تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد كمية الحركة لجسم في زمن مُعطى بمعلومية إزاحته بالنسبة إلى الزمن

أحمد لطفي

سيارة كتلتها ١‎٣٥٠ كجم تتحرَّك في خط مستقيم، وكانت إزاحة السيارة عند اللحظة ﻥ ثانية، من نقطة ثابتة على الخط المستقيم، تُعطى بالعلاقة: ﻑ = (٦ﻥ^٢ − ٣ﻥ + ٤) م. أوجد مقدار كمية حركة السيارة عند ﻥ = ٣ ث.

٠٢:١١

‏نسخة الفيديو النصية

سيارة كتلتها ألف تلتمية وخمسين كيلوجرام تتحرك في خط مستقيم، وكانت إزاحة السيارة عند اللحظة ن ثانية من نقطة ثابتة على الخط المستقيم تُعطى بالعلاقة ف بتساوي ستة ن تربيع ناقص تلاتة ن زائد أربعة متر. اوجد مقدار كمية حركة السيارة عند ن بتساوي تلاتة ثانية.

في البداية كمية الحركة بتساوي الكتلة مضروبة في السرعة. معطى عندنا كتلة السيارة، ومعطى إزاحة السيارة، يبقى محتاجين نوجد سرعة السيارة. وسرعة السيارة اللي بنرمز لها بالرمز ع، علاقتها بإزاحة السيارة هتكون إن ع بتساوي د ف على د ن. يعني هنشتق العلاقة اللي بتوضح إزاحة السيارة بالنسبة للزمن. يعني ع اللي هي سرعة السيارة هتساوي … مشتقة ستة ن تربيع، هتساوي اتناشر ن، ومشتقة سالب تلاتة ن هتساوي سالب تلاتة، ومشتقة أربعة هتساوي صفر. يعني ع اللي هي سرعة السيارة هتساوي اتناشر ن ناقص تلاتة متر ع الثانية.

وبالتالي كمية الحركة هتساوي كتلة السيارة اللي هي ألف تلتمية وخمسين، مضروبة في سرعة السيارة اللي هي اتناشر ن ناقص تلاتة. يعني كمية الحركة هتساوي ستاشر ألف وميتين ن، ناقص أربعة آلاف وخمسين. مطلوب نوجد كمية حركة السيارة عند ن بتساوي تلات ثواني. وبالتالي كمية حركة السيارة عند ن بتساوي تلات ثواني، هتكون هي كمية الحركة وهنعّوض عن ن بتلاتة.

وبالتالي كمية حركة السيارة بعد ن بتساوي تلات ثواني، هتكون ستاشر ألف وميتين مضروبة في تلاتة ناقص أربعة آلاف وخمسين. وبالتالي كمية حركة السيارة بعد ن بتساوي تلات ثواني، هتكون بتساوي أربعة وأربعين ألف خمسمية وخمسين كيلوجرام في متر عَ الثانية. يبقى كده اقدرنا نوجد كمية حركة السيارة بعد ن بتساوي تلات ثواني، وكانت بتساوي أربعة وأربعين ألف خمسمية وخمسين كيلوجرام في متر عَ الثانية.