تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقارنة الأطوال وترتيبها

نهال عصمت

يوضح الفيديو كيفية المقارنة بين الأطوال المختلفة، وترتيبها من الأقصر إلى الأطول، والعكس، ويوضح الكلمات المستخدمة للتعبير عن الأطوال.

٠٥:٢٥

‏نسخة الفيديو النصية

مقارنة الأطوال وترتيبها.

هنعرف إزاي نقارن بين الأطوال. بعد كده هنبدأ نرتِّبهم. لمّا نيجي نتكلّم عن الطول، بنستخدم كلمة طويل أو قصير. طب لو عندنا حاجتين عايزين نقارن ما بينهم، نقدر نقول: إن الحاجة دي أطول من، أو ممكن نقول: إنها أقصر من. طب لو عندنا أشياء كتير عايزين نقارن ما بينهم، نقدر نقول: إن الشكل ده هو الأطول. أو نقدر نقول: إن الشكل ده هو الأقصر. وهي دي الكلمات اللي بنستخدمها للتعبير عن الطول.

طب لو عندنا تلات أقلام بالشكل ده، نقدر نقول على أول قلم: هو الأقصر، وإن آخر قلم هو الأطول. ولو جينا نقارن بين القلم الأول والقلم التاني، نقدر نقول على القلم الأول: أقصر من القلم التاني. ولو جينا نقارن بين القلم التاني والقلم التالت، نقدر نقول: إن القلم التالت أطول من القلم التاني. يبقى كده عرفنا إزاي نستخدم الكلمات اللي بتعبّر عن الطول.

هنبدأ نجيب صفحة جديدة. ونشوف أمثلة توضّح أكتر. لو عندنا مقصّ وفرشة، وعايزين نعرف أيهما أقصر، هنلاحظ إن طول المقصّ أطول من طول الفرشة. وبالتالي نقدر نقول: إن الفرشة أقصر من المقصّ.

طب عايزين نعرف أيهما أطول؛ الممحاة أم القلم الجاف. هنلاحظ إن طول الممحاة أقصر من طول القلم الجاف. وبالتالي نقدر نقول: إن القلم الجاف هو الأطول. يعني القلم الجاف أطول من الممحاة.

يبقى بعد ما عرفنا نحدِّد مين الأقصر ومين الأطول، هنبدأ نجيب صفحة جديدة، ونتكلّم عن ترتيب الأشياء من حيث الطول. لو عندنا باب وزرعة وشباك، وعايزين نرتِّبهم من الأقصر إلى الأطول. هنلاحظ إن أقصر شكل موجود عندنا هو الزرعة. بعد كده، الشكل الذي يليه في الطول هو الشباك؛ عشان الشباك أطول من الزرعة. وأطول شكل موجود عندنا هو الباب. يبقى لمّا نيجي نرتِّبهم، أقصر حاجة هي الزرعة، هنكتب عندها واحد. الشكل الذي يليه هو الشباك، هنكتب عنده اتنين. وأطول شكل موجود عندنا هو الباب، هنكتب عنده تلاتة. يبقى لما نيجي نرتِّب الأشكال من حيث الطول من الأقصر إلى الأطول، هيبقى الزرعة، بعد كده الشباك، بعد كده الباب.

هنجيب صفحة جديدة. لو عندنا تلات أشكال تاني عايزين نرتِّبهم من حيث الطول من الأطول إلى الأقصر. عندنا برَّاية وقلم رصاص ومشط، وعايزين نرتِّب طولهم من الأطول إلى الأقصر. هنلاحظ إن طول البرَّاية هو أقصر طول. بعد كده، هنلاحظ إن طول القلم أقصر من طول المشط. يبقى أطول حاجة موجودة عندنا هي المشط. يبقى هنكتب عند المشط رقم واحد. بعد كده، القلم الرصاص أطول من البرَّاية. يبقى هنكتب عند القلم الرصاص اتنين. وعند البرَّاية رقم تلاتة. يبقى لو جينا نرتِّب التلات أشكال من حيث الطول إلى الأطول إلى الأقصر، أطول حاجة هو المشط. والطول الذي يليه هو القلم الرصاص. وأقصر حاجة موجودة عندنا هي البرَّاية.

يبقى كده اتكلِّمنا عن الكلمات التي تعبِّر عن الأطوال. واتكلِّمنا عن مقارنة الأطوال، وإزاي نرتِّب الأشياء من حيث الطول من الأطول إلى الأقصر، ومن الأقصر إلى الأطول.