تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: الإخبار عن الوقت

سوزان فائق

يوضح الفيديو كيفية الإخبار عن الوقت باستخدام الساعة الرقمية وساعة العقارب.

٠٦:١١

‏نسخة الفيديو النصية

في الفيديو ده هنتكلم عن الإخبار عن الوقت. هنعرف إزاي نقرا الساعة الرقمية، وساعة العقارب. وإزاي نكتب الزمن اللي بتشير إليه الساعة الرقمية، أو ساعة العقارب. الساعة بتظهِر لنا الزمن. فيه نوعين من الساعات. النوع الأول الساعة الرقمية. والنوع التاني ساعة العقارب. الساعة الرقمية بتظهِر لنا الزمن بالأرقام. وبتبقى عبارة عن أرقام في اليسار، وأرقام في اليمين، بينهم نقطتين. الأرقام اللي في اليمين بتعبّر عن الدقائق. والأرقام اللي في اليسار بتعبّر عن الساعات. وبنقرا دي، هنقراها الساعة الثانية عشر وخمسة وثلاثون دقيقة.

لكن ساعة العقارب بتحتوي على عقربين. العقرب ده، والعقرب ده. العقرب الكبير بيقول لنا الدقايق. والعقرب الصغير بيقول لنا الساعات. ساعة العقارب بيبقى فيها الواحد، والاتنين، والتلاتة، والأربعة. والخمسة، والستة، والسبعة، والتمنية، والتسعة، والعشرة، والحداشر، والاتناشر. بتنتهي عند الساعة الاتناشر. وبين كل ساعة واللي بعدها، يعني دي الساعة واحدة، ودي الساعة اتنين. بيبقى بينهم شُرَط صغيرة دي، بنعدّ بيها الدقايق.

العقرب الصغير بيقول لنا الساعات. فهنا هو قريب للستة، وعدّى الستة. يعني هو جاي بعد الستة هنا كده شوية. يبقى الساعة ستة. والدقايق واقفة هنا عند التلاتة. فهنعدّ من عند الاتناشر فوق. هنعدّ: واحد، اتنين، تلاتة، أربعة، خمسة. ستة، سبعة، تمنية، تسعة، عشرة. حداشر، اتناشر، تلتاشر، أربعتاشر، خمستاشر. يبقى الساعة السادسة وخمسة عشر دقيقة. وبنكتبها ستة وخمستاشر دقيقة.

ممكن كنا نعدّ الدقايق بالخمسات. يعني دول خمسة، وخمسة، وهنا كمان خمسة؛ يبقى خمستاشر. ولو كان العقرب جاي على الأرقام اللي في النص. يبقى هنعدّ عدد الأرقام اللي في النص. يعني هنكمّل بعد الخمستاشر: ستاشر، سبعتاشر مثلًا، أو تمنتاشر. على حسب ما عقرب الدقايق موجود.

عايزين نقرا الساعة هنا كام، ونكتبها بالأرقام وبالكلمات. أول حاجة بالأرقام. نشوف العقرب الصغير بتاع الساعات واقف فين. هنلاقيه عدّى السبعة، ورايح للتمنية. لسّه ما وصلش عند التمنية. تبقى الساعة سبعة. وكام دقيقة؟ هنعدّ خمسات من عند الاتناشر. آدي خمسة، وآدي خمسة، وخمسة …

يبقى لمّا هنعدّ، هتبقى خمسة. وبعدين العشرة. وبعدين الخمستاشر. وبعدين العشرين. خمسة وعشرين. تلاتين. خمسة وتلاتين. أربعين. خمسة وأربعين. وهنقف عند الخمسين. يبقى الساعة ٧ وَ ٥٠ دقيقة. هنكتبها بالكلمات. هتبقى بالشكل ده.

عايزين نقرا الساعة اللي قدامنا دي؛ الساعة الرقمية. زيّ ما قلنا؛ اللي على اليسار بيمثّل الساعات، يبقى الساعة التاسعة. واللي على اليمين بيمثّل الدقائق، يبقى عشر دقائق.

عايزين نقرا الساعة الرقمية دي، ونشوفها بتمثل إيه على ساعة العقارب. هنا الساعة عشرة وتمنية وعشرين دقيقة. هنعدّ تمنية وعشرين دقيقة، من عند الاتناشر فوق كده. وهنقول خمسة، وبعدين العشرة. آدي خمسة، وبعدين عشرة، وبعدين خمستاشر، عشرين، خمسة وعشرين. ونعدّ بعد الخمسة وعشرين: ستة وعشرين، سبعة وعشرين، تمنية وعشرين. يبقى ده عقرب الدقائق، اللي هو الكبير. والعقرب الصغير بتاع الساعات، هيبقى يعدّي العشرة بشوية كده؛ يبقى هنا. يبقى كده قدرنا نمثّل ساعة الأرقام بساعة العقارب.

ساعة العقارب اللي قدامنا دي، فيها عقرب الدقايق عند الاتناشر. وعقرب الساعات عند الأربعة. تبقى الساعة الرابعة. ليه؟ لأن هي الاتناشر لسّه ما عدّش دقايق. يعني هو واقف عند الأربعة، ولسّه هيعدّ دقايق. أو كانت عند التلاتة، وقعد يعدّ دقايق. عدّ ستين دقيقة، اللي هم دول. والساعة فيها ستين دقيقة. يعني وصلت عند الأربعة. فبنكتبها بالأرقام الساعة ٤:٠٠، بالشكل ده.

اتكلمنا في الفيديو ده عن كتابة الزمن، اللي بتشير ليه الساعة الرقمية، أو ساعة العقارب. وعرفنا إن الساعة الرقمية بتبقى فيها الساعة بالأرقام. نقطتين، وعلى يسارهم قيمة الساعة. وعلى يمينهم قيمة الدقايق. وساعة العقارب فيها عقربين. واحد صغير، وواحد كبير. الصغير بيمثّل الساعات. والكبير بيمثّل الدقايق.