فيديو: الضرب في ۳

يوضح الفيديو كيفية إيجاد حاصل الضرب في العدد ۳ باستخدام النماذج وطريقة الجمع المتكرر، وكيفية إيجاد عامل الضرب المجهول في جملة الضرب، مع أمثلة توضيحية.

١٠:٥٣

‏نسخة الفيديو النصية

هنعرف الفيديو ده إزّاي نقدر نوجد حاصل الضرب في العدد تلاتة. وهنعرف إزّاي إن الضرب عبارة عن عملية جمع متكرّر.

لو عندنا أم بتوزّع على أطفالها الصغار قطع من البسكويت. بحيث إن كل طفل من الأطفال حصل على تلات قطع من البسكويت. يبقى الأم وزّعت كام قطعة من البسكويت على الأطفال اللي عندنا كلهم؟

نقدر نعدّ قطع البسكويت. هنلاقي إن محمد أخد واحد اتنين تلات قطع من البسكويت. كريم هنكمّل العدّ، معاه تلاتة تانيين؛ يبقى أربعة خمسة ستة. وبعدين منى أخدت تلاتة كمان. نكمل العدّ سبعة تمنية تسعة. وبعدين ليلى أخدت تلات قطع تانيين، نكمل عشرة حداشر اتناشر. كده عرفنا إن الأم وزّعت اتناشر قطعة من البسكويت على الأطفال كلهم.

طب يا ترى إيه الطريقة اللي عملناها عشان نقدر نعرف عدد قطع البسكويت الكلي اللي مع الأطفال كلهم؟ الطريقة اللي إحنا عملناها دي إحنا عملنا عملية جمع. رسمنا صور قطع البسكويت اللي مع كل طفل من الأطفال. وجمّعنا الأعداد دي، ووصلنا لعدد قطع البسكويت الكلي. ممكن نستخدم طريقة رياضية أخرى، وهي الجمع المتكرر.

إحنا عارفين إن كل طفل معاه تلات قطع من البسكويت. يبقى عشان نوجد عدد قطع البسكويت الكلي، هنعمل جمع متكرّر. كل مرة نجمع تلات قطع آخرين؛ عشان أشوف كده بقى معايا كام قطعة. يعني أول طفل كان معاه تلاتة. الطفل اللي بعده معاه تلاتة آخرين. فيبقى هنجمع تلاتة وتلاتة. يبقى إحنا معانا لغاية دلوقتي ست قطع من البسكويت. وبعدين نضيف قطع البسكويت اللي مع الطفل التالت. يبقى كان معانا ستة، ونضيف عليهم تلاتة كمان؛ كده بقى معانا تسع قطع من البسكويت. دلوقتي هنجمع آخر قطع من البسكويت اللي موجودة مع الطفل الرابع. يبقى هنجمع تلاتة على عدد البسكويت اللي كان معانا. كان معانا تسعة هنضيف عليهم تلاتة، هيصبح العدد الكلي اتناشر.

يبقى الطريقة اللي اتبعناها دلوقتي هي طريقة الجمع المتكرر. الجمع المتكرر بنبدأ بعدد قطع البسكويت اللي مع الطفل الأول. وبعدين بنضيف عليها تلاتة اللي بتمثّل عدد قطع البسكويت اللي مع التاني. وبعدين بنضيف عليها تلاتة آخرين اللي بتمثّل عدد القطع اللي مع الطفل التالت. وبعدين آخر خطوة هنضيف كمان تلاتة اللي بتمثّل عدد القطع اللي مع الطفل الرابع. كده عملنا عملية جمع متكرر للعدد تلاتة أربع مرات. وده وصّلنا إن الام وزّعت اتناشر قطعة من البسكويت على الأربع أطفال اللي عندنا.

فيه طريقة أخرى رياضية ممكن نستخدمها بدل عملية الجمع المتكرر. إحنا دلوقتي عندنا أربع مجموعات، كل مجموعة بتتكوّن من تلات قطع. الأربع مجموعات بيعبّروا عن الأربع أولاد اللي عندنا. والقطع اللي بداخل كل مجموعة هي نصيب كل طفل من قطع البسكويت. يبقى لو عايزين نحسب عدد قطع البسكويت الكلية، هنضرب عدد الأولاد أو عدد المجموعات اللي هو أربعة، في نصيب كل طفل. أو عدد القطع اللي بتتكوّن منها كل مجموعة، اللي هو تلاتة. وحاصل الضرب ده اللي هو هيطلع بيساوي اتناشر، هو ده عدد قطع البسكويت الكلية اللي هيتمّ توزيعها على الأولاد.

يبقى عملية الضرب دي هي العملية البديلة لإن إحنا نعمل عملية الجمع المتكرر لتلاتة زائد تلاتة زائد تلاتة زائد تلاتة. واللي هتدينا نفس الناتج اللي هو اتناشر. لأن الضرب هو عبارة عن عملية جمع متكرر.

هنشوف مع بعض دلوقتي مثال آخر. لو عندنا مجموعة من الأطفال، كل طفل معاه تلات أقلام ملوّنة. وجمّعنا منهم الأقلام دي وحطيناها في مكان واحد. يا ترى نقدر نعرف كم قلم مع الأطفال دول كلهم؟

أول حاجة محتاجين نشوف إحنا عندنا كام طفل. واحد، اتنين، تلاتة، أربعة، خمسة، ستة، سبعة. يبقى إحنا عندنا سبعة أطفال، كل واحد معاه تلات أقلام ملوّنة. نقدر نمثّل الأقلام اللي عندنا باستخدام قطع العدّ، أو استخدام النماذج. هنستخدم سبع مجموعات، كل مجموعة هيبقى فيها تلات قطع عدّ. وعشان نقدر نوجد عدد قطع العدّ اللي عندنا دول كلهم، هنبتدي بأول تلات قطع، ونجمع عليهم تلاتة مرة أخرى. وبعدين تلاتة. وكمان تلاتة. سبع مرات. وهنلاقي إن الناتج هيطلع واحد وعشرين؛ لأننا لو عدينا قطع العدّ اللي معانا كلها، اللي استخدمناها لتمثيل عدد الأقلام الملونة، هنلاقيها واحد وعشرين قطعة. يبقى كده باستخدام الجمع المتكرّر قدرنا نحصل على عدد الأقلام الكلية اللي هو واحد وعشرين.

والطريقة الأخرى اللي نقدر نوجد بيها عدد الأقلام الكلية اللي عندنا، هي باستخدام عملية الضرب. عشان الضرب هو الشكل المختصَر لعملية الجمع المتكرر. إحنا دلوقتي إيه العدد اللي بيتمّ تكرار جمعه؟ هو تلاتة. يبقى هنبدأ بالعدد تلاتة، وهنشوف حاصل ضربه في عدد مرات التكرار، أو عدد مرات الجمع. إحنا جمعنا العدد تلاتة سبع مرات. يبقى حاصل ضرب العدد في مرات التكرار اللي هي سبعة. هيبقى الناتج واحد وعشرين. هيبقى الناتج واحد وعشرين. بنسميه في عملية الضرب حاصل الضرب. أما في عملية الجمع المتكرر فناتج الجمع المتكرر ده هو ناتج الجمع.

يبقى كده عرفنا إزّاي إن عملية الضرب هي نفسها عملية جمع متكرر. في المثال اللي قدامنا ده، عرفنا إن فيه سيدة ما اشترت تلات أكياس من البرتقال. وزن الكيس الواحد كان ستة كيلوجرام. مطلوب منّنا نعرف كم كيلوجرام من البرتقال اشترت السيدة.

دلوقتي السيدة دي اشترت تلاتة أكياس. الكيس الواحد فيه أو وزنه عبارة عن ست كيلوجرامات. يبقى عشان نقدر نوجد عدد الكيلوجرامات اللي اشترِتهم السيدة دي، نقدر نستخدم الجمع المتكرر. فهيبقى عندنا … هنجمع ستة، زائد ستة، زائد ستة. ستة زائد ستة اتناشر. ونضيف كمان ستة، هيبقى المجموع بيساوي تمنتاشر.

ونقدر بدل الجمع المتكرّر اللي استخدمناه، نقدر نستخدم عملية الضرب. إحنا عندنا الكيس الواحد من البرتقال وزنه ستة كيلوغرامات. هنضرب عدد الكيلوجرامات اللي موجودة في الكيس الواحد في عدد أكياس البرتقال اللي همّ تلاتة. كده هنوصل إن حاصل الضرب هيبقى بيساوي تمنتاشر. يبقى إحنا هناخد العدد اللي بيتمّ تكراره، ده أول عامل من عوامل الضرب. وعدد مرات التكرار اللي همّ تلات مرات. هو ده العامل التاني في عملية الضرب. يبقى حاصل ضرب ستة في تلاتة هيساوي تمنتاشر.

يبقى كده عرفنا إن السيدة دي اشترت تمنتاشر كيلوجرام من البرتقال. عرفنا مرة باستخدام الجمع المتكرر ومرة أخرى باستخدام عملية الجمع.

هنشوف دلوقتي فكرة مختلفة في المثال اللي جاي.

في المثال اللي عندنا ده، هنعرف إن أحد الأمهات ذهبت لشراء مجموعات من الأكواب الملوّنة للاحتفال بعيد ميلاد طفلها الصغير. لمّا ذهبت لدفع ثمن الأكواب، وجدت إن الأكواب اللي هي بتدفع ثمنها عبارة عن سبعة وعشرين كوب. يا ترى عدد الأكواب في كل مجموعة من المجموعات اللي عندنا هيبقى كام؟

هنشوف الأول هي جابت كام مجموعة من الأكواب الملوّنة. هنلاقيها جابت واحد، اتنين، تلات مجموعات من الأكواب الملونة. يبقى عندنا عدد المجموعات اللي اشترتها تلات مجموعات. وعدد الأكواب الكلية اللي ذهبت لدفع تمنها، لقت إن همّ سبعة وعشرين كوب. محتاجين دلوقتي نعرف عدد الأكواب في كل مجموعة.

هنشوف إزّاي نقدر نوجد عدد الأكواب في كل مجموعة باستخدام عملية الضرب. دلوقتي عملية الضرب دايمًا بنكتب عدد المجموعات اللي هو عندنا هنا تلاتة. في عدد العناصر التي بتتكون منها كل مجموعة، اللي هو العدد المجهول اللي إحنا مش عارفينه. وحاصل الضرب اللي هو هنا عدد الأكواب الكلية، اللي هي وجدت إن همّ سبعة وعشرين كوب. إزّاي هنقدر نوجد العدد ده؟ العدد ده معناه إن إحنا محتاجين نوزّع السبعة وعشرين كوب على تلات مجموعات. ونشوف كل مجموعة هيبقى فيها كام. هنوزّع قطعة على كل مجموعة، وبعدين قطعة أخرى على كل مجموعة. لغاية ما نخلّص السبعة وعشرين قطعة، اللي عندنا، ونشوف كل مجموعة فيها كام قطعة. كده هنلاقي إن كل مجموعة فيها تسع قطع.

يبقى كده عرفنا إن حاصل ضرب عدد المجموعات اللي هو تلاتة، في عدد القطع في كل مجموعة. هو ده اللي هيدّينا إجمالي عدد القطع أو عدد القطع الكلية اللي هي سبعة وعشرين. يبقى هنحط هنا عدد القطع في كل مجموعة، اللي هو طلع تسعة. وكده قدرنا نوجد عدد الأكواب في كل مجموعة من المجموعات الملوّنة اللي اشترِتها هذه السيدة.

عرفنا في الفيديو ده إزّاي إن الضرب هو عملية جمع متكرر. وقدرنا نعرف إزّاي نوجد نواتج الضرب بطرق مختلفة. باستخدام النماذج، أو الصور. قدرنا نستخدم عملية الجمع المتكرّر. وقدرنا نعمل عن طريق الرسم شبكة من مجموعات متساوية. وعن طريقها وصلنا لنواتج الضرب. وعرفنا كمان إزّاي نقدر نحسب أحد عوامل الضرب، لو عندنا حاصل الضرب وعندنا العامل الآخر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.