فيديو: ضرب عدد مُكوَّن من عدة أرقام في عدد مُكوَّن من رقم واحد

احسب ٤٦٢٧ × ٩.

٠٣:٠٣

‏نسخة الفيديو النصية

احسب أربعة آلاف ستمية سبعة وعشرين في تسعة.

علشان نحسب أو علشان نعرف نعمل عملية الضرب دي بشكل سهل وسريع، هنكتب العددين تحت بعض في شكل رأسي منظّم. يعني هنعمل إيه؟ هنكتب أربعة آلاف ستمية سبعة وعشرين، وهنا كده على جنب علامة الضرب اللي هي في، والتسعة تحت السبعة؛ لأنها آحاد. و بعدين نوجد ناتج الضرب.

فأول حاجة هنعملها هي إننا هنضرب التسعة في سبعة. التسعة في سبعة تساوي تلاتة وستين. هنعمل إيه في التلاتة وستين؟ هناخد التلاتة ونحطها تحت التسعة، هنا كده. أما الستة فهتروح فوق الاتنين، تتكتب هنا كده؛ ستة.

بعدين نضرب التسعة في اتنين. التسعة في اتنين هتساوي تمنتاشر. ونحط عليها، على التمنتاشر الستة اللي هي موجودة هنا. طيب تمنتاشر زائد ستة؟ أربعة وعشرين. هنعمل إيه في الأربعة وعشرين؟ هناخد الأربعة نحطها تحت الاتنين، بالشكل ده. أما الاتنين دي فهتروح فوق الستة، هنا كده، اتنين.

بعدين نضرب التسعة في ستة. التسعة في ستة بتساوي أربعة وخمسين، ونجمع عليها الاتنين دي؛ يبقى أربعة وخمسين زائد اتنين، هتساوي ستة وخمسين. نعمل إيه في الستة وخمسين؟ ناخد الستة نكتبها هنا؛ آدي الستة. وناخد الخمسة نكتبها فوق الأربعة، آدي الخمسة.

آخر حاجة نضربها هي التسعة في أربعة. التسعة في أربعة تساوي ستة وتلاتين، بس الأربعة موجود فوقيها خمسة. يبقى هنجمع على الستة وتلاتين خمسة. ستة وتلاتين زائد خمسة تساوي واحد وأربعين. ما فيش حاجة تاني هنضربها في التسعة؛ فده معناه إننا هناخد الواحد وأربعين كلها، ونكتبها هنا. نكتب واحد وأربعين.

ويبقى كده ناتج ضرب التسعة في أربعة آلاف ستمية سبعة وعشرين، هو واحد وأربعين ألف ستمية تلاتة وأربعين، اللي هو الناتج ده اللي إحنا طلعناه. وتبقى هي دي الإجابة اللي إحنا المفروض تختارها؛ واحد وأربعين ألف ستمية تلاتة وأربعين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.