تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تقريب الكسور

أحمد لطفي

يوضح الفيديو كيفية تقريب الكسور إلى واحد أو إلى نصف أو إلى صفر.

٠٤:٤٥

‏نسخة الفيديو النصية

هنتكلم عن تقريب الكسور، وهنشوف إمتى نِقدر نقرّب الكسور لـ واحد، وإمتى نِقدر نقرّب الكسور لـ نُص، وإمتى نِقدر نقرّب الكسور لـ صفر.

في البداية لو عندنا كسر زي ده تمنية على عشرة، وعايزين نشوف هنِقدر نقرّبه لـ واحد ولا لـ نُص ولا لـ صفر. نِقدر نستخدم المسطرة، هنلاقي إن الكسر تمنية على عشرة بيكون في المكان ده، ومن المسطرة هنلاحظ إن الكسر تمنية على عشرة هو أقرب لـ واحد أكتر من نُص؛ وبالتالي نِقدر نقول إن الكسر تمنية على عشرة يُقرّب إلى واحد.

لو عندنا كسر آخر، مثلًا الكسر أربعة على عشرة، ومحتاجين نشوف الكسر أربعة على عشرة نِقدر نقرّبه لـ واحد ولا لـ نُص ولا لـ صفر. عَ المسطرة هنجد إن الكسر أربعة على عشرة هيكون في المكان ده، وبالتالي هنلاحظ إن الكسر أربعة على عشرة أقرب لـ نُص أكتر من الـ صفر؛ يبقى هنقول الكسر أربعة على عشرة يُقرّب إلى نُص.

لو عندنا كسر آخر بالشكل ده، محتاجين نشوف الكسر واحد على عشرة نِقدر نقرّبه لـ واحد ولا لـ نُص ولا لـ صفر. عالمسطرة هنجد إن الكسر واحد على عشرة هيكون في المكان ده، وبالتالي هنلاحظ إن الكسر واحد على عشرة هو أقرب من الـ صفر أكثر من نُص؛ يبقى هنقول الكسر واحد على عشرة يُقرّب إلى صفر.

هنلاحظ إن لو كان العدد اللي في البسط كبير زي العدد اللي في المقام، يبقى هنقرّب الكسر لأول عدد صحيح أكبر من الكسر؛ ولو كان العدد اللي في البسط تقريبًا نُص العدد اللي في المقام، يبقى هنقرّب الكسر لـ نُص؛ ولو كان العدد اللي في البسط أصغر بكتير جدًّا من العدد اللي في المقام، يبقى هنقرّب الكسر لأول عدد صحيح أصغر من الكسر.

يعني عندنا تلات حالات: أول حالة هي التقريب إلى أعلى، وبتِحصل لما يكون البسط كبير بما فيه الكفاية بالنسبة للمقام، وفي الحالة دي بنقرّب الكسر لـ واحد؛ زي مثلًا الكسر تمنية على عشرة هيُقرّب إلى واحد. تاني حالة هي التقريب لـ نُص، وبتِحصل لما البسط يكون بيساوي تقريبًا نُص المقام؛ مثلًا زي الكسر أربعة على عشرة بيُقرّب إلى نُص. وآخر حالة هي التقريب إلى أسفل، وبتِحصل لما البسط بيكون أصغر بكتير أوي من المقام، وساعتها بنقرّب الكسر لـ صفر؛ زي مثلًا واحد على عشرة تُقرّب إلى صفر.

هنوضح أكتر من خلال الأمثلة. لو عندنا مثال بالشكل ده، مطلوب نقرّب الكسر اتنين على عشرة. ممكن نستخدم خط الأعداد، هنلاحظ إن الكسر اتنين على عشرة في المكان ده، وبالتالي هيكون أقرب لـ صفر، وهنلاحظ أيضًا إن العدد اللي في البسط اللي هو الاتنين أصغر بكتير جدًّا من العدد اللي في المقام اللي هو العشرة؛ وبالتالي الكسر اتنين على عشرة يُقرّب إلى صفر.

لو عندنا مثال آخر بالشكل ده، مطلوب نِوجد سُمك القلم الرصاص ونقرّب الكسر. هنستخدم المسطرة عشان نِقدر نِوجد سُمك القلم الرصاص، هنجد إن سُمك القلم الرصاص تقريبًا هيساوي، أربعة على خمسة، هو الكسر أربعة على خمسة، وهنلاحظ إن الكسر أربعة على خمسة العدد اللي موجود في البسط هو كبير، تقريبًا قدّ العدد اللي موجود في المقام، وبالتالي لو عايزين نقرّب الكسر أربعة على خمسة؛ فالكسر أربعة على خمسة هيُقرّب إلى واحد.

كده نكون قِدرنا نِوجد سُمك القلم الرصاص، وكان بيساوي أربعة على خمسة، والكسر أربعة على خمسة يُقرّب إلى واحد.

وفي النهاية نكون عِرفنا إزاي نِقدر نقرّب الكسور إلى واحد، أو إلى نُص، أو إلى صفر.