فيديو: إيجاد مساحة شكل مركَّب يتكوَّن من مثلث ونصف دائرة

أوجد مساحة الشكل الموضّح لأقرب جزء من عشرة.

٠٢:٥٤

‏نسخة الفيديو النصية

أوجد مساحة الشكل الموضّح لأقرب جزء من عشرة.

ومُعطى عندنا الشكل اللي قدامنا ده، وعايزين نوجد مساحته. فهنلاحظ إن الشكل اللي عندنا ده بينقسم إلى شكلين. فهنلاحظ إن الشكل اللي عَ اليمين هو عبارة عن نص دايرة. وأما الشكل اللي على الناحية التانية فهو عبارة عن مثلث. فعشان نوجد مساحة الشكل اللي عندنا، يبقى عايزين نوجد مساحة نُص الدايرة ومساحة المثلث، وبعد كده نجمعهم.

فأول حاجة هنعملها إننا هنوجد مساحة نُص الدايرة. وخلينا في الأول نفتكر إن مساحة الدايرة بتساوي حاصل ضرب 𝜋 في نق تربيع. لكن بما إننا بنوجد مساحة نص الدايرة فهيبقى نص المساحة. يعني هتبقى مساحة نُص الدايرة بتساوي نُص في 𝜋 في نق تربيع.

بعد كده عايزين نحسب مساحة المثلث. وخلينا نفتكر إن مساحة المثلث بتساوي نُص طول القاعدة في الارتفاع.

بعد كده هنبدأ نعوّض. فلمّا نيجي نحسب مساحة نُص الدايرة، هنلاحظ إن معطى عندنا إن نص قُطر الدائرة بيساوي حداشر سنتيمتر. فلمّا نعوّض عن نق بحداشر، هيبقى مساحة نص الدايرة بيساوي نص في 𝜋 في حداشر تربيع.

بعد كده هنيجي نحسب مساحة المثلث. وهنلاحظ من الشكل إن مُعطى عندنا ارتفاع المثلث هو ستاشر سنتيمتر. وأما قاعدة المثلث اللي هو الضلع ده، فهنلاحظ إن طول الضلع ده اللي هو طول القاعدة، هو عبارة عن طول قُطر الدايرة. وبما إن معطى عندنا إن طول نص القطر حداشر سنتيمتر.

فمعنى كده إنه طول قطر الدايرة هو اتنين وعشرين سنتيمتر. فبالتالي هنعوّض عن طول القاعدة باتنين وعشرين سنتيمتر، وعن الارتفاع بستاشر سنتيمتر. فهتبقى مساحة المثلث بتساوي نص في اتنين وعشرين في ستاشر.

بعد كده هنحسب المقدار ده؛ يعني هنضرب نص في 𝜋 في حداشر تربيع. فلمّا نحسب حداشر تربيع هتبقى بتساوي مية واحد وعشرين. ومية واحد وعشرين في نص بتساوي ستين ونص؛ فهتبقى مساحة نص الدايرة هي ستين ونص 𝜋.

بعد كده هنحسب مساحة المثلث؛ يعني هنضرب نص في اتنين وعشرين في ستاشر. فلمّا هنحسبها هتبقى بتساوي مية ستة وسبعين.

بعد كده هنجمع ستين ونص 𝜋، زائد مية ستة وسبعين، وهنستخدم قيمة 𝜋 اللي على الآلة الحاسبة. فلمّا نحسبها هتبقى بتساوي تلتمية ستة وستين، وستمية تلاتة وستين من عشر آلاف. وبما إننا بنوجد مساحة، فهتبقى الوحدة هي سنتيمتر مربع.

لكن هنلاحظ السؤال إننا مطلوب نوجد مساحة الشكل لأقرب جزء من عشرة. فلمّا نقرّب الناتج اللي عندنا لأقرب جزء من عشرة، هيبقى تقريبًا بيساوي تلتمية ستة وستين وواحد من عشرة. وبالتالي هتبقى مساحة الشكل الموضّح هي تلتمية ستة وستين وواحد من عشرة سنتيمتر مربع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.