّن تساوي حاصل ضرب طولا قطريه، على اتنين. وده معناه إن مساحة الشكل أ ط د ﻫ تساوي طول القطعة المستقيمة أ د، وطول القطعة المستقيمة ط ﻫ، على اتنين. وبالتالي علشان نوجد مساحة الشكل أ ط د ﻫ، محتاجين نوجد طول القطعة المستقيمة أ د، وطول القطعة المستقيمة ط ﻫ.

هنبدأ أول حاجة نوجد طول القطعة المستقيمة أ د. وإحنا عندنا في المعطيات، إن المستطيل أ ب ج د مساحته ألف تلتمية تسعة وتمانين وستة من عشرة سنتيمتر مربع. وصيغة مساحة المستطيل بتوضّح إن مساحة المستطيل تساوي الطول في العرض. معنى كده إن مساحة المستطيل أ ب ج د، تساوي طول القطعة المستقيمة أ د، في طول القطعة المستقيمة أ ب.

وبكده هيبقى طول القطعة المستقيمة أ د، يساوي مساحة المستطيل أ ب ج د، على طول القطعة المستقيمة أ ب. وإحنا عندنا إن مساحة المستطيل أ ب ج د، تساوي ألف تلتمية تسعة وتمانين وستة من عشرة سنتيمتر مربع. أمّا طول القطعة المستقيمة أ ب … فمن شكل اللي عندنا، هنلاقي إن طول القطعة المستقيمة أ ب يساوي ستة وعشرين وتسعة من عشرة سنتيمتر.

فلمّا هنعوّض، هنلاقي إن طول القطعة المستقيمة أ د، يساوي ألف تلتمية تسعة وتمانين وستة من عشرة، على ستة وعشرين وتسعة من عشرة. يعني هيبقى طول القطعة المستقيمة أ د، تقريبًا يساوي واحد وخمسين وستمية تمنية وخمسين من ألف سنتيمتر.

بعد كده هنوجد طول القطعة المستقيمة ط ﻫ. فمن خلال الشكل اللي عندنا، هنلاقي طول القطعة المستقيمة ط ﻫ، يساوي طول القطعة المستقيمة ط م، زائد طول القطعة المستقيمة م ﻫ. ومن الشكل اللي عندنا، بما إن طول القطعة المستقيمة ط م، يساوي طول القطعة المستقيمة م ﻫ. فهيبقى طول القطعة المستقيمة ط ﻫ، يساوي طول القطعة المستقيمة ط م، زائد طول القطعة المستقيمة ط م. يعني يساوي اتنين طول القطع المستقيمة ط م.

يعني معنى كده إن إحنا علشان نوجد طول القطعة المستقيمة ط ﻫ، محتاجين نوجد طول القطعة المستقيمة ط م. ومن الشكل اللي عندنا، الزاوية أ م ط زاوية قائمة. وده معناه إن قياس زاوية أ م ط يساوي تسعين درجة. ومن الشكل اللي عندنا، هنلاقي الشكل أ ب ط م شكل رباعي. ومجموع قياسات الزوايا الداخلية للشكل الرباعي، يساوي تلتمية وستين درجة. وده معناه إن قياس زاوية ب ط م يساوي تلتمية وستين درجة ناقص؛ قياس زاوية أ ب ط، زائد قياس زاوية ب أ م، زائد قياس زاوية أ م ط.

ومن الشكل اللي عندنا، قياس زاوية أ ب ط، يساوي تسعين درجة. وقياس زاوية ب أ م، يساوي تسعين درجة، وقياس زاوية أ م ط، يساوي تسعين درجة. يعني معنى كده … يعني معنى كده إن قياس زاوية ب ط م يساوي تلتمية وستين درجة ناقص؛ تسعين درجة، زائد تسعين درجة، زائد تسعين درجة. وتسعين درجة، زائد تسعين درجة، زائد تسعين درجة؛ يساوي ميتين وسبعين درجة.

فمعنى كده هيبقى قياس زاوية ب ط م، يساوي تلتمية وستين درجة ناقص ميتين وسبعين درجة. يعني يساوي تسعين درجة. فمعنى كده إن الشكل الرباعي أ ب ط م، جميع زواياه قائمة. وده معناه إن الشكل الرباعي أ ب ط م مستطيل. وده معناه إن طول القطعة المستقيمة ط م، يساوي طول القطعة المستقيمة أ ب.

ومن الشكل اللي عندنا، طول القطعة المستقيمة أ ب يساوي ستة وعشرين وتسعة من عشرة سنتيمتر. فبالتالي هيبقى طول القطعة المستقيمة ط م، يساوي ستة وعشرين وتسعة من عشرة سنتيمتر. فبالتالي هيبقى طول القطعة المستقيمة ط ﻫ، يساوي اتنين في ستة وعشرين وتسعة من عشرة. يعني يساوي تلاتة وخمسين وتمنية من عشرة سنتيمتر.

كده إحنا أوجدنا طول القطعة المستقيمة ط ﻫ. وبكده بعد ما أوجدنا طول القطعة المستقيمة أ د، وطول القطعة المستقيمة ط ﻫ، نقدر نوجد مساحة الشكل أ ط د ﻫ. فهتبقى مساحة الشكل أ ط د ﻫ، تقريبًا تساوي … واحد وخمسين وستمية تمنية وخمسين من ألف، في تلاتة وخمسين وتمنية من عشرة؛ على اتنين. فهنلاقي إن مساحة الشكل أ ط د ﻫ، تقريبًا تساوي ألف تلتمية تسعة وتمانين وستة من عشرة سنتيمتر مربع.

وبكده يبقى إحنا أوجدنا المطلوب، وهو مساحة الشكل أ ط د ﻫ. وهي تقريبًا تساوي ألف تلتمية تسعة وتمانين وستة من عشرة سنتيمتر مربع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.