فيديو: العلاقة بين الضرب والقسمة

معاذ صالح

يوضح الفيديو العلاقة بين عمليتَيِ الضرب والقسمة، ويُعرِّف كذلك عائلة الحقائق، وأمثلة عليها.

٠٣:٤٨

‏نسخة الفيديو النصية

العلاقة بين الضرب والقسمة.

في الفيديو ده هنتعلّم العلاقة بين الضرب والقسمة. وهنتعرّف على عائلة الحقائق. عمليتَي الضرب والقسمة مرتبطين ببعض بشكل كبير. وممكن نربط ما بينهم بسهولة، بمجموعة من الجمل.

يعني مثلًا لو في بيض في علبة بالشكل ده. وعاوزين نعّبر عن البيض اللي فيها، باستخدام الضرب. فممكن نقول إن الصفّ فيه تلات بيضات. وفيه صفّين. فممكن نكتبها بالشكل ده: تلاتة في اتنين، هيساوي ستة. وبرضو ممكن نقول العكس. إن الصفّ فيه بيضتين، وفيه تلات صفوف. فممكن نكتبها بالشكل ده: اتنين في تلاتة، هيساوي ستة.

وممكن برضو نعبّر عن البيض باستخدام القسمة. فهنقول إن عدد البيض الكلي ست بيضات. وعدد البيض في كل صفّ تلات بيضات. فهنكتبها بالشكل ده: ستة على تلاتة، هتساوي اتنين. وبرضو ممكن نقول إن عدد البيض الكلي ست بيضات. وعدد البيض في كل صفّ بيضتين. فهنكتبها بالشكل ده: ستة على اتنين، هيساوي تلاتة.

الجمل العددية دي، بنسمّيها عائلة الحقائق. عائلة الحقائق هي مجموعة مكوّنة من أربع حقائق، بتربط الضرب والقسمة. وبتستخدم نفس الأعداد التلاتة، من خلال نمط معيّن.

نتنقل لصفحة تانية، ونحلّ مثال. عاوزين نكتب عائلة حقائق للشكل اللي هيظهر. من الشكل، هنلاحظ إن عدد الأزرار الكلي اتناشر زر. متقسّمين في تلات صفوف، وأربع أعمدة. أو أربع صفوف، وتلات أعمدة.

يبقى عائلة الحقائق هي: تلاتة في أربعة، بيساوي اتناشر. أربعة في تلاتة، بيساوي اتناشر. اتناشر على تلاتة، بيساوي أربعة. اتناشر على أربعة، بيساوي تلاتة. يبقى الضرب والقسمة هما عمليتين عكسيتين لبعض. وممكن نستخدم حقائق الضرب، لمساعدتنا في القسمة.

نتنقل لصفحة تانية، ونحلّ مثال. حسام عنده ستة وتلاتين كتاب. وعاوز يرتّبهم في مكتبة من أربع رفوف. بحيث إن كل رفّ يبقى فيه نفس عدد الكتب. فكم كتاب هيبقى في كل رفّ؟

كده يبقى السؤال ستة وتلاتين على أربعة. فبربط الضرب بالقسمة، ممكن نفكر: إيه هو العدد اللي لو ضربناه في أربعة، هيبقى الناتج ستة وتلاتين؟ العدد هو تسعة. يبقى ستة وتلاتين على أربعة، هيساوي تسعة. وده عدد الكتب اللي حسام هيحطّها في كل رف.

وبكده نبقى خلّصنا الفيديو ده. اللي اتكلمنا فيه عن العلاقة بين الضرب والقسمة. واتعرّفنا فيه على عائلة الحقائق.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.