فيديو: إيجاد محيط مضلع بمعلومية أبعاده

أوجد محيط الشكل الموضَّح.

٠٣:٢٦

‏نسخة الفيديو النصية

أوجد محيط الشكل الموضّح.

عندنا الشكل اللي قدامنا ده، وعاوزين نعرف محيطه. علشان تعرف محيطه؛ يعني هنمشي حواليه. لو فرضنا إننا بدأنا من النقطة دي، فهنمشي على الخط ده، اللي هو أربعتاشر ملليمتر، بعدين تمنية ملليمتر، عشرة ملليمتر، تسعة ملليمتر، عشرة ملليمتر، تسعة ملليمتر، أربعتاشر ملليمتر، وستة وعشرين ملليمتر. من مكان ما بدأنا انتهينا، كده إحنا حاوِطنا الشكل. عاوزين نعرف بقى المحيط ده بيساوي كام.

علشان نعرف المحيط، هنجمّعم كلهم؛ هناخد ضلع ضلع ونجمّعه مع الضلع اللي بعده. هنبدأ بأول ضلع وهو الضلع ده أربعتاشر ملليمتر، يبقى نكتب أربعتاشر؛ بعديها الضلع ده اللي بعده، زائد تمنية ملليمتر؛ وده اللي عليه الدور، زائد عشرة ملليمتر؛ وده اللي بعده، زائد تسعة ملليمتر؛ وده اللي بعده، زائد عشرة ملليمتر؛ وده اللي بعده، زائد تسعة ملليمتر؛ وده اللي بعده، زائد أربعتاشر ملليمتر؛ وده آخر ضلع عشان بيوصّلنا لنقطة البداية، وهو ستة وعشرين ملليمتر. دي كده أطوال أضلاع الشكل كله، هنبدأ بقى نجمّعها.

أول حاجة هنجمع عشرة زائد عشرة؛ عشرة زائد عشرة عشرين، كتبناها هنا. اللي جمعناه نشد تحته خط علشان ما نتلخبطش فيه. بعدين هنجمع تسعة زائد تسعة؛ تسعة زائد تسعة تمنتاشر، نحطها هنا تمنتاشر. بعدين نجمع أربعتاشر زائد أربعتاشر؛ أربعة وأربعة تمنية، واحد وواحد اتنين؛ يبقى تمنية وعشرين. بعدين نجمع آخر حاجة اتبقّت معانا هي التمنية والستة وعشرين؛ تمنية وستة أربعتاشر، وواحد عَ الاتنين يبقى تلاتة، يبقى هم بيساووا أربعة وتلاتين.

بعدين نجمع عشرين وتمنتاشر؛ تمنية زائد صفر، تمنية؛ واتنين زائد واحد، تلاتة. ونجمع تمنية وعشرين وأربعة وتلاتين؛ تمنية وأربعة اتناشر، اتنين ومعانا الواحد، واحد عَ الاتنين تلاتة، تلاتة زائد تلاتة ستة. وآخر حاجة هنجمعها تمنية وتلاتين زائد اتنين وستين؛ تمنية زائد اتنين عشرة، صفر ومعانا الواحد على التلاتة بقت أربعة، أربعة وستة عشرة.

يبقى ناتج جمع الأعداد دي كلها هو مية، والتمييز بتاعنا ملليمتر. يبقى محيط الشكل اللي قدامنا ده مية ملليمتر، وهي دي الإجابة الصحيحة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.